，讚呀！當然快快手，要捷足先登啦。而個5折優惠仲要喺無乜條件限制，所以，趁上個星期六港鐵「回水」又有優惠就一於港島遊，趕及有優惠嚟食個午餐先。唯可惜只做到5月16日，小弟篇文出得街時，都應該過咗呢個優惠期。不過，再留意啲細字時，仲會做個7折優惠，去到5月尾，想食平啲就趁快把握機會喇
。因為都擔心會好多人，所以，避一避午市嘅最尖峰時間，晏多少少嚟，由於茶記始終都快上快落，等位唔耐。雖然，餐廳以「冰室」為名，但就無大玩懷舊元素，裝修正正經經，四四正正咁，唯一保持茶記特色就喺夠逼，枱櫈編排喺用盡餐廳每一吋地方。食物選項，就一大張餐牌印晌枱上，早餐、常餐、下午茶餐、星馬咖喱、焗飯、喇沙、亞洲風味、燒味、三文治、小食、飲品、特飲……等等，一眼睇晒，就連甜品都有。因為怕玻璃反光，影得唔太清楚，臨走時見佢哋已印備外賣單張，所以，索性掃描出嚟俾大家多個參考
。除幾款乜餐物餐之外，所有食物都喺散點，不過，就有飲品加配優惠，定價都幾吸引，熱飲+$6、凍飲+$9、特飲+$12、細肉骨茶+$20，加上又有5折呢！簡簡單單點咗一客星馬咖喱、一客喇沙，而飲品有加配優惠就點兩杯特飲，平時小弟都好少貼張單出嚟，但今次堅喺5折，埋單都只喺$75，抵過快餐店啦，故當日都保持住少少人龍晌門口。由於試業關係，唔單止菜式未能全部都有供應到，甚至暫時需要使用外賣餐具頂住人流。
星馬咖喱吉列厚切豬扒配香蘭飯 $58
用上竹葉紋嘅瓷碟，非常有馬來風，早前晌「元朗冰室」所食嘅厚豬扒就有啲失望，今之呢塊就厚身好多，仲做埋吉列，咬落去嗰下咔咔聲，超脆口，而豬扒軟腍鬆化；至於個咖喱調校得唔錯，但個人感覺就有啲似港式咖喱，唔多夠椰奶香咁，仲有，餐牌寫明喺配香蘭飯，唔知喺咪試業關係未準備好，抑或太多客應付唔切，食完晒都喺覺得似喺白飯多啲，唔喺太覺有椰子及班蘭嘅香味。馳名海南雞叻沙 $68相對個飯，呢個喇沙好食喎，先講個湯底，濃濃香香嘅椰汁咖喱湯底，做得唔失禮，口感又夠厚身，香味有層次，而麵底用咗傳統嘅「摻摻」，即喺米粉溝油麵，口感獨特；海南雞亦用料不賴，雞肉去晒骨，皮下脂肪少，所以，入口雞皮爽滑不膩，雞肉有肉味又嫩滑，配料仲有啲魚片、豆卜同銀芽。紅豆冰 +$12（正價$22）好耐無飲紅豆冰，見優惠價再加半價，唔試唔得。個奶水幾香，啲紅豆煲得夠腍，又清甜，食住個星馬咖喱，一口紅豆冰，不知幾爽。龍眼冰 +$12（正價$24）睇見沉啡色嘅龍眼就知對辦，喺用上龍眼乾，唔喺透明白色嘅罐頭貨，甜味自然更清潤。雖然嗌咗少冰，不過，都仲喺好多冰。試業，再加上5折優惠，一下子好多人湧嚟幫襯，唔多唔少對店裡嘅運作，及食物嘅水準，均有一定嘅影響。希望佢哋過咗試業期，慢慢摸熟啲嘢，運作漸上軌道。…Read More
