靚靚 不一樣的車仔麵

食車仔麵最緊要係配料選擇多，湯底天然冇味精。尼間餐廳除左售賣香港地道街頭小食外，仲可以堂食車仔麵及小食。而且餐廳強調冇味精，要食食物既原味。晚市6點左右到，已經好多人食緊大大碗車仔麵。叫左黑松露羽一拉麵($26)，酒槽豆腐($13)，墨魚前餅($18)。另一碗叫左韓國純紅薯粉($20)，配瑤柱清湯，黑毛豬叉燒($26)，奇異果龍珠甜酸齋($12)。熱雪耳紅棗茶($11)，熱腐竹薏米豆漿($11)。入到餐廳侍應即刻俾紙落order，配料選擇花多眼亂，仲有唔少招牌小食。拉麵爽口冇煮過軟，而且一上枱就聞到好香既黑松露味。仲有一塊紅紅地既炸片，幾得意。薯粉份量超多，湯底揀左瑤柱，味道濃郁，一d都唔油膩，清甜好飲。如果食得辣既話，薯粉吸哂辣湯會更好味。小食另上，可以同朋友share食。黑毛豬叉燒肉質結實，而且仲帶有少少軟軟地既骨(?)，口感豐富。加上燒得入味，蜜汁夠，一流。墨魚煎餅外皮脆，而且食到粒粒墨魚肉，淋上豉油，就咁食到已經好好味。尼款奇異果龍珠甜酸齋比較少見，除左有酸齋，仲有幾粒爆爆珠。甜酸齋有大約7件，入味，唔會過酸，而且就算食齋人士都可以叫。爆爆珠係奇異果味，爆開之後，同酸齋一齊食，出奇地夾。第1次見餐廳有酒槽豆腐，亦係第1次食。味道有d似南乳(?)，好重酒味。而且豆腐炸過，但食完都唔覺油膩，而且份量多，值得叫黎食。飲品選擇除左平時飲既之外，仲有幾種自製養生飲品，好岩女性。腐竹已經煮到溶哂，陣陣大豆香味，而且仲有好多薏米，唔會過甜，足料。而紅棗雪耳茶就非常岩女士飲，既有雪耳食，紅棗味濃，難得係車仔麵鋪飲到健康飲品。整體，食完之後，完全唔覺得鹹或者口乾，相信冇味精。而且自家製既小食非常獨有，迎合唔同人既口味。每樣特製小食都感覺都落功夫製作。…Read More

最近愛上左食平靚正嘅車仔麵，已經係第二次幫襯靚靚:)今次都係叫反上次食過覺得唔錯嘅黑毛豬叉燒同土匪雞球，肉質夠滑都好入味，屬於我每次黎嘅必叫菜式而依度嘅麻辣湯底水準都幾高，不過我就略嫌米線偏腍，唔夠咬口，朋友叫嘅紅薯粉夠咬口所以好食啲，下次黎會記得叫紅薯粉至於令我最失望嘅就係佢個正所謂「分子料理」店家似乎覺得樣樣野加堆泡落去就叫「分子料理」，未免太過取巧正如個柚子分子蛋，根本就係一隻温泉蛋再加一堆柚子味嘅白泡落去，賣相同味道都麻麻，咁就收十幾蚊一隻蛋真係有啲俾人呃嘅感覺至於個分子泡沫魚露雞其實只係加一堆無咩味嘅泡響啲雞上面，好彩啲雞都幾好食，但成件事唔太夾，根本唔算係分子料理，令我有啲失望，而且價錢又唔平，又令我好似俾人呃咁總括黎講，傳統嘅餸幾好食，不過「分子料理」就應該改過另一個名，免得俾人取巧誇張嘅感覺…Read More

因為上次食過平價分子料理，所以就再次去品嘗一次分子料理同未食過嘅餸。俾大家睇睇個餐牌先，都好多選擇嫁。黑魚子醬提子包（$16）賣相依然粉嫩粉嫩的，好吸引！手機食先，甜甜嘅提子汁遇上鹹鹹嘅黑魚子，又甜又鹹！友人同我都覺得好有趣，好有創意，希望餐廳可以推出更多創意菜色。紅燒花膠扒（$18）係有豐富骨膠原嘅花膠喔，十幾廿蚊就有得食啦！味道不錯，又好入味，花膠質感好柔軟。花膠大約有3片到啦黑毛豬叉燒（$26）黑毛豬肉質偏硬較瘦，應該選擇半肥瘦叉燒會更好，不過叉燒的蜜蜂味濃郁，這點要加分！九轉大腸（$16）大腸用了新式醃製方法，味道較特別！凍腐竹薏米豆漿（$11）熱山渣洛神花茶（$8）兩款味道都較淡嘅飲品，相對之下我更喜歡豆漿喔店員好nice好熱情，又會主動同我地推介特色分子料理，充滿人情味！地方雖小，但五臟俱全，十分整潔。店員做事有效率又主動，要讚！…Read More

