Imperial Treasure Fine Chinese Cuisine

同朋友食晚飯，想找個私隱度較為高的地方，最好當然要有間房，位於銅鑼灣區，而又比較近地鐵站嘅呢一間酒店入面嘅中菜廳<御寶軒>，地點方便，價格合理，又可以有房間的供應，算是不錯。杏汁白肺湯：奶白的顏色，味道非常清甜鮑汁炆鳳爪：本人其實唔係好食鳳爪，不過呢個鮑汁鳳爪真係炆得非常之入味，而且非常之軟同腍身，絕對值得一試。黑毛豬叉燒：黑毛豬叉燒是厚切的，叉燒肉質好嫩好腍，蜜汁味道非常之濃，入口極為juicy，係必食之選。薑蓉蒸魚雲：配有大量嘅薑蓉同蔥嚟一齊蒸，薑蓉味道好出，不過本人不好魚雲，所以只係淺嚐。糯米釀脆皮乳豬：脆皮乳豬做到好薄好脆，而且好香口，一咬落去帶有微微嘅油脂，而且入面嘅糯米飯好惹味，非常好食。蒜蓉粉絲蝦煲：粉絲煮得極為入味，不過蝦不是很大隻，味道可以，如果蝦身再大隻d會更完美。肉絲煎麵：麵底其實都煎得幾香脆，不過我本身不太愛煎炸過的麵，而且上面個肉絲芡汁我自己本身唔太喜歡，所以覺得一般吧！～鹽水炸豆腐：本人是覺得有點失望的，因為味道比較淡，而且炸得唔算好香脆，味道比較普通。流沙奶皇煎堆：呢個炸煎堆是即叫即炸，炸得其實外面都幾香脆，不過裏面嘅流沙餡略嫌比較少，如果再多啲流沙餡會更加好。木瓜燉雪耳糖水：木瓜同雪耳都好多，味道非常清甜。整體嚟講，餐廳有房間嘅供應，私隱度算是非常高的，可惜的是，由於房間入面比較焗，成晚都覺得好似唔夠冷氣咁，這一點實在有點失望，希望下次再來會有所改善吧！～…Read More

來自星加坡的新貴御寶軒，不到一年已摘一星，北京道1號的店擁有無敵維港景色，環境高貴雅致，怪不得其門如市，可惜冬至當晚光顧，假期太旺場失準，大家未能滿足，一夥兒今晚移師銅鑼灣店，再會它一面，且看又如何！ 位於假日酒店，飯店同樣以黑配暗金及雲石作主調，型格吊燈，高貴得來有多少太空金屬感，我們人多勢眾，訂位貴賓房，沒有無敵海景，但寬敞舒適。 預訂十道菜式，與12月在尖沙咀享用的有重覆，但喜見水準更勝一籌！合理推斷，新店星未摘，主廚有理由特意坐陣好作準備，因此，我建議想試御寶軒的朋友，倒不如來此店！ 御寶小碟 今晚有四款，黃金焗涼瓜、手拍青瓜雲耳伴、金牌蜜汁叉燒、蜆介炸鯪魚球。冬至吃過黃金焗秋葵，今晚換來黃金焗涼瓜，少許更改轉口味，蛋黃的香郁有助平衡涼瓜的甘苦，成功焗至金黃酥脆，炸漿又薄，水準不錯，但始終涼瓜有些甘苦，我還是喜歡秋葵。 手拍青瓜雲耳伴調味香辛，口感爽脆好吃。 金牌蜜汁叉燒表面一樣有些焦燶，奇怪地，今晚唔覺得佢失分，反而燶燶地有特色，肉質鬆軟滋味。蜆介炸鯪魚球炸至香而不膩，味道豐富。 魚籽醬炒蛋白 今晚的新菜，立刻成亮點，平實的蛋白突出魚籽醬的鹹香，而且外型對比明顯，啡黑色的魚籽粒粒分明如珍珠，蛋白非常幼滑，這一道出色。 糯米釀脆皮乳豬 賣相型格有米豬，沒有可能錯過，一件件企立排列的確吸睛，佩服創意，見樣子已經垂涎。 今晚終於無失準，皮下不見厚脂肪，酥香脆口薄如紙，糯米飯味道豐富無過乾，整體組合滿意追回分！ 秋冬滋補蛇羹 水準不錯，與12月在尖沙咀享用的一樣，材料足，蛇肉豬肉絲比例正常，調味適當，口感豐富，秋冬滋補養生佳選。 黑胡椒焗大肉蟹 再次成為我的至愛，星加坡煮法惹味十足，雖然黑胡椒始終未夠濃郁，但如期望中肉厚新鮮，鑊氣夠炒得滋味，啖啖肉好滿足！蟹殼已經預先弄至撕裂，並有膠手套供應，食得並不太麻煩，服務周到。 脆皮炸子雞皮脆肉嫩，喜歡它非癡肥貨，細細件肉寶滑。薑蔥撈中粗麵 今次唔用松露炒反而更好，薑蔥味香，汁水充足。 奶皇流沙煎堆仔 外皮酥脆，奶皇流心，細水長流永不會不過時的香口甜點。 紅豆沙湯圓 今晚終於回復正常無失敗，湯圓美味，紅豆起沙，對辦。 結論就是銅鑼灣店的廚好過尖沙咀，聰明的你懂得揀啦！…Read More

