以為呢間豆乳狂人淨係賣豆漿，但係原來都有好多豆製品和小食，一於外賣回家同家人一起分享。揀咗支特濃可可豆乳試吓，感覺好似飲緊朱古力奶，好唔錯呢！然後店員又推介新產品「鮮奶布丁黑豆漿」，個樣係黑白兩色幾有趣，所以又試埋啦，呢個要用粗飲管飲，鮮奶布丁非常之滑，加上黑豆漿好香嘅豆味，配搭得好好呀！雖然佢都有比黑糖糖漿我自己倒入去，可以自己控制甜度，但係我覺得本身嘅甜度都已經足夠。小食就叫咗雞軟骨同埋啲粢飯，我家小鬼最鍾意食雞軟骨，試過唔同地方買俾佢，佢真係會覺得有分別，而呢間佢都讚好食，確實係大大粒份量多，而且炸得好酥脆，加埋少少椒鹽味，好惹味吸引，轉眼已經被搶食無晒🤣🤣粢飯很大舊，裏面有油炸鬼、榨菜、肉鬆、芝麻。飯的份量比較多，加咗芝麻令到粢飯比較香口，同其他材料的味道好夾。另外買咗幾碗甜品，包括三色芋圓，可自選三款材料配搭，我揀咗手工黑糖、西米、涼粉，涼粉爽口、西米彈牙、芋圓有咬口，加埋個豆漿底，都好好味。手工豆花都有十二款，由於太鍾意黑糖，所以揀咗黑糖珍珠豆花和黑糖桃膠豆花，兩碗都非常足料，黑糖珍珠夠晒煙韌，桃膠就大大粒又滋潤，豆腐花全部都好滑，做得好好。還有一杯奶蓋豆乳布丁燒仙草（ $30 ），估唔到呢度都有奶蓋飲，佢係豆味芝士奶蓋加台式仙草加豆乳布丁加手工黃豆粉，好味呀！燒仙草雖然同涼粉個樣有啲似，不過滑啲，冇涼粉咁爽，相比之下我鍾意燒仙草呢！…Read More
