The Cosmopolitan (Tak Shing Street)

呢間餐廳將傳統粥文化提升，搭配是日時令海鮮、家禽、肉類同蔬菜等新鮮食材， 突顯「原味」、「鮮味」同「真味」🍲 堅持「以客為先，絕無海鮮價」，所有套餐免收加一，性價極高👍🏼🦀肉蟹+龍蝦+ 沙白蜆 ($278)1️⃣店員先上送上鴛鴦鍋，建議海鮮同蔬菜放入粥水鍋，而肉類、丸類同麵食就放入日本昆布鰹魚湯2️⃣品嚐7款自選生猛海鮮💗肉蟹：口感肉多有蟹膏💗龍蝦：肉質厚實Q彈💗沙白蜆：蜆肉鮮甜而且完全無沙💗鮑魚：口感肉厚爽滑💗海蝦：肉質爽口彈牙💗大尾魷：肉質爽脆彈牙💗蟶子：肉質爽口鮮味3️⃣加入3款蔬菜 (南瓜粒、芋頭粒、粟米件) 準備「海鮮粥」4️⃣加入8款自選配料「打邊爐」💗日本A5黑毛和牛（+$39）：和牛柔嫩細滑，帶豐富油香💗特級牛脷芯片（+$19）：薄切牛脷芯脆嫩且肉味濃💗自家製手打牛肉滑：爽滑彈牙嘅牛肉滑加入爽脆嘅馬蹄粒，味道有少少似山竹牛肉💗日本手打烏冬：烏冬煙韌順滑，吸收哂湯底精華💗萵筍：萵筍爽脆清甜💗芝心獅子狗：竹輪爆出香濃嘅芝士醬💗爽口鵝腸（+$3）：鵝腸口感爽脆，清洗得好乾淨💗蟹粉包：爽彈魚丸包住流沙甘香嘅蟹粉醬5️⃣店員幫忙壓蓉南瓜粒、芋頭粒，放入粥膽熬成「海鮮粥」💗No.1精華海鮮粥：選用東北大米同日本米，以「先煲後焗」令粥底更綿密香滑。粥底吸收哂之前放入嘅海鮮、蔬菜同配料嘅鮮甜。最後加入冬菜、菜甫粒、大頭菜粒同豬油渣粒提鮮…Read More

老婆逢星期五嘅興趣班卒之完結咗，所以，今晚專登同佢出嚟食餐好嘅，無麩質，又要少肉，就想起早前食友推介嘅「鍋心」，因為佢哋以海鮮粥鍋打響名堂。餐廳好近佐敦站，兩分鐘步程就到，甫入到去，雖然只喺平日晚上，已近乎座無虛席，非常熱鬧。全部位都喺卡位，目測所見，分4人座、6人座，而啲卡座都幾闊落，舒服好坐。正所謂工欲善其事，必先利其器，枱上一早已放齊各類「架生」，鉸剪、鉗、鋼夾……一應俱全，食蟹都變得無難度。此外，向來食火鍋，另一大配角就喺醬料，除咗醬油，店家就另外配備一整碟紅椒粒、蔥花、蒜蓉及沙薑供客人使用，唔夠可以再問。顧名思義，呢度主打就喺粥底火鍋及其海鮮靚料，玩法以套餐形式，揀鍋底，再揀基本海鮮組合，共4款由$208-$278（以每人計），之後自選時令海鮮及各人再揀4款火鍋料。當然，唔夠可以再額外追加，但小弟就覺得基本套餐已好夠食，因為，臨尾仲可以熬個精華海鮮粥。順便講埋有咩飲啦，汽水、啤酒呢啲基本嘢都有，特別啲嘅仲有土耳其汽水、自家製冷泡茶，此外，更供應Movenpick雪糕，定價都相宜。平常食火鍋，嗌汽水喺指定動作，不過，一來老婆晌度，佢向來講健康，飲汽水就唔好喇，二來店家有啲自家製冷泡茶，口味都特別，就嗌嚟試試。老婆就鍾意雪梨金桔百香果茶，而小弟就偏愛金桔檸檬菠蘿茶，雖然茶味有少少偏淡，但正正啱佢口味。食乜嘢都要講火喉，食海鮮就更加喺，枱面就擺咗個小小計時器喇，當然，就仲要知道啲海鮮要烚幾耐，故此，枱邊就貼有一張「最佳時間」建議，仲溫馨提示以水滾時間計起。粥水鍋雖然有多款鍋底，老婆就想食得清啲，所以，最後都喺揀番粥水鍋。而套餐方面，就選上兩個中價餐：肉蟹+沙白蜆同龍蝦+沙白蜆；另外，自選時令海鮮方面就選上鮑魚、海蝦、多寶魚、蠔同蟶子，一次過上晒枱，非常有睇頭，而且，仲要好新鮮生猛。