車仔麵店一定是頹食？此等觀念實在是太落後了。為求格新，草根得知這間位於尖沙咀的「靚靚不一樣的車仔麵」推出了一系列的分子料理食品。於Ig看到其中一款主打新品黑魚子醬提子包外型十分吸引草根姐妹便相約一同前往尋覓平民分子料理。星期六7時到達，餐廳幾乎全部滿座，當中不少是餐廳熟客，亦不乏來自中國大陸的遊客。雖然店員姨姨很快安排入座，但座位較狹窄，即使坐四人卡座都不太舒適。但不要緊，只要可以嚐到美食，這些小事我們都能忍受店員為我們遞上足足有兩頁全滿的點餐紙，選擇多得令人驚訝呢！首先必點的當然是新推出的分子料理系列。初榨魚露雞（$16）這個是新推出的菜式，最上層是泡泡，撥開泡泡後可以看到下層的魚露雞，雞件應該先經油炸後再加上魚露調味。一客有約4件雞，炸雞肉質頗嫰但味道較鹹。分子料理部分應該是指上面的帶鹹味的泡泡，但其實對味道的作用不大，說是分子料理似乎有點牽強呢。黑魚子醬提子包（$16）另一個店員姨姨極力推薦的新菜式賣相的確十分吸睛，可算是當晚的重點$16一件不便宜呢！不過外表的確十分吸引，極像一顆晶瑩的提子。外層的薄膜包著大量提子汁，一口咬破後，提子汁的甜味馬上湧入口腔，接著黑魚子的鹹味亦緊隨其後地湧現，兩鼓味道帶來有趣的衝擊，的確有新意！味道其實也不錯，值得一試！聽說還會推出兩款新口味呢！黑松露阿布素意大利麵（$23）不竟今次到訪的是車仔麵店，還是要點上一碗麵食才不枉此行。發現靚靚這間港式車仔麵店竟然可以揀選意大利麵，有趣！湯底也可以從五款中自選一款，草根選了黑松露湯底。意大利麵煮得剛剛好，麵條不會煮得過火，保持應有的口感，做得比不少西餐廳更好黑松露雖然只有上面一小匙的份量，但味道濃郁，不錯由於餐廳餸菜的選擇實在太多，為了多試幾款餸，所以點了一碗淨餸車仔麵及幾款小食。選擇雖多，但味道與一般車仔麵出品相若，讓我們點評一下比較特色的小食吧!紅燒花膠扒 ($18): 車仔麵店竟然有得選擇花膠份量還算不少，質感滑溜，味道不錯!鹿兒島豬軟骨（$16）:份量不少，豬軟骨有大約6-7件，每件的體積都很大很多肉。幸好肉質煮得軟腍入味，充滿膠質。同時，還伴有紅蘿蔔，醬汁有點像紅酒炆牛尾的味道，好吃無誤！黑毛豬叉燒 ($26/1串): 草根勁中意食叉燒。這碟是2串份量，重蜜糖味，可惜部份叉燒肉質較硬，不知是否一時失手，整體沒有之前大家的評論般好。九轉大腸 ($16): 草根不吃內臟，不過同行的父母說味道還算不錯。金菇菜（$8)紫菜 ($9)牛筋腩 ($17)：份量很多，有筋有肉，肉質軟腍，味道濃郁，好好吃高級墨魚丸 ($12/3粒): 只有3粒感覺貴了點，而且不特別好吃。金蒜肉腸 ($12): 就是平日小食店的台灣腸，重口味之選。鮮蝦雲吞（$14/3粒): 味道一般，餡料太少。