週日老婆問去邊食晏我就提議食文華，唔係文華東方酒店，係「文華冰室」至真，嘻嘻！黎到文華門只係正午一點，條人龍有十幾人咁長，等左約十分鐘就有位，我柯打左兩碗「黯然銷魂飯」即係叉燒煎雙太陽蛋飯！將星爺「食神」電影橋段入面的食品帶回現實，係咪真係咁把炮？碗飯賣相唔錯，文華秘制叉燒好大舊，同燒味鋪一塊塊叉燒好唔同，一啖咬落去居然冇令家燕姐流眼淚的洋蔥味，豬肉用左「半肥瘦」梅頭肉，脂肪同肌肉比例岩岩好，有𡁻頭，絕對係誠意之作！一篤穿隻太陽蛋，入面嘅蛋黃汁慢慢流入個甜豉油飯度，令到瘦長的絲苗米更綿滑。倒覺得文華呢碗黯然銷魂飯味更似情與義值千金的「雞姐」對潦倒的史提芬周施以「一飯之恩」果碗叉燒蛋飯。將電影入要經典食品帶回現實令人份外親切，畢竟「星爺」的電影絕對係港人集體回憶！呢度仲有懷舊特飲鮮奶溝忌廉，值得一試，難怪咁多人扶老攜幼排曬長龍都要黎幫襯。
…Read More
…Read More
