星期六同呀媽去駱駝漆行街，順便食午餐。佢話想食心點(小新叫法🤣)，於是我上網就搵咗「皇廷工房點心專門店」同佢食。其實我之前喺觀塘行嚟行去經過餐廳幾次，但次次都閂咗門。因為佢主要做返工日子同早午市🕜，不過原來夜晚時間或者星期日都可以預先包場搞Party🥳。餐廳當然主打點心🥢，不過亦都有麵食🍜。午市套餐相對抵食，$54有一點心加一飯/麵同飲品，啱哂打工仔。點心紙就係枱面張餐紙，想食乜可以就咁同店員落單，或寫上張套餐紙度✍🏻。題外話，餐廳唔收加一服務費。雞肉雲吞米線(原價$34)，米線份量唔算多，不過都已經夠飽。米線軟硬度適中，湯底清淡，同時亦落咗唔少粟米粒🌽同有半隻蛋。雞肉雲吞有五隻，🥟雞肉做餡比起豬肉結實，而且中間仲落咗雪耳絲，爽爽的。鵪鶉蛋燒賣(原價$26)，呢樣咁傳統嘅點心唔係好多地方有得食，加咗🥚鵪鶉蛋口感好得意。不過燒賣餡好似變咗係魚肉🐟？皇廷蝦餃皇($26)，🦐蝦餃王一客有三大隻，餃皮厚薄均勻，唔韌亦唔易穿，而蝦肉就好彈牙。蟹子燒賣皇($24)，燒賣亦同樣有三粒，每粒上面加咗啲蟹籽，而下面嘅豬肉無肥膏，抵讚👍。香芋蒸排骨($26)，排骨幾入味🤤，係個別兩粒肥膏就多咗啲，而墊底嘅芋頭亦好香甜。鮮蝦腐皮卷($28)，腐皮卷炸得有啲油😳，但外皮非常脆口，餡亦飽滿，唔錯。韭黃鮮蝦腸粉($32)，鮮蝦腸粉有三條，係飽肚之選，可惜有韭黃令到我食得無咁暢快🙈。茶介每人$5，一盅兩件當然唔少得熱茶啦🍵。總括嚟講，呢餐點心午餐好豐富，飽到夜晚都唔使食😚。餐廳環境幾大，而且四四正正，真係適合一班人包場聚餐。最後，店員姐姐嘅服務態度亦都幾好，醒目有禮。…Read More