:(到最後當然要點上餐飲了，叫一碗麵食送餐飲一杯，草根姐姐選了熱山渣洛神花茶，味道不錯。在場很多食客都點選這款飲料呢，看來是餐廳的得意之作。家人也各自點了一款飲料。凍腐竹薏米豆漿（$22）草根妹妹最愛豆漿，可惜此處的味道豆漿偏淡，失望啊。凍山渣洛神花茶 ($22)凍洛神花茶好淡味，反而叫了杯熱的好飲多了，帶點酸味很開胃。餐廳在旺區尖沙咀，加上附近有不少酒店，故人流不絕。為免有其他食客久侯，草根用完餐後也沖沖離開。食物整體不過不失，不過勝在選擇多，店內同時提供街邊小吃、車仔麵及各式小食。新出的分子料理以黑魚子醬提子包最為驚喜，這一餐我們一行4人吃了$392，想不到吃車仔麵都不便宜呢!…Read More

近幾日天氣悶熱得淒涼，媽子每天都計劃到不同地方嘆冷氣順便打發日晨，這天她說來免費入場既歷史博物館，那我就陪她在附近吃午飯再上班去。這個車仔面檔在科學館傍的文華中心，都算長的日子，選這裡是打算平平地食個豐富午餐，和有超強勁既冷氣（媽子首要要求）。甫一坐下就看到牆上的海報，未食過分子料理既媽子，要用好一段說話先解釋到個概念佢聽，叫了份給她，這個水滴形既一咬開就爆出啫哩狀提子味，面頭既咸鮮味魚子醬配上甜既提子，味道她對我太新鮮，媽子就話她搞鬼，$16，平民價，一試又無妨既，不過可以最後食，當甜品。呢份又係分子之作喎～雞肉面頭既泡泡係用魚露整出，如果參考洗面起泡快速滲透既原理，魚露味的確係入哂雞肉度，當然我唔知有無腌好先，但淨食泡泡食唔出魚露味，反而下底既雞肉好滑好香，幾好食。黑毛豬叉燒，蜜汁味好重好入味，廚房細細都整到呢個效果算不錯，但叉燒唔算特別腍，媽子就話再切細舊D就好喇。問媽子成檯最中意邊樣，佢話係呢個豬軟骨，又係既，炆到超腍身，個汁又甜又香，肥既位都好似炆到半溶，撈飯既話一定好食。個名令我諗起套電視劇，走左油既茄子塊好靚呀，脆身唔會話腍一腍，食落既肉都入左味唔會青，上面再撒上香料令食落再香D。口水雞，冷盤黎講肉質唔錯，但口水味就未夠入味，其實出面既醬油係好食架，可以入味少少就好唔會話似分開左兩樣野；後面既墨魚餅，薄薄地煎得好香，撈左甜豉油有少少咸，口味稍稍偏重。叫一碗白菜中和下肉食，店員叫我地揀湯底，清湯呀沙爹呀⋯媽子就話加$5試試黑松露湯底，想像唔到，原來係清湯加黑松露醬，細細pat，咁大碗湯好快就無左佢個影，但浸一陣，食菜既時候又真係食到個香既，都幾得意，好彩個湯本身唔咸。8樣菜既車仔麵其實真係豪華版，有幾可會叫8樣送，見係兩個人Share就無所謂啦，碗麵似係油麵質地，麵底都幾大，再加紅腸/豬紅/酸齋/白菜/豬皮/雞翼/蘿蔔/魚蛋⋯都真係豐富既。呢度冷熱野飲都幾多選擇，唔使一味只係飲檸茶汽水，幾蚊雞大大杯其實都抵，打卡仲有得送添。其實係尖東黎講唔算貴既，當然啦如果同街坊檔車仔麵$5 $6一個配菜比，咁梗係無得比，但佢既配菜有平有貴，貴少少既十幾蚊一份其實可以同人Share，當叫下迷你小菜都幾開心呀。呢度樓面既阿姐都好開朗mode，雖然係午市都幾忙，但都唔會催你食快D，可以坐到食完自己起身埋單走。…Read More

