長州出名小食， 但中午時分黎到，都係食餐正常午餐先。可靠嘅大同就上Youtube，發展有YouTuber 推薦蠔仔肉碎粥同沙嗲牛麵。平時唔鍾意食粥嘅我對蠔仔粥都幾有興趣，所以就去試吓。藍鳥嘅位置係離碼頭5分鐘到嘅小巷到，有個唔係好顯眼嘅街坊招牌，寫住藍鳥，要多加留意先唔會睇留眼。黎到就叫咗蠔仔肉碎粥同沙嗲湯底嘅車仔麵，兩份share。老闆娘好好，見我哋share就主動俾多對餐筷俾我哋。蠔仔肉碎粥係食過最好味嘅粥之一。用料絕對唔馬虎，有滿滿嘅蠔仔、肉碎、芫荽。蠔仔、肉碎令粥底超級鮮甜，而芫荽同蔥就增加咗香味。如果個粥煮得更綿嘅話，絕對係值得五星嘅。三餸麵叫咗蘿蔔牛腩同墨魚丸，配幼麵。沙嗲湯底好濃郁。雖然要額外加$8，但物超所值。牛腩嘅份量大大舊，分量唔少。我同友人都好滿意呢餐地道長州餐，蠔仔肉碎粥取得我地兩個嘅歡心。下次黎長州都要再三回味下蠔仔肉碎粥！ …Read More
