終於第400篇，特別揀選了從未食過，而又豪華的盛餐，就是omakase廚師發板，由大廚嚴選當日之新鮮食材，配合客人口味，自定出一個豐富的套餐，價錢分別是$1300/1500/1800。我揀了$1500，原本諗住會貴精不貴多食唔飽，但原來係超滿足，一定飽的。前菜有三款，分別是梅味的jelly浸著嫩甜的蕃茄仔，微酸清甜好開胃。醃熟三文魚上有醃漬菜好爽口伴熟三文魚，魚肉結實帶酸。最後是我喜歡我糖漬枝栗，栗味香甜又大粒。菠菜沙律，有洋蔥、芝麻醬、菠菜。大廚自家調製的醬汁，味道偏酸，芝麻味濃香之餘，仲有黃豆粉的豆香。菠菜新鮮又夠嫩，而且無渣，非常好食。刺身有八款，有醬油醃吞拿魚、牡丹蝦、赤鯥、金鯛、油甘魚腩、赤貝、秋刀魚、拖羅。擺盤精美好看，份量十足。吞拿魚用醬油醃過，肉質結實而爽，魚味較淡。正好是秋刀魚最肥美的時候，所以廚師用時令食材做了這款刺身，鹽燒就食得多，但刺身真係未試過。秋刀魚都有分可做刺身或熟食之分，做刺身的要較乾淨肉質夠甜。而呢度的秋刀魚刺身伴醋汁同食，不但沒有腥味，而且帶魚香不油膩，肉質鮮味。金鯛經炙燒後，表面微微焦香帶脆，魚肉細嫩鮮味，軟綿綿的口感，魚味不算重，但魚脂平均。赤貝好大隻，切得薄身超級爽口。廚師仲加了檸檬汁，食落更清新鮮美。赤鯥魚，本人第一次食，原來呢款魚是天然環境成長，不能人工飼養，而且赤鯥魚行動敏捷怎爲難捉，所以好矜貴。同樣經秋炙燒魚皮後，有脆香味，魚脂豐富，入口不算即溶，但肉質鮮甜嫩滑。也很喜歡牡丹蝦，大大隻食落不但啖啖肉，而且蝦肉爽滑鮮甜，蝦頭還可以脆炸或做湯。油甘魚腩厚切質感好，好肥美魚油甘潤，腩位爽滑富彈性。最後食油份豐富的拖羅，拖羅也有分多個部份，呢款食落冇渣帶少少筋，質感油潤軟滑，魚味濃郁。雖然有點筋，但入口半溶化，油香令人回味。聖子皇珍寶的尺寸，肉質爽彈嫩淋，沾醬汁食更惹味香口。炒得梗熟，沒過老，所以好爽口。三文魚籽超級新鮮，好味得太感動，鮮味無比。口中咬破魚籽，鮮味從口中爆發直達味蕾，咸鮮味豐富，食出奇新鮮度。大讚好味。燒拖羅下巴，先燒香外皮再焗熟，外焦脆內油潤嫩滑。熟的吞拿魚不但唔腥，魚油燒溶更甘香，留在口腔久久不散，魚肉更是特別嫩滑細膩，有好多膠質含豐富骨膠原，女仔一定要食多點。炸物有茄子餃子。將茄子薄薄切片，包著餡料炸，餡料跟普通餃子的豬肉餡味道差唔多，茄子脆片好香脆，炸得夠透身。秋刀魚壽司，令我對秋刀魚改觀，原來秋刀魚刺身或壽司都超好味。不但傳來炙燒魚皮既香味，仲有豐富魚油的油香，入口直頭溶化，我覺得比拖羅更好味，太令人回味。三文魚生菜包，唔係泰國菜先有，大廚創意的日式料理，用生菜包著三文魚、壽司飯、脆脆、芝麻沙律汁。有如食緊三文魚沙律，酸酸地的醬汁好醒神，加埋生菜好清爽，正好清清我的味蕾迎接下道菜。醋醃漬小鰭，也是第一次品嚐，廚師先用鹽醃，再浸在醋中，看似簡單其實好考廚師的功力。咸度與酸度都適中，沒有搶味且提鮮，肉質結實爽滑，味道好好。福村壽司，是此店的西村先生自創的壽司，材料有三文魚籽、海膽、牡丹蝦及拖羅蓉。味道豐富有層次，魚籽的咸鮮、海膽甘甜、牡丹蝦的鮮甜與及拖羅的油甘香夾雜在一起，難忘的細緻味道。撈撈手卷，將拖羅、海膽、三文魚籽、醃黃蘿蔔等材料混合撈勻做手卷，味道有齊咸甜鮮香，但多了醃漬蘿蔔的酸味，更為清爽。壽司時經已超飽，最後仲有素麵，這個昆布鬚也是第一次食，味道同質感都幾特別。素麵好幼細，滑溜溜爽口微彈，昆布湯底清潤爽口。甜品是溫室蜜瓜及紅豆意大利奶凍。溫室蜜瓜完熟超甜美多汁，果肉軟身無渣，十分喜歡。紅豆意大利奶凍，奶味濃郁有忌廉的香滑感，加上粉綿甜美紅豆，為今次的晚餐畫上完美句號。總捨，雖然價錢偏貴，但食材新鮮，而且好幾款更是未食過，加上矜貴食材較多，廚房安排上菜進度也十分貼心，口味也按客人要求，不論食物和服務質素都頗高，值得再來。…Read More
