Hikari

🥰 一年前初訪 “曦”, 魚料新鮮, 刀功出色, 啱口味, 又抵食, 一戰難忘.🤗 餐廳地理位置喺炮台山, 遠離主戰場, 未算 “預約困難店”, 唔使訂金, 加咗入 “我的至愛”, 係過往一年拜訪次數最多嘅 “廚師發板”, 但總數尚未追平 “鮨三川”.🥢 “曦” 設一張12人壽司吧枱, 以往兩位師傅, 各一打六, 現在剩下明師傅, 今日一打八. 早前中午分兩節: 12pm, 145pm. 隨生活復常, 中午玩兩節感覺名存實亡. 今日再點12貫壽司套餐, $520+10%, 包茶碗蒸, 12件壽司, 雪糕或咖啡.縞鰺天草真鯛大型間八櫻鱒鰤魚鯖魚池魚牡丹蝦大拖羅赤身三文魚籽海膽🍥 茶碗蒸. 夠熱, 鮮味!🍣 縞鰺. 肉質緊實.🍣 天草真鯛. 醬油漬, 甘香.🍣 大型間八. 重魚味, 油份豐富.🍣 櫻鱒. 期待嘅 “軟綿口感” 表現一般.🍣 鰤魚. 正常發揮.🍣 鯖魚. 三切再叠埋, 招牌款式, 我鍾意.🍣 池魚. 魚味濃郁.🦐 牡丹蝦. 膠口.🍣 大拖羅. 肥美.🍣 赤身. 醬油甘香.🍣 三文魚籽. 我本身唔鍾意食三文魚籽, 呢個版本帶甜, 出色.🐚 海膽. 絕配脆卜卜嘅紫菜.🦐 蝦頭湯. 鮮味, 熱辣辣.🍨 雪糕. 正常.🤗 總結: 回味再回味, 待破 “鮨三川” 10+ 訪記錄.📖 後記: 谷友試咗晚餐, $1,800+10%, 據聞非常豐富, 餐廳請咗位實力派嘅熟食師傅, 出品優質.…Read More

🥰 話說早前太忙, 錯過咗一頓免費 “廚師發板”, 連續幾日心思思要食壽司, “千兩” “元氣” 乜都食過, 都係心有不甘, 再試 “舞鶴”, 又中伏. 報復心驅使, 今日帶隊親征 “㬢”, “陳登” 做軍師. 點咗12貫壽司套餐, $520+10%. 聽講咪師傅已移民, 今日明師傅一打九, 辛苦唒.📖 翻查資料: “陳登” 係三國時代人物, 曾效力陶謙, 劉備, 呂布, 曹操. “陳登” 嗜食生魚片, 胃中累積有寄生蟲, 因而重病, 經名醫華佗醫治痊癒, 但華佗提醒他此病三年後會復發, 需要有良醫在旁。三年後果然應言復發, 此時華佗不在, 陳登便因病死去.🥢 餐廳環境偏嘈, 吸音問題, 世事無完美, 哈. 除此以外, 座位舒適, 服務周到.🍙 講講 “舍利”, 略帶鹹, 唔夠酸, 飯偏細, 未到六點開始肚餓!🤗 魚料食材非常出色, 全塲掌聲, 隊友們一致讚好. 刀工調味又係一流, 某隊友食慣四川麻辣, 覺得調味偏淡, 我覺得啱啱好喎. 有比較, 有傷害, 睇番一年前嘅食評做對比, 今訪嘅魚料變化少咗, 手功心機嘢少咗.🍥 茶碗蒸. 夠熱, 夠味.🍣 縞縿. 味道由簡單開始…🍣 金目鯛. 魚身柔滑, 我都係鍾意食炙燒版本.🍣 天草真鯛, 醬油漬. 