肉蟹、龍蝦小弟本身都鍾意食蟹，不過，就嫌拆蟹麻煩，但侍應大姐教咗兩招，確喺幾方便，而啲蟹肉又確喺好鮮甜，正！向來人人都鍾意食龍蝦，見都見到有唔少膏，跟番個時間烚夠即食，啲肉鮮就唔在講，爽彈到不得了，啲膏又香喎。沙白蜆啲蜆絕對養得夠時間，一粒炒都無，隻隻烚完都開口，無死蜆，而且，蜆肉入口確有少少鹹鮮海水味。鮑魚送到嚟仲郁緊，堅新鮮鮑魚，烚完搵鉸剪剪走啲腸臟雜物，入口柔靱有咬口，咬落富彈性，淨點豉油都食到鮑魚鮮味。海蝦上枱時都奇怪點解有個兜喺吉嘅，原來喺冚住啲蝦，啲蝦生猛到紥紥跳，仲跳晒出嚟，所以，店家都專登教路用鉗夾住嚟灼一灼，免得爭紥時濺起啲湯而被灼親。多寶魚魚類就最合晒老婆嘅喜好，相對嚟講，多寶魚算喺少食，估唔到，啲魚肉好滑溜之餘，又唔會咁易散。生蠔啲生蠔超級大隻，又光澤，好靚仔，就算烚完都無話大縮水，仲保持到有番咁上下大，最緊要喺蠔味十足，正！蟶子建議烹烚時間只喺30秒，所姒，務求好食，一夠30秒就即撈上嚟放入口，果然鮮甜，口感非常之爽口。食完一輪海鮮配料，跟住就輪到分享8款自選配料，由於老婆嘅飲食都喺偏少紅肉，所以，所點嘅大多數都喺蔬菜，包括竹笙、蜂巢豆腐、淮山、姬松茸、唐生菜，另外，再加幾款富特色啲嘅配料：胡椒豬肚肉丸、手打馬蹄雞滑、手打蝦滑。竹笙、蜂巢豆腐、淮山、姬松茸、唐生菜食番多啲蔬菜，除咗老婆喜好，咁平衡番啲海鮮、肉類都好嘅，而啲蔬菜用料都幾新鮮，竹笙、淮山、姬松茸就特別好食。胡椒豬肚肉丸豬肉丸當然食唔少，但加入胡椒豬肚元素就肯定喺第一次，肉丸好彈牙，而且，裡面混入不少豬肚粒粒，加埋啲濃香胡椒味，令人食得過癮。手打馬蹄雞滑、手打蝦滑除胡椒豬肚肉丸，呢個馬蹄雞滑亦好想試，再點埋蝦滑，單睇外觀，手打絕對貨真價實，灼熟之外，入口果然好正，爽口又彈牙，前者加咗馬蹄粒，令口感更具層次，而後者嘅蝦味鮮甜，兩者都做得好有水準，推介要試。精華海鮮粥接近尾聲，都清得八八九九，仲有兩兜南瓜粒、芋頭粒，再加埋後上嘅白粥底、海鮮粥絕配5寶：芫茜、冬菜、菜脯粒、大頭菜粒、豬油渣粒。點食法無一定法規，我哋就倒晒個粥底，加入南瓜粒、芋頭粒、芫茜、冬菜、菜脯粒、大頭菜粒一齊煮起去，豬油渣粒就按個人喜好先再落。由於先前的粥水鍋底經過一輪灼海鮮及其他配料，所以，成品出嚟好有香甜味，仲帶有少少海鮮嘅甜味，而我哋又少揀紅肉，故此，卻唔會好油、好濁，味道更清爽。一間餐廳嘅成功，事必有因，「鍋心」唔單只所提供嘅海鮮夠靚、夠新鮮，而且，服務好，侍應有禮，不時都目測到幫客人煮粥，最緊要喺定價合理，令人覺得性價比高，「鍋心」絕對算得上喺個好選擇！…Read More

本來想食蒸氣火鍋，點知食開嗰間執咗，之前同朋友嚟呢間食過，印象好似唔錯，今日同家姐嚟試。電話訂位，星期五、六、日分五點半同八點兩場，我哋食早場。未到六點已經坐低，見到點菜紙上四款套餐只剩三款，冇咗鮑魚😥。因為要等齊人所以最後六點半先點，佢哋話龍蝦套餐都冇晒，不過肉蟹龍蝦套餐就有，同埋自選海鮮可以揀鮑魚。我哋叫咗肉蟹餐同肉蟹龍蝦餐，家姐唔係好鍾意食粥，我哋叫咗鴛鴦鍋。可能係人多，都等咗陣先有人攞嘢俾我哋。