家中幾位姨媽每年回港都必定會帶小肥周圍去食好野，無奈自己個肚唔爭氣，臨出門前居然患上腸胃炎，結果仲喺屋企休息咗成個幾禮拜添。上週六見身體差不多已痊癒，XO仔一聽到班大人準備去銅鑼灣皇冠假日酒店入面新登場間「御寶軒」飲茶喎，體內o既為食蟲頓變得雀躍起黎，嘻嘻，細佬當然係要出山啦！酒店中菜廳樓底極高，金碧輝煌o既大堂不失時代感，而且間隔寬敞，感覺高雅舒適。姨媽早已為八人訂下廂房，長期都有兩位姐姐為我地替換餐具及斟添茶水，高級酒店o既貼身服務果然係唔同啲！午市自助填寫o既點心紙共有三頁，上面清楚列明每位茗茶$15，另收加一服務費。除此之外，餐店亦有七款續位計o既套餐供食客選擇。據悉，新店開業啱啱一個月。嘩，姨媽們當真神通廣大，打電話訂位時仲識得留埋名菜「糯米釀脆皮乳豬」，係咪好堅呢？！糯米釀脆皮乳豬（$690/半隻；$1380/一隻）：單睇乳豬o既賣相已夠震撼！只係小弟o既攝影技術未到家，影極都捕捉唔到個靚甫士。師傅預先將半隻糯米乳豬切成十二件，每件大小相同，而且極易入口。乳豬皮層超級香脆鬆化，中間o既糯米飯唔油、唔肥、唔黐牙、又夠煙韌，全枱屋企人都大讚好味指數爆哂燈呀！當日同場巧遇虎兄與虎媽及虎嫂共聚天倫，從手機通訊中得知乳豬菜式咁掂後仲走咗入黎試添，肥肥家族有時都幾有說服力架。經虎家三口極力推薦下，長輩即點咗兩款「黃金焗苦瓜」同「白灼生豬潤」黎試。黃金焗苦瓜（$48）：黃金苦瓜乾身脆巧，惹味帶甘，香口非常。白灼生豬潤（$148）：豬潤爽厚潤滑，簡單以椒絲豉油調味已夠美味，實屬必吃之選也！老火例湯（$168/例）：老火湯清潤甜濃，喝畢窩心暖胃。香菇燒賣皇（$42）：燒賣爽潤鮮香，食落一啲都唔覺油，效果輕盈健康。涼拌小青瓜（$48）：青瓜粒清新爽脆，微辣醒胃。叉燒蒸腸粉（$48）：腸粉皮薄白滑，叉燒餡料亦甜美可口。小肥自知病後初癒要注意飲食，幾日後仲要出外遊玩，所以有多道菜式都冇試到，喺度亦只能分享相片，還望讀者們見諒。雪耳燉萬壽果（$32/位）：木瓜湯水清香甜美，滋補潤喉，飯後一碗確真令腸胃份外順暢。椰汁紫米糕（$36/三件）：師傅專登以八粒粉紫糕點砌成一朵靚花，認真有心思。椰汁紫米糕微甜柔潤，咬落又帶點煙韌，都幾得意。清完個幾禮拜腸胃，XO仔終於有機會遇寶啦，與家人一同初嚐銅鑼灣新貴「御寶軒」o既佳餚！酒店高級中菜廳環境高雅大方，衛生舒適，上上下下o既服務生態度一樣良好友善，真係值得讚、讚、讚！午市點心精緻健康，招牌菜式「糯米釀脆皮乳豬」更加係有姿勢、有實際，個人認為以酒店餐廳黎講價錢絕對抵食，姨媽們仲即場訂座於下週短遊後再次幫襯，夠哂捧場啦掛？！細佬見OpenRice未有「御寶軒」多頁餐牌o既圖片，所以就專登影哂俾大家參閱。…Read More