加咗檸汁, 少似鹹檸七, 層次豐富.🍣 間八. 煙煙靭韌, 略帶油香.🍣 櫻鱒. 口感軟綿, 加咗柚子胡椒, 辣辣地.🍣 鰤魚. 魚味濃郁, 口感油潤.🍣 鯖魚. 超重魚味, 十個讚!🍣 池魚. 肉質緊實, 少少脆口.🍣 鰹魚. 灸燒魚皮, 煙燻味慢慢滲出.🍣 天然吞拿魚, O-Toro. 肥美, 又保留到魚味. 🍣 三文魚子. 甜甜哋, 卜卜脆.🍣 函館馬糞海膽. 鮮甜, 一致讚好.🥣 麵豉湯. 夠熱, 蝦味濃, 掂!☕️ 咖啡. 高質.🤗 總結: 一個字, 好味道! 報復成功.…Read More

幾個月前初訪 “㬢”, 當時用 “富察皇后”* 嚟比喻用餐體驗, 即係神級但有短板 (!).  🥰 今日N訪, 點咗午餐 “錦” Nishiki, 加咗價, $520+10%, 包括茶碗蒸, 12貫壽司, 湯, 及甜品. 明師傅招呼, 一打六.🍥 茶碗蒸. 夠熱, 味道淡麗.🍣 愛嬡真鯛. 油份豐富, 味道簡單.🍣 深海池魚. 肥美, 柔滑, 魚味出色.🍣 北海道帆立貝. 厚身, 口感充實, 相對唔特別鮮甜, 整體Ok. 🍣 鰆魚, 配白䓤. 輕輕燒過, 魚身柔軟, 食到一陣甜味, 讚!🍣 鯖魚, 配薑蓉蔥花. 魚味濃郁, 調味配搭出色!🍣 黑睦. 輕輕燒過, 油香充滿舌頭, 正!🍣 拖羅. 三個拖羅部位, 叠埋一齊, 大拖羅肥美, 中拖羅俾到魚味, 神級配合, 一流!🍣 吞拿魚背. 魚味濃厚, 肉質相對實淨, 出色.🍣 間八. 爽口, 柔滑.🍣 三文魚籽. 甜甜地, 卜卜脆, 聽講用清酒處理過. 加上脆脆嘅紫菜, 好食.🍣 白海膽. 份量充足, 口感軟滑, 味道唔算鮮甜.🍣 拖羅卷. 吞拿魚唔同部位發揮出色, 掂!🥣 麵豉蝦頭湯. 熱辣辣, 非常鮮味, 十個讚!🍧 桃味雪粑. 正常.☕️ 咖啡. 味道Ok, 係唔夠熱.🤗 總結: 魚料食材超級出色, 有幾款壽司真係食完 “嘩” 一聲. 餐廳近馬路, 小小嘈, 師傅今日說話少咗, 可能知道講得多, 聽得仲辛苦, 效果Ok喎. 整體服務到位, 用餐體驗愉快, 期待下次再來.🥰  “富察皇后” 係電視劇 “延禧攻略” 𥚃面 女演員“秦嵐” 飾演嘅角色. 神級美女, 竟然唔夠高!…Read More

在港島區，中環和銅鑼灣可謂Omakase的戰場，說的除了是鮨店出盡招數，以求留著客人的胃的互相角力，也是食客爭相追捧「預約困難店」的戰爭。其實稍移玉步，不難發現滄海遺珠，例如這間位於炮台山的鮨店「曦 Hikari」，開業半年，店舖的骰，壽司吧枱只得十個座位，但因為甚少宣傳，只靠口碑，所以依然未算難book位。鮨店內器皿都很精美，原來大部份都從日本採購，尤其欣賞不同座位會有不同的壽司碟，是次我面前的是翠綠色年輪紋壽司碟，有種雅緻感。