同八姨打完牌都已經成9點，於是就順個便去搵阿囡食埋宵夜先返歸~為求快d食完返屋企睇妙手仁心，所以就去左阿囡夜校附近既小食店食少少就算坐低後我就叫左碗“酸辣雞中翼油麵”，湯底酸酸辣辣好開胃，食完碗麺成個人精神曬，雞中翼好大隻，肉多！麺嘅韌度好好。阿囡就叫左幾樣小食，當中既黑毛豬叉燒確係堅好食！甜甜地既叉燒汁，爽彈既質感，味道甜中帶點炭燒般的香，很是滋味～而“紅燒花膠扒”就軟淋淋，紅燒汁味道好正，荷蘭豆好爽甜，口感嫩滑多汁又入味另外我都好鐘意既就係呢隻“黑松露煎蛋”，煎得微香的邊皮及半生熟既狀況就係我既最愛，加上真係有黑松露係蛋上，食時整個口腔都滲滿濃濃的黑松露香，確是好味！咁上下我同阿囡亦叫左杯“凍百合蓮子薏米茶”，飲到底底嘅時候可以見到好多蓮子、百合、薏米，味道鮮甜食左肉後就食返少少菜先無咁大罪惡感所以仲叫埋腐乳通菜，通菜同腐乳喺分兩邊擺，睇個人口味要撈幾多，腐乳味好香好濃，同通菜真係好match！…Read More

想吃地道的香港菜，第一時間想到的，是久違的車仔麵。友人推介不一樣的車仔麵，有何特別之處？新文華中心食肆選擇甚多，但這間車仔麵也一直接近滿座。幸好，人流轉動快，一出一入，未至於要等位。看看餐牌，果然不一樣。先是湯底，以沒有味精作招徠。除了必有的麵類，還有紅薯粉、意大利麵和飯。配料選擇非常多，而且有特色，例如九轉大腸、酒糟韓梨醬滷肉、花膠扒等。飲品亦特別，是日奉送的山楂洛祌花，雪耳紅棗杏仁茶、腐竹薏米豆漿等。菜式夠特別，難怪大部份都是分開上，加上樣樣都想試，結果把桌子放得滿滿的。山楂洛神花茶／百合蓮子薏米茶花茶偏甜，蓋過洛神花開胃的酸。另一杯微甜，加幾粒浸過糖水的蓮子，就剛好。飲到最後有不少薏米，稍有咬口。沙嗲湯底／韓國純紅薯粉／沙茶豬皮／芹香蘿蔔湯底不淡，但又不算很濃，不及普通沙嗲湯般入味，或者是沒有味精的取捨。紅薯粉滑溜溜，帶點韌，口感不錯。蘿蔔少甜，多汁但炆得不夠腍，也沒有芹香。豬皮不夠爽。瑤柱清湯底／米粉／金菇菜／紫菜／白菜仔喜歡米粉不太腍，乾爽，一條一條的口感。一大啖金菇放入口，滑又彈，咬下去聲音清脆。紫菜吸滿清湯，白菜仔則煮得剛好，很爽口。麵的份量很夠。麻辣咖喱魚蛋魚蛋爽又彈。雖然上面有不少醬，但沒有辣，也沒有麻。即使上了色，亦欠咖喱味。鹿兒島豬軟骨豬軟骨配甜麵豉醬，很入味。肉質不嚡不韌，軟骨爽硬，慢慢咀嚼是一種樂趣。黑毛豬叉燒始終喜歡傳統叉燒肉質的咬口，但黑毛豬亦有其可取之處。都是瘦肉，卻有半肥瘦叉燒的腍，是黑毛豬的特色。表面有點焦，不過沒有燒過的香。肉很入味，蜜糖味偏甜，對嗜甜的我來說，調味不俗。麻芥青蓮藕蓮藕超爽口，也有清新的蓮藕香。炸過也不油膩。沒想到麻芥是日式芝麻醬，但跟炸蓮藕又幾夾。青椒皮蛋皮蛋一開四，表面軟彈，沒有流心，但有軟心，都幾香。青椒切碎，加辣椒和薑等，鋪在表面作調味。少少辣，幾惹味，又有青椒的清新。無添加味精，加上感覺少油少調味，似乎很健康。未至於驚善的美味，但總算不過不失，起碼夠特別，有新鮮感。吃車仔麵對服務不會抱期望，但在繁忙的午市時間，店員的服務出奇地佳，態度很好。…Read More

