屋企附近商場的大大小小餐廳，直覺上值得一試的都已經幫襯過，直至最近一個新商場開業，終於又有一批新餐廳可以選擇了。今晚就揀了「深井陳記燒鵝」。講起深井燒鵝，筆者本人最喜歡「裕記」，而「裕記」也一定一直堅持不開設任何分店，實在十分難得。相反另一間競爭對手「陳記」十多年前開始已衝出深井，在港九各處陸續開設多間分店，連同深井的一系列幾間燒鵝酒家，今時今日加起來已經超過10間分店，只不過估唔到會在將軍澳插旗。唔知點解，每逢星期三及星期四，將軍澳區商場內的餐廳特別少人幫襯，去到「陳記」只不過大約八點，竟然大把座位任揀。室內裝修環境十分企理，有別於其他的燒味茶餐廳，甚至可以用雅緻去形容。始終餐廳以燒味為主打，餐牌內的小菜款式已經不算少了，但晚飯時段的所有小菜竟然只可以單點，並沒有包含白飯及飲品的套餐選擇，實在有點說不過去。來到「陳記」，一定要叫番碟陳記燒鵝飯（$56）。這些名氣大的燒鵝專門店，又或者是「太興」這類大型連鎖燒味餐廳，容許客人選擇鵝胸或者鵝背而不需要另外加錢，因為總會有些客人喜歡啜骨頭；反之一些個體經營的街坊燒臘店，就肯定不容許指定部位，皆因銷量並不太大，很容易賣剩鵝背，晚晚虧本。果然沒有欺騙客人，每一件都是鵝胸肉。肉質夠軟腍，鵝皮都夠鬆化；只可惜稍為缺乏鵝脂的膻香，未臻完美。至於那一碟酸梅醬卻出奇地十分美味。有別於其他燒味餐廳的味道，這一碟酸梅醬較稀身，而且帶有淡淡的柚子清甜，與酸梅味非常合襯。XO醬四季豆炒豬頸肉（$70）望落去幾吸引，侍應剛剛送上來的時候更加是香味四溢。先食一條四季豆，雖然味道不錯，但炒得太過濕身、唔夠香口，同自己喺屋企炒的質素差不多。再食一塊豬頸肉，肉質太軟太腍，缺乏了新鮮豬頸肉應該有的爽口中帶少少彈牙的咀嚼質感；而且舌頭感覺到有一點點帶鹼性的刺激。經驗話俾筆者知道，豬頸肉可能下了太多鬆肉粉，所以刺激味蕾，也掩蓋了豬肉本身的味道。滑蛋蝦仁（$72）價錢唔算貴，份量都幾多，應該都有五六隻相當大的蝦仁。雞蛋炒得唔算十分滑溜，但算合格以上水平。蝦仁的質素就稍為差了一點，一眼望落去那種略帶透明的蝦仁，就已經知道很大機會是那些已經去殻的急凍貨式。當然，其他很多茶餐廳格局的街坊小菜館也是採用類似貨源，但處理手法會稍為恰當，最低限度望落去不會這樣透明。埋單時發現沒有加一服務費，都算是有個小驚喜。只不過小菜質素實在一般，而且又沒有套餐，下次再來幫襯，還是選擇碟頭燒味飯吧。…Read More