海鮮好新鮮🦀🦞，蟶子好大隻，啲蝦仲識跳🦐🦐，所以要搵個蓋冚住，個套餐除咗主食嘅肉蟹同龍蝦，仲包埋沙白，另外可以喺個清單上面揀四至五款海鮮，同埋每人可選四款配菜，我哋仲叫咗豬腩片，仲有好多嘢食都冇寫出來，簡直豐富到不得了。食到差唔多，佢哋有人嚟幫我哋加粥、南瓜粒同芋頭粒入啲粥水度，最後就有一兜超正嘅海鮮粥👍🏼👍🏼，就連平時都唔鍾意食粥嘅家姐都話好好味。😋😋佢仲話下次要帶朋友一齊嚟食。😂原本我哋因為佢先至叫鴛鴦鍋，不過叫鴛鴦鍋嘅問題係：粥嗰邊好易黐底，如果校細個火，咁啲湯嗰邊又唔夠滾去淥嘢食，最後佢話如果下次嚟食就成個都係粥底喎🤣🤣。我哋追加咗一份牛舌同一枝竹蔗水，埋單人均$290。👍🏼👍🏼👍🏼…Read More

今日家姐請老豆食父親節飯，她說知道呢間店在佐敦吳松街搬左黎德成街，方便了爸爸唔使行咁遠，所以就ＢＯＯＫ了呢間食飯。佢呢度分左兩個時段，一段係六點，一段係八點半，我要返工收六點，所以揀左八點半呢一段時間食，因為早左少少黎到，侍應話要等到八點半先會安排入座，見佢地差不多時間開始安排上一批食客埋單同埋清理場地，都真係差唔多八點半了，我們安排座下後，家姐見老豆行左一段路都冇嘈，見佢咁乖，就獎了他一罐無糖可樂，而媽咪就叫了一支水，我們要在菜單上揀選５款海鮮及８款火鍋配料，另外每人可分到半隻蟹。點選完佢地就會陸陸續續咁上枱，見佢地係收晒所有食客啲菜單後，就有時間性同次序咁一批批咁分俾食客，因為佢係全部食客既單同時間出，在我們黎講，出得比較慢。首先上左個粥水鍋先。再黎個蟹，四個人分到兩隻蟹，我同家姐都唔食，俾晒老豆同亞媽食，隻蟹都幾大隻，亞媽話隻蟹好新鮮，啲肉一梳梳咁，好多肉。好甜。👍跟著來了海鮮類。扇貝有四隻，大隻又鮮甜。沙白都有廿幾隻，冇沙隻隻都冇沙、肉又肥厚。北寄貝都幾鮮味。鮑魚都幾大隻，唔靱。魚就用上左口魚，四個人有一條，幾滑幾甜。大尾尤係魷魚，唔算太多，但食落都一咬就斷，新鮮！食完海鮮又再等一輪等其他配料。在等待期間，侍應拎左啲粟米，南瓜粒和芋頭粒俾我地加落煲粥水度淆粥底。等了一段時間，配料先慢慢再出，首先有菠菜豬肉餃，個皮有點厚，食落有點，唔太好食。再來是墨丸燒，侍應拎上枱時好似魚蛋，到食落口佢有啲實實的，但入面有一粒粒食到既墨魚粒响入面，好有口感同相比平時既墨魚丸，呢款墨丸燒個墨魚味仲梗加重，誠意推介！👍西班牙黑毛豬梅頭肉，好有豬味，薄薄的，食落唔肥。魚片頭好有魚味，算唔錯！炸魚皮好脆，但四個人俾既份量我覺得有點少，仲好多都好碎添，呢個要減分！.響鈴卷黎到已經係腍左，應該在廚房放响空氣中太耐，所以食落冇口感可言！👎西班牙黑毛豬腩片，個樣似肥牛，但比肥牛甘香一點。食到咁上下，侍應要求埋單先。埋完單可繼續食。但我們計黎計去都仲爭一樣，後來發現係個肥牛未有，所以要追單。追左肥牛先再俾錢埋單。肥牛上檯後、，我地都好快咁將碟肥牛好快咁清光，見碟肥牛唔係太肥。我冇食，但佢地就食到準準有味。食晒啲野後，家姐就叫侍應幫我們整一整個粥底，個侍應拎左一大碗杰撻撻的粥加了入鍋入面，再加左的芫茜，菜莆，豬油渣，幫我們調好味個粥就完成了，個粥有晒頭先我們食過既海鮮既甜味，加埋啲配料，唔錯！👍食完都差唔多都十一點了，又係離開既時候，因為佢地係由時間分配食物，所以個個食客都係食到十一點走，佢地變相可以一次過做晒清理場地既事，但對食客黎講就要等得耐一點了。下次都係最好食早啲。…Read More