。以往年中嘅飯局都會搞入三聖食海鮮，不過，連續3年入咗3次大家都有啲悶，今回就回歸市區，搵間酒樓包個房，等我哋點嘈都得，有死佬建議嚟「海港」，因為有抵食嘅阿拉斯加長腳蟹。雖然成日話市道唔好，飲食席生意難做，但今晚（周五）嚟到，成個大廳座無虛席，門口亦有少量人等位
。由電話聯絡問訂房詳情、最低消費、全包宴資料……等等，都遇到好多問題，佢哋啲回覆次次唔同，對外發放嘅資訊都幾亂。最後，就喺揀咗一個「賀壽全包宴」$3,880（星期一至五），算喺包房嘅基本入場費。包茶芥加一，我哋多4位，都無額外收，另送紅酒一支加汽水6罐，額外叫嘅汽水，就收番大堂價$10罐。不過，一圍菜絕對唔夠我哋16個麻甩佬食，所以，另外加菜，而入房嘅所有小菜、炒粉飯麵都要另加$20一碟，額外嘅食物亦會收番加一。影埋個主餐牌及精選餐牌俾大家參考，人少嚟食啲精選套餐都唔錯。所包嘅房唔喺好大，緊緊好擺到張加大嘅16人枱，多一個都已經攝唔到。人齊開席，飲杯。
喜慶金豬滿華堂
先嚟道全體乳豬過吓口癮，隻乳豬燒得唔差喎，層皮脆卜卜，皮下脂肪又少。眨吓眼，好似蝗蟲經過稻田，成碟乳豬就被我哋處決咗。阿拉斯加長腳蟹 $1,720長腳蟹喺額外點嘅海鮮，晌主餐牌佢標$360 / 斤，依家做緊特價$188 / 斤，就算入房都喺俾番依個價。建議食法，可以揀日式凍食或花彫蛋白蒸。我哋16個人，就揀咗兩隻，咁就至少每人有一隻蟹腳食。9斤幾蟹確喺好有睇頭，不過，收千七蚊真喺唔平。啲蟹腳唔難拆，剪兩嘢就搞掂，原條蟹肉就拆咗出嚟，味道果然好鮮甜，質感爽，大家都食得津津樂道；其中一隻蟹就爆晒膏，另一隻就無乜料到，而蟹膏就搵啲蛋白配嚟食，感覺就更鮮味，但蛋白就唔喺好覺有花彫味。上湯焗生猛龍蝦（3斤）煎米粉底食完蟹，再嚟就喺龍蝦，雖然話得3斤，但載到成碟滿晒，絕對夠一人一件。而啲龍蝦都做得有水準，蝦肉好爽彈，上湯焗，添份香味。大多數配伊麵底，煎米粉底都喺第一次，米粉煎成好似兩面黃咁，不過，未夠脆，同埋做薄啲覺得會更好。黑松露鴛鴦蝦球全包宴中，可自選熱葷兩款，共有8款選擇，揀咗兩款睇落貴價少少嘅：蝦球同蟹鉗。所謂鴛鴦蝦球，就喺黑松露醬炒同粉漿炸，再配西芹。兩者都各有特色，前者爽口中又帶黑松露香，後者多一層脆卜卜炸皮。胡麻水耕菜伴炸釀蟹鉗另一道熱葷釀蟹鉗，因為我哋成16個死佬，就自然要加多4隻，散叫價每隻要$38，基本上唔需要預早訂，到時即場落單都可以。啲蟹鉗大隻又炸得幾靚仔，金黃唔油，圈咗啲麵粉絲，更香脆，入口又爽鮮，大啖大啖蝦膠連蟹肉，認真爽。至於啲水耕菜，死佬即喺死佬，喺唔理會健康嘅事，所以，無乜人吼。淮杞花膠炖海螺小弟喺「無翅之徒」，就梗喺棄翅揀燉湯啦，估唔到個燉湯幾足份量，夠我哋16人一人一碗，而且，撈起嘅湯渣份量十足，所以，個湯飲落真喺十分清潤、好甜。原條遼參扣鵝掌遼參炆得好軟腍，咬落有啲啜口感，而鵝掌扣得好腍滑、好香濃，入晒味；唯一問題喺啲白菜仔嫩就嫩，但有啲苦味，唔算犀利，都仲入到口嘅，哈哈！