大家準備好心情迎接聖誕節未!? 係時候睇定邊度有CP值高嘅聖誕套餐啦。尖沙咀鬧市頂樓，有間岩里風餐廳酒吧“KABOOM”，最新聖誕套餐只需$768/人。最重要呢度環境超靚！大空間佔地兩層，加埋峇里度假風裝潢好Relax。
室內座位望維港海景 純樸海邊酒吧Vibe
下層係室內空間，落地玻璃可以飽覽維港靚景，悠和藤燈下攬住厚咕𠱸用餐，有種置身純樸海邊酒吧感覺，係一流嘅All-in-one Casual Dining好地方呀！
頂樓戶外座位 儼如尖沙咀空中花園
頂樓嘅戶外空間就放滿陽草傘、寬敞藤椅，配上芬蘭木材塑造滿滿外國氣氛，遠離繁囂。環境開揚可以欣賞維港海景，好啱閨蜜約會又或三五知己飲酒慢活。
秋冬坐戶外飲酒特別有Feel，而且唔使擔心落雨，因為“KABOOM”會喺雨天裝上臨時露營帳篷，反而有種去咗露營感覺，別有一番風味。
【聖誕套餐】
熱湯｜三椒蟹濃湯
冬天特別想飲啖暖湯先，今次個湯仲加咗三色胡椒、香茅、蟹膏感覺特別濃郁暖胃。飲嗰陣會食到啲蟹肉、蟲草花 、芹菜，加埋隻蟹鉗真係幾豐富。
前菜2選1｜
牡丹蝦他他配魚子醬
2道前菜選擇都好有海鮮風味～ 私心覺得牡丹蝦他他嘅鮮味會再重啲。將牡丹蝦他他連埋番紅花醃青口、最強泰式沾醬Nam Jim Jaew一齊食真係超濃郁。最後食埋件炸牡丹蝦，兩種風味食晒真心滿足。
真空慢煮鮑魚與帶子配海膽
想食鮑魚嘅話，呢道前菜就有澳洲鮑魚、北海道刺身帶子，連埋海膽、青辣椒香茅椰汁醬、青檸啫喱，有種清新嘅海鮮味幾特別。
主菜4選1｜
慢煮紐西蘭羊柳
低溫慢煮紐西蘭羊柳肉質好粉嫩，加埋香草外皮嘅脆口口感幾有層次。幾鍾意特別調配嘅青咖喱蠔油，令本身好有東南亞風嘅青咖喱多咗種熟悉嘅中式鹹甜香。配菜仲有炸蠔、脆薯仔，成個用餐體驗都好豐富。
波士頓龍蝦法式焗
將波士頓龍蝦鮮拆肉，再撈埋冬蔭蝦膏 、杏鮑菇一齊食，唔使自己拆肉食方便好多，特別係聖誕初次約會都唔使驚食到狼狽。另外呢道主菜會配埋藏紅花海鮮燉飯，燉飯口感Creamy綿密，有時又食到粒粒卜開嘅魚子，呢種奢華口感好啱聖誕氣氛。
西班牙伊比利亞帶骨豬扒
伊比利亞黑毛豬扒好大件，男仔食都好夠飽！同埋伊比利亞黑毛豬以橡果飼養，食落有種堅果香味。加埋松露肉汁嘅菌香，豬香、松露、肉汁加埋一齊，作為聖誕大餐主菜有Feel呀。
澳洲M6黑蛋白石和牛肉眼扒（加 $158）
如果你有聖誕一定要鋸扒嘅儀式感，加$158就可以升級。目測牛扒好大件，如果兩個人嗌個龍蝦、再嗌件牛扒Share已經好豐富。食嗰陣淋上天堂椒肉汁，和牛油香又再帶啲微辣椒香。
甜品｜聖誕樹
最後嘅甜品真係好有聖誕氣氛，用白朱古力開心果慕斯、士多啤梨啫喱、海綿蛋糕、朱古力撻、蛋白霜整咗聖誕樹、士的糖造型。“KABOOM”嘅峇里風+維港海景背景，拎住聖誕樹甜品影相真心靚。
【日常推介料理】酒店級主廚主理！東南亞風Fusion料理
呢度由酒店級主廚主理，平時嚟食嘅話一樣吸引。特別係主廚設計嘅一系列東南亞風fusion料理，香辣清爽風味好啱一邊食、一邊聽住輕快音樂望維港靚景。
【Small Bites for Sharing】
Menu有好多”Small Bites for Sharing”系列嘅佐酒小食，好似去咗Cocktail Party咁。
Chilli Salmon Cups | 辣味三文魚小杯
