我最近唔可以食太多海鮮，但又好想食日本嘢🎌，上網搵到銅鑼灣有間日式料理店「芯」好似幾啱心水，於是就打電話訂定枱星期日晚食。小店座落於銅鑼灣廣場，平日好少行呢度，真係無乜為意佢開咗乜餐廳。店舖面積唔大，一眼睇晒，但佢選用咗高枱高櫈，以提升空間感，而且隔板將枱與枱之間分隔得好好，環境舒服😌。餐廳賣嘅食物種類包括壽司刺身、串燒、小食、鐵板燒同大阪燒等，對於唔食海鮮嘅人嚟講，選擇都算幾多👍。再者，佢定價合理，客人可以放心點餐。M6-7和牛西冷($238/150g)，🥩牛扒造型先聲奪人，超有霸氣，老實講我咁大個仔都係第一次見咁大塊金箔🤣。除咗樣靚之外，牛扒味道亦都唔錯，火喉控制得宜，無論色水定口感都係我哋要求嘅五成熟。西冷肉質軟稔，油脂分佈均勻，咬落多汁，牛味濃郁，簡單用鹽調味已經好食。麻辣五花片大阪燒($72)，而家唔係咁多餐廳有得食大阪燒，佢有得食之餘，仲提供多款口味。我要咗麻辣五花腩🐷，豚肉有好多片，辣度老少咸宜。大阪燒嘅粉漿同椰菜比例得宜，煎得香口，而且仲搭伴大量配料，如青蔥、芝麻、紫菜同蛋黃醬等，食落味道層次豐富。不過留意返，木魚片放置於枱面嘅瓶裡，要自行加配。唐揚雞胸軟骨($52)，雞軟骨外層炸得非常酥脆，炸衣唔會過厚，沾蜜糖芥末醬食一流🍯。由於係用上雞胸軟骨，所以形狀呈長方形，而胸位位置嘅軟骨較薄身，口感則更為爽脆🦴。朋友叫咗四粒壽司食吓🍣，包括炙燒左口魚裙邊壽司($23)、炙燒三文魚壽司($25)、牛油果三文魚壽司($28)同埋鰻魚壽司($27)。佢哋賣相整齊，大大粒，朋友話味道都OK，炙燒嗰兩款油香特別重，但略嫌壽司飯醋味唔夠，可以酸啲。總括嚟講，呢間小店幾高質，食物味道令人滿意🤤，服務亦都好貼心，例如店員們好好禮貌，上菜時會介紹菜式，亦不時主動為客人添茶🍵。喺手機落單嘅版面中，佢更設有個人化嘅選項，例如大阪燒可以走蔥或走醬等。最後，芯係支持香港人嘅良心小店💛，值得推介。…Read More