清蒸沙巴龍躉斑睇樣都應該有3斤重，啲魚越大條就越難蒸，怕外面熟裡面唔熟。難得條沙巴龍躉斑蒸得唔錯，因為中間肚位夠熟，又無話蒸過籠變嚡，啲肉質的確幾嫩滑，蒸得恰到好處，沾少少豉油配點蔥，魚嘅鮮味盡出。海港一品醬燒雞去到食雞就知接近尾聲，醬燒雞其實跟平常酒席見嘅炸子雞差唔多，老套啲講，皮脆肉滑，夾嚿打橫望望，真喺無乜脂肪，啲肉堅喺嫩滑，味道上雖無驚喜，但手功紮實。幸福長壽伊麵叫得賀壽宴，長壽伊麵就成為指定嘅單尾，之前嘅菜式都好夠份量，反而個伊麵相對少，如果平均分，相信每人只有少半碗。質素平平穩穩，至少食落唔會覺得好油。櫻花蝦海鮮炒飯 $108就喺因為個菜單只包一道伊麵，小弟真喺怕唔夠班大佬飽肚，所以，再額外叫兩份炒飯。原價喺$88碟，但入房就加多$20。個炒飯無欺場喎，雖然海鮮唔喺用咩貴價料，但勝在多，櫻花蝦亦不少，飯底炒得乾爽分明，好食。賀壽大蟠桃同蟹鉗一樣，跟人頭數要額外多4個，都抵加，因為俾返堂食價$10隻我哋。每個都做得維妙維肖，夠晒大個，有成個拳頭大。大家食落先知有兩款餡，一款喺預期嘅蓮蓉，另一款原來喺奶黃，小弟抽中奶黃，雖然唔喺流沙嗰隻，但啲奶黃都好香好綿，好有蛋香，再者，包身軟熟唔黏牙，亦喺出色之處。雖然無話專登嚟賀壽，但祝各位大佬身壯力健，我哋啲死佬飯局年年有今日。紅豆沙個壽宴就無包糖水，但本身晌度食晚飯就有糖水送，向位阿姐問兩句，轉頭就幫我哋拎到糖水嚟。就算無得揀只喺得紅豆沙，眼前嘅紅豆沙又腍又清甜，加上唔使錢，絕對收貨啦。合時生果唔多講，睇相就知當日生果喺鮮橙，今晚食咁多肉，好好食多幾件生果幫助腸道消化。整體，海港做菜嘅質素唔差，又有供應好多中平價套餐，喺入房焗食貴嘅套餐及設最低消費先貴一大截。另外，啲宴席碟頭都幾夠份量，服務方面ok啦，其實視乎遇到邊位阿姐，主力服務我哋個房嘅阿姐就幾好傾，有講有笑，但另一個間唔時出現幫手嘅阿姐就經常黑面。…Read More
主角：阿拉斯加長腳蟹這阿拉斯加長腳蟹的長相和北海道長腳蟹十足一樣，不知道是不是同一個種？這次叫了一隻六斤重的，選擇清蒸，這樣才能享受蟹的清甜鮮味。肉質非常滑嫩，無論蟹肉的texture或蟹殻的質感，和北海道長腳蟹都沒有差別，啖啖肉，入口清甜，非常享受！只是鮮味卻略遜北海道的，但也真的不錯。假日一斤才 HK$160，確是實惠之選。 果皮蒸大連鮑魚一上碟就被各人一掃而空，來不及拍照。不過，味道一般，果皮味太濃，蓋過鮑魚的鮮味之餘，入口也略帶苦味。不喜！脆皮乳豬例牌一碟，不過不失，乳豬還蠻鬆化。瘦肉響螺老黃瓜湯用料十足，響螺味道突出，可惜味精也不缺。甜品蓮蓉壽包蓮蓉還可以，可是包發的不夠，吃起來硬硼硼的，完全欠缺柔軟的口感，不喜。 總括而言，海港的海鮮抵食（最好叫清蒸），其他則菜普普通通。如果只想吃一頓普通的晚飯，同區有更好的選擇。…Read More