一啖一件嘅三文魚小杯，女生輕鬆食得有儀態啊。酥脆撻皮入面就有三文魚粒粒、香辣醬、紅蔥頭同清新青檸，輕辣風味同三文魚好夾。
Deep Sea Tacos | 深海墨西哥夾餅
脆脆粟米餅皮包住彈牙鮮蝦、清爽生菜、酸甜醃洋蔥等，加埋特製泰式醬汁，每啖都有豐富層次同口感。
Red Prawn and Scallop Carpaccio | 紅蝦帆立貝生魚片
好精緻嘅海鮮前菜，北海道帆立貝、紅蝦真係雙倍鮮味呀!! 配以特製泰式冬蔭醬，辣中帶酸更突出海鮮鮮味。
Yum Som-O Cajun Prawns Salad | 泰式鮮蝦柚子卡真大蝦沙律
唔想食太清淡嘅沙律，咁你一定要試呢個新推出嘅大蝦沙律！大廚將泰式沙律灑滿美國紐奧良地區嘅特有香料Cajun，有種獨特微辣。每隻大蝦都好彈牙，又有啲輕甜柚子平衡吓幾好食。
【Main】
“KABOOM”亦有多款主菜，絕對可以飲酒食嘢直落啊。
Baked Sambal Sous Vide Black Cod Fish | 叄巴醬烤真空低溫慢煮黑鱈魚
真空低溫煮法會令黑鱈魚產生美拉德反應(Maillard Reaction)，令魚肉有種複雜嘅香氣味道。本身魚油之上加埋微辣鹹香嘅叄巴醬、綿滑乳酪勁開胃，就算平時好少食魚都會愛上!!
Grilled Spanish Octopus Thick Egg Noodle with Pad Thai Crab Sauce | 燒西班牙八爪魚粗蛋麵配泰式蟹醬
完美融合地中海、東南亞風味嘅創意料理。主角西班牙八爪魚好大件，燒到又嫩又彈牙。湯底仲加咗香濃嘅泰式Pad Thai蟹醬，再用油浸大蒜、泰國羅勒、青胡椒粒等撞出層次，濃味控必食！
Thai Crispy Pata | 泰式脆皮豬手
德國鹹豬手就聽得多，大家有冇食過泰式豬手呢？ 餐廳用咗超大隻泰式豬手，外皮烤到金黃酥脆，飲啤酒必食!! 好鍾意佢配菜好多，醃蘿蔔、蘿蔔、西蘭花等……可以肉同肉之間解吓膩，啱晒一班人share。
Tom Yum Coconut Risotto with Hokkaido Scallops and Sea Urchin | 冬蔭椰子燉飯 配北海道帆立貝及海膽
泰國經典冬蔭風味x意大利燉飯，秋冬食真係好滿足。濃郁冬蔭醬同椰奶做基底，燉煮出酸辣飽滿飯粒，加埋北海道帆立貝、海膽好豐富。
【專業調酒師 | 即場調製合適你心情嘅專屬雞尾酒】
Damn Pissed Off!
充滿活力嘅雞尾酒，完美結合伏特加、熱情果醬同菠蘿汁，帶嚟清新嘅熱帶風味。呢款雞尾酒特點在於佢嘅生薑風味，有種獨特嘅辛辣感。
I Feel Loved
我談的那場戀愛...就像這杯Cocktail，集合了威士忌和荔枝酒，帶有玫瑰菊花甜香又清新，加點點酸酸的橙汁，甜的苦的酸的混合在一起，“This is exactly what it tastes like to be in love!”
IT's A Gossip Girl Time
青檸Vodka加咗苦瓜糖漿，呢種獨特風味真係無咩試過，仲有種清新醒神感覺。當然仲有柚子汁、金桔汁、青蘋果糖漿，增添酸爽果香。
Lets Get Cracking
呢款奢華雞尾酒，以伯爵茶威士忌結合朱古力Liqueur，帶嚟濃郁香味，同時夾雜阿華田、焦糖、燕麥奶嘅輕甜味道。相信女生都會好鍾意呢款雞尾酒
KABOOM
地址: 尖沙咀北京道12A號太子集團中心20樓
電話: 37088114