入正題，十二貫壽司（師傅整漏一件，埋單走人上車後才收到Whatsapp通知🥲），打頭陣的是天草真鯛，只加一滴青檸汁提鮮，再一抹醬油，不需多餘調味，肉質富彈性，味道甜美。深池爽甜；幼鰤軟滑。再來櫻鱒，在「個個都是食家」的年代，鮨店內出現三文魚刺身往往會被人詬病，但其實三文魚也有分不同品種，若將高級野生鮭當成廉價養殖鮭，一見到三文魚刺身就有偏見，一概不吃，拒諸門外的話，那你很可能就錯過了很多美味。例如櫻鱒就算是比較知名的日本原產野生三文魚品種，每年春天還記得櫻花正開之時，正正是櫻鱒時令之期，櫻鱒比起平日常吃到的挪威三文魚刺身，顏色沒那麼鮮艷，粉橘色的魚肉甚至沒那麼多油脂，但其肉質軟滑，魚味之豐，絕非普通三文魚可比擬。緊接其後的大分縣關鯖魚，興許是當日最美妙的一貫，沒有額外醃製及調味，三片薄切處理的關鯖魚，更體其油脂豐富的特點，一點蔥薑末適當地帶出魚油香，跟赤醋飯無縫配合，出色。可惜之後無調味亦不算鮮甜的一貫赤貝，破壞了那餘韻。混合拖羅比較特別，用中拖羅、大拖羅，以及兩者之間的肉，砌成一貫壽司，不過大拖羅的筋過於明顯，影響了整貫口感，反而之後的赤身肉質結實，加上貨真價值的旨味，好好地滿足到我的味蕾。三文魚籽沒有投訴，紫菜夠脆，以舌尖將三文魚籽擠破，顆顆粒粒的鹹甜鮮猶於煙火於嘴裡綻放。最後一貫以馬糞海膽結尾，秋山水產品質一向穩定，不意外地完美收場。舍利方面，赤醋飯其實調味剛好，不會過酸過甜，卻又夠香夠味，但飯粒口感較黏，用手拿起壽司吃，偶有幾粒飯黏著手指，也忘了是哪一貫，飯粒握得較為鬆散，好彩在整貫斷開之前用口接著，空氣感是很足，只是過程有點驚險。…Read More

疫情終於受控，四月下旬晚市得以重開，舞會亦隨即開放，堅有XO仔心嘅靚女舞伴即相約舞前於鄰近嘅新店「㬢」嘆番餐廚師發辦，補祝細佬生日，認真客氣！小店離炮台山地鐵站不遠，巴士、小巴、叮叮附近都有站，交通絕對方便。地舖木造嘅門面、鮮紅色嘅布簾及光亮嘅招牌於灰牆上十分顯眼。步入店子，即可見到可容納上十人嘅壽司吧，掌舵嘅兩位師傅相當好客，而且平易近人。不用花巧之裝潢，木造嘅間隔足以滲出和風味。值得一提嘅就係男女共用嘅洗手間全自動模式操作，疫情下感覺尤其衛生。每位席上都擺有齊備嘅自用餐具、濕紙巾及口罩信封。桌上另有牙籤及額外嘅乾、濕紙巾。晚市只提供一款以店名取名嘅「㬢」廚師發辦套餐（$1,800/位）。電子飲品餐牌則有一頁之多。嘻嘻，酒鬼賀壽當然係要飲番兩杯啦！如貴客欲自攜佳釀，每樽720ml及1.8L日本清酒嘅開瓶費分別為$200及$500，價格都好合理。師傅備製魚生前，先送上清新爽脆嘅漬物送酒酒，細心得很。為晚餐作序嘅有暖胃嘅茶碗蒸。小碗中嘅燉蛋軟嫩滑溜，配料用上橙美厚彈嘅蝦隻、厚潤嘅帶子粒及幼嫩嘅松葉蟹蟹絹即倍添口感及鮮甜。頭兩道刺身均為組合菜。