疫情前好多人都鍾意短飛台灣，甚至趁周末快閃。無他，台灣夜市掃街真係大滿足！想喺香港回味台灣夜市，唔只得鹽酥雞揀嘅，今次就有香港少見嘅台式夜市串燒！
將軍澳新開嘅「小野人」老闆，以前成日喺夜市掃街，對超多款式嘅台式串燒印象深刻，於是將呢種台式串燒帶嚟香港。而且串燒價錢相宜，好啱一次過Order 一堆串燒，員工會放滿燒烤保溫爐直接上枱，烤住食好有氣氛。
「小野人」主打台式串燒，環境典雅清新，坐得舒服好啱慢食。
落單後，店員會將串燒放滿烤爐上枱，烤住食好有氣氛。
自家人手製 台灣卷物串燒
其實台灣夜市有好多卷物串燒，將肉片捲住各種蔬菜，細細粒一啖入口爆出肉汁。口味多變，每間店都有自己特色，呢度招牌款就有香蔥豚肉捲、蘆筍牛五花捲、糯米椒牛五花捲。
鍾意香口啲嘅話，必試糯米椒牛五花捲。五花肉好有油香，包住嘅糯米椒微辣惹味，唔嗜辣都食到。
超豐富海鮮！美國即開生蠔都有
台灣串燒燒得香口，但唔會太辣太重口味，所以好夾海鮮。呢度嘅海鮮就有蒜蓉烤生蠔、清酒煮蛤蜊、蒜蓉粉絲烤扇貝、烤海蝦串同烤魷魚揀。
蒜蓉烤生蠔係用新鮮美國即開生蠔，加埋蒜蓉、牛油慢烤，一咬開爆汁又滲出牛油香。
蒜蓉粉絲烤扇貝就用日本扇貝，口感爽滑，蒜蓉亦逼得出貝味，一定要食埋吸滿海鮮精華嘅粉絲。
大滿足串串肉！
串燒一定要嗌肉串！烤肉特別香之餘，一串串拎起食都無咁膩。所以呢度肉串係5串、5串咁嗌，要咁樣食先爽㗎嘛(笑)。
烤小牛肉肉串係用紐西蘭牛肉，肉質軟嫩；大漠烤羊肉串則用澳洲羊肉，入口絕無羶味，唔嗜羊嘅都可以一試。
食串燒最啱肉控，可以一次過掃好多肉！
健康食串燒！蔬菜豆腐推介
呢度調味有台灣沙茶醬、泰汁、孜然粉3款選擇，可以自行邊食邊調味，就算Order 多款蔬菜豆腐都唔悶。值得一提嘅係，沙茶醬係自家多番調配試味而成，比一般沙茶醬更有層次㗎！而泰汁則用魚露、辣椒等調製，入口甜甜酸酸幾開胃。
值得一提嘅係，好驚喜有烤新鮮臭豆腐食！而且唔係一般不知名臭豆腐，係由香港著名臭豆腐供應商製作，連香港名食家都大讚。只因臭豆腐係純天然發酵，經燒烤後外香內嫩，口感Q彈，邊食邊滲出令人上癮嘅「臭味」。
個人最鍾意嘅蔬菜串燒就有墨西哥烤玉米、蒜蓉烤茄子等。墨西哥烤玉米灑上芝士粉、辣粉，再加埋沙律醬勁香濃；蒜蓉烤茄子則保留到茄子水份，入口爆汁有口感，多數留到後期先食解解膩。
好多人都鍾意食烤菠蘿，呢度嘅烤一口菠蘿更值得一試。因為係用台灣鳳梨，食落特別清甜細膩，加上少少甜椒粉吊味，就算最後食到好飽都忍唔住食咗幾件。
烤一口菠蘿用台灣鳳梨，特別清甜細膩。
台灣人大愛鴨血系列！
要講台灣人鍾意嘅嘢食，鴨血一定係其中之一。呢度就有烤嫩鴨血、麻辣鴨血兩款口味揀，烤嫩鴨血少見用竹簽串起，幾有新鮮感；麻辣口味則以辣湯浸煮入味，辣得過癮。
兩款鴨血都Q彈飽滿。
小野人
地址: 將軍澳澳南海岸唐俊街23號MONTEREY Place地下G25A號舖
電話: 28612862