車仔麵，又稱嗱渣麵，香港地道飲食文化核心之一，相信大部分人都不會反對吧？！車仔麵的由來，應該是以前的熟食小販在街頭推着木頭車，販賣著熱辣辣的湯麵而得名的，當時佐麵的餸菜不外乎牛腩碎、豬皮、豬紅、齋、魚蛋及青菜，任君配搭，價錢亦相宜，所以成為學生或打工仔的日常美食選擇之一。隨着時代的變遷，以前街頭巷尾的熟食小販已被法例所禁止，而大多數已入舖繼續經營，麵食餸菜也變得多元化，汰弱留强下亦有很多已打出名堂，如西灣河的超級無敵多餸，銅鑼灣的勁辣醬，灣仔的原味靚湯等，而最近有一位在尖沙咀一帶搵食的朋友就介紹筆者試了一間不一樣的嗱渣麵。這間車仔麵位處近尖東一帶，是去紅隧口搭隧巴的必經之路，但平時筆者經過多數只是篤串魚蛋，食串燒賣，還記得以前最喜歡食那裡的鹵水生腸，生腸串得密密麻麻份量頗多，放入鹵水汁略略淥一下才端上來，熱熱的爽脆入味！但就從未試過入內食車仔麵，想不到今次反而是由朋友帶路來獻出第一次......店内環境較狹窄，座位亦不算多，但尚算整潔，比起一般的地道街坊車仔檔已好多了，打開餐牌望望，真的讓筆者大開眼界，點餸紙足有四十多款餸菜，除了一般的魚蛋豬皮外，想不到連花膠扒、姬松茸、海南雞、豬軟骨、黑毛豬叉燒和黑松露煎蛋都有得揀，全部十多元有交易，就連麵食也有多達十款選擇，湯底亦有六款之多，不看環境還會以為去了什麼大餐廳用饍，筆者見到這麼多誘惑，價錢又不太高，劃下劃下不知不覺點到成枱都是餸，自己也覺誇張尷尬，唯有盡力吃清不浪費啦。餸菜一一的端上來，筆者很欣賞店家的貼心，車仔餸大部分都是以小碟分開上枱，不會大雜燴般全放在湯麵中，讓客人能嚐到每樣菜式的真味。紅燒花膠扒，花膠扒剪成3件上碟，大大塊很有睇頭，咬落煙韌入味 ，膠質滿滿，$18件實在是超值，食完很有幸福感。 黑松露煎蛋，煎得圓圓半熟的太陽蛋放上黑松露醬，雖然做法簡單，口感卻異常嫩滑，黑松露醬份量頗足，那獨特的香氣撞上蛋黃的濃厚，滿腔馥郁，實在是最佳配搭。黑毛豬叉燒，外觀燒得焦香，雖不是傳統的半肥瘦模樣，望落肉質有點偏瘦，但其實入口肉汁充盈，肉味香濃，口感鬆化，甜蜜入味，很有驚喜。鹿兒島豬軟骨，豬軟骨炆得軟腍入味，咬落感覺入口即溶，醬汁帶點果香很濃郁，少許酸甜的味道幫助減去了點點油膩感，好味。九轉大腸，做法頗複雜的一道功夫菜，大腸一層一層穿起，經水煮熟油炸至乾身，最後調味炆至軟身，而這店做的算是簡化版，口感沒有傳统的煙韌實在，但勝在調味巧手，入口沒有羶味，醬香濃厚， 仍算不錯。墨魚煎餅質感QQ， 墨魚味香濃，脆香可口，但略欠彈牙口感。海南切雞，份量不少，皮爽鮮香，略欠軟滑，但配上酸辣醬汁仍相當惹味，性價比高。串炸豬大腸經滷過炸脆，皮酥香口，唯略欠脂香。口水雞中翼，麻辣醬濃中帶甜，灑上芝麻後入口麻辣爽香，味道不錯。九轉茄子肉，蒸軟了的茄子拌上自家調製醬汁，濃中有清。汁燒姬松茸，鮮味十足，爽脆軟滑。 提到車仔麵，又怎可不介紹一下麵食呢，筆者點了外邊麵檔少有的極品手打烏冬，想不到一點都不是交行貨，烏冬入口軟滑彈牙，配上牛腩汁湯，惹味濃香，確是粗幼麵河粉外的另一好選擇。想不到在這店吃車仔麵，竟帶來如此意想不到的驚喜，在街頭麵食中加入了高檔食材的新元素，收費亦十分合理，而小店更特別地表明絶不使用味精，只求食物原味，作為對食客的承諾，可見店主除了大膽創新外，還有那份對食物質素的執著，如此有誠意的車仔麵小店，難怪能在尖東這競爭激烈的地段屹立這麼多個年頭，朋友仔這次的好介紹，果然真是不一樣啊！…Read More