Itamama (荃新天地2)

落雨濕濕，行唔成山，踩唔成單車，同老婆嘅最佳節目喺睇場戲，晌荃新天地二期嘅「英皇」睇完早場（平啲嘛），剛好夾到午飯時間，當然，食埋先返屋企。呢頭自從「海之戀」、「如心二期」嘅商場相繼開業，連帶幾個之前已有嘅商場就更旺，晌度真喺搵食無憂。單喺呢度「荃新二期」已有唔少食肆，啱啱落咗扶手電梯，就見到一家「Itamama」餐廳，感覺個名，望入去嘅環境都好面熟，原來喺「Itamomo」（意樂）嘅姊妹店，「意樂」本身我哋就幾鍾意，不時晌美孚店食早餐，所以，對呢間「Itamama」都幾有信心。 環境跟「意樂」真喺九乘幾似，一睇都喺工業風嘅裝修，，水泥地、鐵窗框、昏暗燈光、木枱木櫈，加上無乜修飾嘅天花，帶出一種粗獷原始味（呢段照抄自己以前「意樂」嘅食評，真喺完全啱用，哈哈）。  枱上除放咗餐具、少少調味料之外，仲擺咗支嚟自意大利嘅礦泉水（需付款），真喺想知，有幾多人會開嚟飲呢？ 午餐而言，選擇嘅種類都算多，雖然再次睇睇官網，就話過Itamomo就經營大眾化嘅意日融和菜，而Itamama則用上較高級嘅食材嚟做歐陸菜，不過，細閱話午餐餐牌一次，感覺Itamomo同Itamama賣嘅嘢好似差唔多。而揀任何主食，都奉送餐湯或飲品，亦提供啲升級嘅優惠。 野菌忌廉湯 老婆一向都鍾意飲湯多過飲嘢，所以，二選一之下佢就梗喺揀湯啦，加上野菌湯都好啱佢。個湯本身做得有水準，好有菌香，綿滑又唔會過杰。鮮蜆白酒煙肉蒜香天使麵 $63 老婆想食得清爽啲、輕盈啲，所以就試咗呢一款鮮蜆天使麵，佢話果然無揀錯，單喺賣相都感覺清爽，尤其加咗一塊檸檬角上面。而講到明喺鮮蜆，真喺無欺場，啲蜆又大隻，又鮮味，而天使麵煮得剛好，最怕煮過籠變得餬晒；而襯以煙肉、蒜蓉，添上白酒，再灑點檸汁，令天使麵變得味道更具層次，非常好食。龍蝦茄汁焗豬扒珍珠飯 $64 小弟喺「一哥焗豬」嘅粉絲，所以，間唔時都會試吓其他餐廳嘅焗豬扒飯，比較吓大家嘅差別。以整個煎鑊上枱，飯面鋪滿勁多芝士，烘焗得一片金黃，非常誘人。飯底又勁多龍蝦蕃茄汁，但蝦味就唔喺好覺，酸味比較重，不過，夾埋啲芝士，撈飯就自然喺一流，而豬扒唔喺一大塊厚切嗰啲，都喺裁成細細件，方便食，但就無咁有震撼感，然而，味道唔錯，好入味，卻喺比較乾身咗。 即磨咖啡食完碟濃味嘅焗飯，就嘆番杯香濃嘅即磨咖啡，晌「意樂」都覺得佢哋啲即磨咖啡好唔錯，所以，嚟到Itamama，對佢哋咖啡都有一定嘅信心。飲落確喺醇香濃厚，質素好穩定，喺個人覺得落奶多咗。  今餐午餐都算唔錯，餐後仲晌附近嘅商場兜個圈。附屬晌Itamama隔離仲有間Mama Bakery，我哋都順便買咗件芝士蛋糕返屋企做下午茶，晌另一篇食評再分享！…Read More