前排咁小機會同朋友食飯，餓咗咁耐堂食緊係想同朋友邊食邊傾計啦！第一時間即刻諗起食串燒，好懷念呢種微醺慢談時光。我自己最鍾意揀靚環境小店食串燒，有種日本居酒屋感覺～所以天后呢間「黑木亭居酒屋」一直On List。
岩手縣A4和牛主題 第2份和牛68折
超厚切和牛三文治
今次共有4道和牛菜式揀，只要Order 其中2款就可以享受優惠喇！當中最有驚喜嘅，不得不提呢道日本產A4吉列和牛三文治 (120g)，和牛厚度絕對稱得上誇張！我哋仲笑問老闆娘塊和牛遲啲會唔會薄咗㗎？老闆娘笑言「一樣係咁厚！有啲熟客見到和牛咁厚，仲講笑話戥我哋唔抵𠻹 (笑)」。小店另一引人入勝嘅地方，就係可以同老闆好似朋友咁傾計，特別有親切感同氣氛。
和牛極厚切，一咬即滲出油香，多士同海膽解膩恰到好處。
幸福感！海膽鵪鶉蛋和牛飯
丼飯鋪滿和牛，炙燒牛肉依然粉嫩燒得啱啱好，咬落軟嫩有肉味。最好味嘅食法，係先用筷子戳開半熟鵪鶉蛋，將蛋漿、海膽、和牛同飯撈勻，蛋漿同海膽嘅綿滑+軟嫩和牛，配埋微QQ口感嘅日本產久保田米，幾種口感混合真係好食到有幸福感㗎！
和牛輕輕炙燒，保留和牛油脂同肉香。
一試和牛最原始味道 和牛他他
和牛他他嘅和牛輕燒至一成熟，配埋極薄切刀功，最保留到和牛原始肉味同軟綿綿口感。食前先沾上自家調製洋蔥酸汁，微辣輕酸，好自然咁一片接一片食晒清碟。
和牛他他一食上癮，好快就清碟。
有油香．有咬口 板燒和牛扒
想享受實實在在嘅和牛扒，推薦板燒日本產和牛扒。師傅將和牛輕燒至5成熟，外香內嫩，切件上枱食落更輕鬆，一夾入口，同朋友Share 都方便得多。和牛扒另一吸引之處在於夠厚度，保留到油脂香之餘又有咀嚼樂趣，可以愈咬愈有肉香。
和牛扒切件上枱，方便同朋友Share。
店主開設呢間串燒店初衷，係感嘆坊間串燒店經常欠主食，食客只能無奈將串燒當作宵夜。所以呢度主打串燒之餘，仲引入多款和牛、海鮮。海鮮更會依時令定期更新，最近就輪到日本松葉蟹喇，即睇有咩食啦！
升級版蟹甲羅燒+海膽
蟹甲羅燒有蟹肉、鵪鶉蛋、蔥花，同時加入蟹味噌突顯蟹肉鮮甜味。上枱後可以自己將幾款食材撈勻，令鵪鶉蛋漿、蟹味噌綿綿包住蟹肉，再連埋日本馬糞海膽一齊放上麵包食，味道濃郁之餘，仲有香脆、Creamy兩種口感衝撃。
松葉蟹鉗配三文魚籽醬
蟹控一定要試呢道「松葉蟹鉗配三文魚籽醬」，作為蟹控都知松葉蟹鉗一向出名鮮味、蟹香突出，呢道菜就鋪滿松葉蟹蟹鉗，配上歐洲三文魚籽一齊食一絕。全因歐洲三文魚籽較細粒爽脆，味道亦比一般三文魚籽濃郁，同清甜蟹鉗配搭恰好平衡。
串燒新味覺 (蜜糖、麻辣、芝士、明太子、汁燒)
文初提到呢度係間串燒店，當然有超多款串燒揀啦！大廚根據食材特性加入蜜糖、麻辣、芝士、明太子、汁燒調味。個人最鍾意麻辣串燒，入口少少麻再有後續香辣，係會上癮嗰種辣～辣得啱啱好，佐酒一流。
串燒食材高質，豬頸肉、黑豚五花腩、牛舌、白鱔等都相當厚身，唔會燒得乾澀，入口仲有Juicy 肉汁；健康選擇就有銀杏、脆燒豆腐、鴛鴦翠玉瓜等，女仔想食得Fresh 啲都得。
(圖左至右、上至下) 雞翼(蜜糖)、黑豚五花腩串(麻辣)、厚切豬頸肉串(麻辣)、免治雞肉棒(芝士)(附生蛋黃)、厚燒牛舌(鹽燒)、白鱔(鹽燒)、黑豚荔枝卷(鹽燒)、銀杏、雞肉博多冬菇、脆燒豆腐、雞腿肉(明太子)、鴛鴦翠玉瓜(蒜蓉牛油芝士+明太子)。*若無寫明口味即為原味。
生日/週年/節日慶祝 甜品免費寫字
同朋友慶祝生日，餐廳幫手寫埋壽星名就更易製造驚喜啦！只要訂座時 或 用餐前通知餐廳就得。
提拉米雪糕(含酒精) 酒香雪糕+抹茶蕨餅
Tiramisu 口味雪糕配上煙韌抹茶蕨餅，仿如日本傳統甜點；卻又巧妙喺底部加入清酒，微微酒香配雪糕，又有種食緊Tiramisu 嘅奇妙感覺。
日本產雪糕配蒙布朗
簡簡單單嘅雪糕配蒙布朗，估唔到都有驚喜。日本雪糕比一般雪糕更清甜軟綿，口味亦係清爽解膩嘅海鹽／柚子選擇；蒙布朗則有栗子／抹茶揀，口感紮實、味道香濃，一啖蒙布朗再一啖雪糕好夾。
而家「黑木亭居酒屋」仲有多項優惠，即刻一表睇清！
1) 和牛第二份68折(全日適用) *優惠菜式包括日本產A4和牛他他、板燒日本產A4和牛、日本產和牛海膽丼、日本產A4吉列和牛三文治 2) 晚市優惠單點餐牌88折(飲品除外) 週日至週四(公眾假期及節日除外) 3) 指定清酒買一送一 4) 生日/週年/節日慶祝訂座，送即影即有心意卡及消費滿$1000送指定祝福語甜品1款 5) 串燒每日午市8折 |
黑木亭居酒屋
地址: 天后清風街10號清風大廈地舖
電話: 26606373