大圍交通方便，食店林立，的確係一個搵食嘅好去處。但係每一間餐廳都各有賣點，要突圍而出真係唔容易。早幾日我就去咗大圍嘅「劉興記」，睇下佢點解可以成為區內新興起嘅人氣小店。幫襯得人氣小店，一定要有排隊嘅心理準備，但係其實較啱時間，都未必需要排隊嘅。我今次幫襯嘅時間係晏晝大約四點鐘，雖然舖頭入面已經有唔少食客，但係好好彩竟然仲有個二人位。一坐低之後，我第一件事竟然唔係睇餐牌，而係畀餐廳入面嘅告示吸引咗。「親愛的顧客們生煎包無爆汁，可免費更換」嘩，咁有信心得唔得架？之後我哋就叫咗一個套餐：「皇牌2 - 麻醬手撕雞絲粉皮 + 生煎包2隻 配豆漿」單點：「蟹黃生煎包」2隻、「招牌擔擔麵」、「秘製上海炸排骨」同埋一罐可樂。好快嘢食就上枱，我第一時間檢查吓啲生煎包有冇爆汁，結果啲汁係衝出嚟，啲汁嘅份量甚至一度令我非常懷疑一個生煎包最多究竟可以裝幾多嘅汁，總之，試過就會知道，要唔漏汁食呢一個生煎包，成隻鯨吞可能係其中一個可行嘅選項。兩款生煎包都好高質，普通版肉味較重，蟹黃版香氣濃郁，各有各出色之處。麻醬手撕雞絲粉皮麻醬同粉皮比例調配得好，雞絲同瓜絲份量足夠。擔擔麵湯底香濃可口，麵身軟硬適中，配合香脆嘅秘製炸排骨，簡單好味到過哂火。食完之後，已經期待下次再幫襯喇。…Read More
