Wong Chun Chun Thai Restaurant

上回提到於黃珍珍訂枱時的不愉快經歷，在Openrice訂了枱，致電餐廳確認時卻告之滿座，怕白行一趟、十五十六唔知去唔去食之際，負責人當晚晚市後親自打畀我，同我確認有位，真心畀佢哋誠意打動。餐廳做緊問卷調查優惠至7/6，只要用餐後回答有關食物的問卷就可以用優惠價$38享用半自助午餐，包一款主菜，小食、飲品及甜品任食，用餐時間12:00-14:00，時限尚算輕鬆。全場只坐滿一半枱，好多吉枱，用問卷優惠的人唔多，名額只有大約9個人，聽店員講6月份的問券優惠已被訂滿，7/6後會全面回復正常午餐，現場都有唔少人以正價$89惠顧半自助午餐。我哋揀左紅咖哩海鮮飯同海南雞飯，紅咖哩唔辣但勁咸🤢海鮮有青口、蝦、魚各兩小件加上新鮮菠蘿，分量少(圖片的鑊仔好似成人手掌心咁大)，如果無自助吧的小食，一般OL都唔係好夠飽。海南雞飯味道一般，黃飯撈得唔均勻，中間仲有白飯😓，雞唔算滑，但勝在無骨。自助吧的小食唔錯，有燒雞扒、燒豬頸肉、炸蝦餅、青木瓜絲沙律、泰式鳳爪、蝦片、法包、灼菜、涼瓜湯。除左雞扒太硬太乾👎🏻，咬到牙肉都痛😖，其他食物都幾好，尤其是炸蝦餅同豬頸肉，夠juice夠嫩👍🏻！美中不足的就是醬汁太浠，好似水一樣，辣的唔夠辣，酸甜醬冇乜味。甜品有芋頭西米露、雞蛋大菜糕，有濃濃的椰香，正👍🏻飲品有3款，熱龍眼水、泰式奶茶、青檸水，淨飲偏甜，但配合辣的食物，奶茶好解辣👍🏻，青檸水解渴👍🏻值得一讚，餐廳侍應見我抱住個女攞嘢飲，光速跑過來幫忙👍🏻相信只係個別負責訂座的知客或收銀的問題。…Read More

黃珍珍泰國菜館係我家既家庭聚餐首選，九龍城分店係我常去既，朋友聚餐為咗大家交通方便，我哋會約在佐敦呢間，呢度我都經常來，格局同九龍城差異不大，只係九龍城本店比較大，樓上樓下兩層，空間大非常適合家庭聚餐，大量大圓枱。所以好嘢當然要帶埋好朋友一齊來品嚐，朋友同樣愛上呢度，我哋幾個女人不定期會約埋一齊吹水，講講是非，又分享下自己既私人事，所以飯聚非常重要，大家都可以發洩一下情緒，又可以放鬆下心情。我哋都非常熟悉呢度菜式，好似每次都既order都差唔多，柚子大蝦沙律柚子酸甜中帶澀加埋沙律醋令你更加開胃，其中仲花生同魚仔更加惹味，大蝦對我來說是可有可無角色。燒牛仔骨，燒豬頸肉，燒鱔完全睇得出我哋對燒烤既嘢幾咁支持，感覺似用炭火燒，鎖住肉汁，外脆內軟，再配埋菠蘿無咁漏，以前都是配蝦片，唔知幾時開始轉咗，可能怕大家太熱氣，好貼心，兩款我都鍾意，如果有得㨂就更好。咖喱炒蟹，配法包完美既配搭，香濃微辣既咖喱非常試合我，蟹都係要睇季節，有時都係無咩肉食，主要咖喱汁配法包非常美味。最後冬陰公湯（小）4個人分享剛剛好，不過只有兩隻大頭蝦，朋友話蝦膏好香，湯酸酸辣辣好過癮。總結大家對呢餐都好滿意，我仲有張九折卡，價錢真係唔太貴，最重要好味。…Read More

最近同8個朋友聚餐，揀選左久違了的泰國菜館晚餐，當晚人人放工都好遲下，變左食9點後時段，原來有7折，大家心想都幾平下，就好瘋狂咁點了11道菜。1. 燒豬頸肉2. 柚子沙律3. 肉碎生菜包4. 沙嗲串燒（雞/牛）5. 燒羊架6. 菠蘿炒飯7. 辣蒜生蝦8. 蒜蓉通菜9. 烤魚10. 咖喱蟹配麵包11. 小食拼盤另加 “冬陰功” + “香芒/榴槤黑糯米看似相當豐富，但要些時間分析一下…首先是“豬頸肉”，這道烤得不錯；“柚子沙律”作前菜真不錯之選，因夠酸甜；“肉碎生菜包”，此道菜可選大辣/少辣，我們揀少辣，結果是勁辣><；“沙嗲串燒”十分普通；“燒羊架”肉太哽，可能燒過火食唔落口><；“菠蘿炒飯”椰香味濃好香口；“辣蒜生蝦”不過不失；“蒜蓉通菜”油太多；“烤魚”外貌是不錯，但實在騙人😣，外面層皮唔脆+好咸，裡面亦有唔少骨，裡面魚肉好淡好淡，完全冇魚味；“咖喱蟹”此道菜要$400幾蚊，唔好以為一分錢一分貨，看似有兩隻蟹好豐盛，其實係空穀黎，腳冇肉食，懷疑被人抽晒d蟹肉去做其他菜色（可能係宵夜時段就偷工減料），總之好失望；“小食拼盤”一般，人多永遠分唔勻；“冬陰功”只有酸味唔夠辣；甜品方面，“芒果黑糯米”就比較普通；而“榴槤黑糯米”比較理想，榴槤夠香甜。環境方面，面積算中Size，設有房間（如10個以上可預訂房間位）；因為我們不夠10人迫住坐大廳，聲浪好大下🙉，而枱同枱之間幾乎冇餘位，變相行出行入都要人起身讓讓唔太方便；服務方面，員工有求必應唔錯。…Read More