網上見到中環萬宜大廈開咗間新嘅中菜館「⭐️星．68」，七月底前做緊堂食／外賣*68折優惠*，咁鬼抵就一於試下。餐廳入口原來喺停車場旁邊，即係斜路仔。餐廳環境寬闊，燈光明亮，客人自然坐得舒服😊。由於好耐無飲過茶、食過中菜，於是我哋就放縱一下🙈，叫咗個二人餐之餘，再另點其他食物。餐廳算係新派中菜館，創意款式同經典口味任君選擇！餐廳比較特別嘅地方係有同丸茶手作(我最愛嘅茶飲店)合作，即係我可以邊嘆珍珠奶茶、邊食點心🥤。除咗茶飲外，餐廳亦主打滋補燉湯，唔同日子有唔同款式以供選擇😁。68薈萃全盒($108)，六款點心包括鮮蝦餃皇、乾蒸牛肉燒賣、臘味煎蘿蔔糕、安蝦鹹水角、青蛙王子同金箔芝麻糕。論賣相無可能唔拎滿分掛💯？拼盤有四款鹹點同兩款甜點，其中🐸青蛙包最吸睛，餡就係豆沙餡，包皮都算鬆軟。另外，鹹水角係較傳統嘅點心，出奇地呢到嘅出品好出色🤤，外皮炸得好脆，但無油膩感，又夠大隻。乾蒸牛肉都唔錯，建議點喼汁食；蘿蔔糕就無乜特別。甜點芝麻糕類似芝麻卷嘅口感，味道濃郁，我唔鍾意食芝麻糊都覺得便幾好食。午市套餐(2位用$276)，套餐內容豐富，兼且十分抵食😍。其實齋食佢已經飽哂，不過我哋太為食無計。二小碟: 陳皮牛𦟌、醬香蘿蔔，兩款涼拌小食各有五件，份量啱啱好。其中一款本身應該係京式肴肉，但好似換咗做牛𦟌🐂，食落有啲啲辣；由於醃咗味，所以都唔確定佢係咪真係牛。至於醬香蘿蔔有啲其貌不揚，但又幾爽脆、幾開胃，唔太重口味。即日燉湯嘅款式係海星蘋果龍脷葉燉瘦肉，後尾先發現好似可以轉款，但而家都無損失，因為依款勁好飲😋。首先我相信餐廳係有將個燉湯去油，加上口味唔會過鹹，所以好清爽。第二燉湯好足料，有成隻海星仔同🍎蘋果，同埋大量好有嚼口嘅煲湯瘦肉。我勁鍾意哈哈。雙式點心: 鮮蝦餃皇、花菇燒賣，兩款皇牌點心、每款各二，簡直係完美組合，皆因點心係好食，但都好飽肚😆。蝦餃同燒賣均唔錯，大大粒無欺場，朋友話食落有傳統酒樓點心嘅風味，即帶點豬油香。鳳梨酸甜肉，呢個即係咕嚕肉，味道偏酸，啱配飯。咕嚕肉大小適中，無骨，可以一啖食哂。另外，伴菜有唔少三色椒同菠蘿🍍。原隻鮑魚花菇翡翠，兩隻鮑魚炆得入味，口感爽口得嚟唔會韌，幾正！下低墊住嘅仲有小棠菜同大花菇，同樣地亦係好夠味😛。海參沙葛叉燒粒炒飯，炒飯份量好多，每人分到唔止一碗囉！🍚炒飯好高質，每粒炒至乾身分明，仲好均勻地上哂色，粒粒都帶有豉油鹹香。我哋食得出叉燒粒同沙葛粒，但食嗰時就無為意有無海參。酥炸魷魚鬚($70)，我知道餐廳係隸屬鴻星集團，所以酥炸系列係必點項目。🦑炸魷魚鬚真係好鬼正，魷魚本身已經好食，加上佢嘅炸皮酥脆兼夠薄，食完唔會成口粉或者熱氣，果然無令我失望，推介。桑寄生蓮子芋圓茶($39/位)，我預咗唔會有西營盤老字號咁好味，但都比想像中好。桑寄生茶帶點甘味，唔會過甜；除咗有名稱所述嘅蓮子同芋圓外，亦都加入咗鵪鶉蛋作配料🥚。題外話，我亦都特別介紹番集團嘅名物，就係作為餐前小食嘅脆脆銀魚🐟，真係好惹味，去親工展會都要入貨！餐牌寫住如果叫特式茶飲，就可免茶水費(每人都成$12)，諗落嗌嘢飲仲有著數啵。我哋要咗凍奶蓋芋香奶茶($32)及凍極品鐵觀音($18)加桂花珍珠($6)同經典黑糖珍珠($6)。質素同平日飲開無異，飲品好飲、珍珠好食😙。不過食中餐點都要飲返杯熱茶至啱數，我哋要咗中菜館少見啲嘅格雷伯爵茶🍵，都幾清香。另外，仲有四季春同普洱茶揀。總括嚟講，成餐都令我哋喜出望外，皆因食物、環境同服務方面都好好。雖則佢嘅味道未稱得上好驚艷，但起碼樣樣都叫做有番咁上下水準，份量又多👍。最後亦係重點所在：而家做緊68折優惠真係好抵食，成枱食物埋單都只係四百蚊左右。…Read More
