放工已經接近八點，嗱嗱臨買外賣返屋企，行經呢間主打丼飯嘅外賣店，見人氣幾旺，決定支持下小店。除咗主打嘅日式丼飯之外，仲有韓式辣炒雞丼同馬拉咖喱雞丼呢啲比較少見嘅丼飯，小食同飲品方面選擇亦唔少，仲有幾款自家製嘅飲品，而且價錢唔貴。蒜香牛柳粒丼份量唔細，牛柳粒嘅比例亦唔少，配上兩片漬蘿蔔，清新開胃。牛柳粒軟腍入味，帶有淡淡嘅蒜香，但唔會完全遮蓋牛肉本身嘅味道。和風牛肉丼份量亦好足，一打開紙盒係滿滿嘅汁煮牛肉，灑上白芝麻香氣誘人。牛肉肥瘦均勻，而且非常入味，底下嘅白飯望落比較乾，仲以為因為用嘅係紙盒所以冇淋上醬汁，但食落竟然有驚喜，原來飯已經吸收哂牛肉嘅味道，絕對唔輸蝕俾某某家嘅牛肉飯。小食方面我揀咗鹽酥雞，返屋企途中一直聞住佢嘅香味，對於飢腸轆轆嘅我嚟講真係極度誘惑！鹽酥雞比較細粒，一啖一粒剛剛好，炸得夠香脆，上面嘅調味粉亦非常惹味，一個人食哂成份都唔成問題。細份嘅雞軟骨共有三條，香脆可口，灑上少許香辣粉更加惹味。飲品方面我揀咗日本提子梳打，味道唔錯，跟餐加八蚊，價錢合理。喺呢個地段能夠搵到價錢咁相宜嘅外賣便當，實在係不可多得，而且食物質素唔錯，絕對可以話係打工仔恩物。…Read More