第一件師傅以愛媛縣嘅真鯛切成薄片，夾入海膽後再灑上岩鹽即大功告成，手勢純熟。真鯛海膽卷外軟內嫩，應建議掃上紫蘇花，效果輕盈清香。第二件捲到成朵花咁靚嘅原來係節令嘅沙甸魚。沙甸魚魚肉肥美，中央插入爽嫩芳香嘅愛媛縣芽蔥，並混配薑蓉、山葵及芝麻調味，可謂色香味俱全！師傅預告晚餐有多款貝類魚生，第一款當造嘅鳥貝口感爽脆，邊食邊傳出陣陣嘅青檸香。每年XO仔生日月份都會遇上岩手縣嘅紫海膽，嘻嘻，今年亦不例外。原隻開黎食，賣相震撼之餘，鮮橙金亮嘅海膽鮮嫩甜美，堅掂！仲要襯埋隻咁可愛嘅金魚匙羮仔食，更顯矜貴。暖暖嘅燒螢光魷魚好香口。來自北海道嘅白象拔蚌爽潤脆口，不用多點醬油已夠鮮美。銀皮白肉嘅間八刺身十分清爽，黏上碟邊一角以山葵莖製出嘅漬物即有提鮮之效。DIY嘅池魚他他卷外脆內潤，他他混入咗多款醬料撈製，當中最突出嘅就係山葵嘅辣勁及麵豉醬嘅甜濃。接棒簡單一片響螺刺身清脆鮮甜。據悉，由於源自京都舞鶴嘅吞拿魚熟成咗幾日，師傅必先謹慎地切去最外層嘅魚肉並即時棄掉，損耗原來咁多！師傅介紹熟成咗嘅吞拿魚嘅油份同水份因為少咗，其肉質就會變得實淨啲，魚味亦相對地更濃更出。其實小肥平時都唔係咁啱食火腿同咸魚，就係怕佢重口味，唔知係咪同一個道理呢，有得揀的話自己會情願食生魚而棄選熟成過嘅魚魚囉。熱食中最必數每人都有一客嘅汁煮深海池魚魚鮫！銀光閃閃嘅深海池魚肉質幼滑鮮嫩，秘醬甜濃討好，以芬芳嘅紫蘇花點綴直令味覺、臭覺及視覺效果更上一層樓！壽司環節上場時，哥哥仔先送上濕紙巾，方便貴客可傳統地用手進食。第一件金目鯛壽司潤澤有嚼勁。第二件貌似三文魚嘅鱒魚壽司食落比三文魚軟綿，而且更為清香油潤。意外地，魚生中嘅高潮位竟然係細佬唔係特別愛好嘅鯖魚壽司！由於三塊銀邊嘅鯖魚並未經醃製過，原汁原味方才可突顯其魚油如何豐潤；鯖魚壽司肥美鮮香，冇得頂呀！厚厚嘅北海道帆立貝壽司爽脆潤甜，紋理修長清晰全因師傅乃用手撕開貝肉，而非用刀切。銀亮有光澤嘅深海池魚壽司爽實有彈性。相比起下，鰤魚壽司則較為軟身。輕輕以火槍炙燒過嘅北寄貝壽司爽中帶脆得黎好有韌度。三層疊嘅吞拿魚壽司軟潤有光澤。三文魚籽壽司明亮透光、濕潤爆珠。壓軸嘅馬糞海膽壽司嫩甜無比，一啖食落口，鮮味迅即洋溢口腔，實滋味無窮！單尾有碗清清地嘅茶漬飯，精髓係飯面件炸蝦餅。如相所示，炸皮下橙白紋理仍然分明嘅炸蝦鬆厚香脆，同隔離件炸帶子一樣咁惹味。善用食材嘅廚房更將炸蝦嘅蝦頭及蝦殼混入蜆仔另煲製出濃郁嘅赤麵豉湯。作結嘅靜岡蜜瓜半腍半爽，又潤又甜又多汁，炎炎夏日特別清涼！炮台山新開之壽司屋「㬢」環境光鮮開揚，服務生落力周到，師傅們亦相當誠懇，晚市廚師發辦用材新鮮，二十多道刺身、壽司、熱食彩艷豐盛，美味可口。非常感激舞伴盛設款待，XO仔抗疫下「㬢」有的慶生晚聚感覺份外珍貴！…Read More