唔少人鍾意日本菜，因為食到魚材嘅原始鮮味，仲享受到日本料理嗰種恬靜。特別係高級日本料理，望著師傅喺木枱前握搯壽司，連視覺都成為一種享受。銅鑼灣新開業嘅「藏」亦承傳呢種日本傳統飲食文化，喺酒店級環境下食「廚師發辦」。當你踏入日式玄關時，恬靜環境仿佛無言地話畀大家知，可以開始靜落嚟體驗呢場日本料理喇。
一入門口已見到典雅嘅木屏風同插花擺設。
午．晚兩市 都食到廚師發辦
「藏」有午、晚兩市，想划算感受「廚師發辦」同日本直送刺身嘅話，個人好推薦先以午市入門，價錢相對抵食外，午市菜單同樣食到師傅拿手名菜。晚市則行更高質路線，仲有3個價錢揀。揀好價錢後就可以完全交畀師傅，由佢依你喜好創作一系列時令料理，飯後仲可以去店內嘅娛樂套房飲酒、唱歌，感受吓日本人嘅消遣娛樂文化𠻹。
VIP房私人度夠高，舉行私人宴會都好有派場。
曾赴東京學藝 專業師傅駐場
「廚師發辦」講求嘅除咗係食材質素，最重要嘅當然係發辦嘅廚師，因為客人食咩、享唔享受到整個料理過程，都全靠廚師經驗同技巧。「藏」嘅主廚KC 就曾遠赴東京深造壽司技法，回港後亦有豐富主廚經驗，無論係選材、握掐壽司定燒烤都極具功架。
而且KC 對食材要求好嚴謹，店內所有魚材都係每日由東京、九州同北海道漁市場新鮮到貨，堅持只揀時令貨，令人食到海鮮嘅原始鮮味。
想睇師傅功架嘅話，一定要揀吧枱。
兩大空間 酒店級高雅氣氛
店內就分為壽司吧同主廳兩大空間，鍾意欣賞師傅功架嘅當然要坐一字型淺木吧枱；想有酒店品味氣氛嘅話，就推薦以薄荷藍梳化椅為主調嘅主廳，特別適合三五知己或商務客慢慢邊食邊傾。
薄荷藍梳化椅令成個環境好舒服。
午市選擇多 13款高質定食
講咁耐，咁呢度有咩好嘢食呢？午市除咗可以揀「廚師發辦」，仲有13款定食選擇，價錢都係由HK$260起，包沙律、茶碗蒸、麵豉湯同甜品，入門價錢就食到師傅手藝。
日本雲丹美國伊勢海老丼
好推薦KC 呢道首本名菜，美國波士頓龍蝦係即叫即煮，起肉後加埋北海道馬糞海膽、蟹柳絲、紫菜等，再混合北海道米「夢美人」同新潟米。食時只要拌入即拆龍蝦蝦膏、青芥茉同子薑就得。唔駛額外加太多花巧調味，反而更實在食到龍蝦鮮味同日本米獨有嘅煙韌同米香。
呢道龍蝦係師傅招牌菜，好推薦食呀！
一試師傅手藝 嚴選刺身定食
要知道師傳選材眼光同刀功造詣，食刺身就即刻知道。師傅仲特別附上經醃製嘅柚子同薑取代傳統子薑，味道更清爽。
午市嘅刺身定食都超級豐富！
晚市高級「廚師發辦」 3個價錢選擇
「藏」嘅晚市食材只用日本魚，以食材質素嚟講價錢實在唔昂貴，分別係HK$1,180、1,380同1,680，師傅會依據你嘅喜好同價錢，為你設計最啱食嘅日本料理。
晚市都有單點菜式
鮑魚伴肝醬
除咗「廚師發辦」，晚市亦可以單點沙律、前菜、燒物同主菜。前菜推薦「鮑魚伴肝醬」，係用日本或韓國乾鮑魚仔，配自製鮑魚肝醬撈烏冬食，有咬口之餘亦食出鮑魚肝醬獨有嘅鹹鮮。
鮑魚擺盤好精緻。
雜錦天婦羅
同場仲有天婦羅，漿薄鬆脆。除咗必有嘅日本花竹蝦同蔬菜，仲有北海道鮑魚！薄脆外層包著煙韌彈牙嘅鮑魚，雙重口感加埋一齊好正。
天婦羅睇得出炸漿好薄，係合格之上嘅作品。
必食本鯖大拖羅
食日本料理，拖羅可以話係必食。呢度嘅「本鯖大拖羅」嚟自九州或北海道，經炙燒後，用紫菜同紫蘇葉包著食，食到大拖羅嘅油香同時亦唔會太膩，平衝度做得啱啱好。
超級厚切嘅大拖羅，用紫菜包著食一流。
超多清酒揀 鎮店之寶「十四代」
我哋都知日本人好鍾意以酒會友，「藏」嘅清酒酒藏係由經驗豐富嘅唎酒師精心揀，好多係日本著名酒廠出品，鎮店之寶就有「十四代」嘅白雲去來純米大吟釀，入口有豐富果味，甜中帶微酸，係令人深刻嘅清酒。
店內酒藏極多，總會揀到一支鍾意嘅。
藏
地址：香港銅鑼灣謝斐道482號1樓
電話：3125 3133
營業時間：星期一至日 12:00pm – 2:30pm、6:00pm – 10:30pm