🥰 話說早幾日太忙, 錯過咗一頓免費 “廚師發板”, 連續幾日心思思要食壽司, “千兩” “元氣” 乜都食過, 都係心有不甘, 今日老友 “陳登” 即興話請我食壽司, 我即刻打俾早前食過嘅 “舞鶴鐵板燒”, 原來已經收皮, 電話飛咗去原店 “舞鶴”. 呢間鮨店以前頗有名氣, 決定一試!📖 翻查資料: “陳登” 係三國時代人物, 曾效力陶謙, 劉備, 呂布, 曹操. “陳登” 嗜食生魚片, 胃中累積有寄生蟲, 因而重病, 經名醫華佗醫治痊癒, 但華佗提醒他此病三年後會復發, 需要有良醫在旁。三年後果然應言復發, 此時華佗不在, 陳登便因病死去.🥢 餐廳設一張L型14人壽司吧枱, 另外設數張卡位及方枱. 第一感覺係: 非常嘈吵. 點咗12貫壽司套餐, $530+10%. 由於師傅要處理普通枱嘅食物, 感覺就係好忙, 唔得閒同我哋講嘢, 冇乜交流.🥗 沙律. 正常, 配屈機醬, 乜都好食.🍥 茶碗蒸. 夠熱, 略甜, 鮮味跑出, 不俗.🍣 石鯛. 青檸汁帶起味道, 口感煙韌, 唔錯. 第一件就唔記得影相… 我偷偷地影番隔籬枱嘅第一件, 哈.🍣 右口魚. 炙燒咗一舊仔, 燒咗同冇燒嘅部份好似融合唔到, 一般.🦐 赤蝦, 配飛魚子. 赤蝦膠口, 飛魚子卜卜脆, “陳登” 讚口不絕!🍣 間八. 口感柔潤.🍣 金目鯛. 可能炙燒過龍, 麻麻地.🍣 中拖羅. 我幾鍾意呢種重金屬味, 可惜冇咗期望嘅醬油味.🍣 銀鱈魚. 燒到差唔多全熟, 冇特別.🐚 赤貝. 檸檬汁味唔夠, 反而海水味非常出色. 🍣 三文魚子. 以為冇料到, 點知三文魚子特別處理過嘅, 帶甜, 係我自己唔鍾意食.🍣 燒拖羅. 油份迫晒出嚟, 配炸蒜片, 好食. 只係覺得將大拖羅燒到咁熟有點浪費.🍣 海膽. 用上紫海膽, 忌廉口感, “陳登” 今日最愛.🍣 赤貝裙邊卷物. 味道比較弱, 紫菜亦都唔脆, 唔識欣賞.🍣 吞拿魚蓉手卷. 正常, 食到呢度, 唔知點解, 個口好攰.🥣 麵豉湯. 超級熱, 贏咗.☕️ 熱咖啡. “陳登” 讚口不絕.🍨 雪糕. 應該係紅豆味, “陳登” 問我係咪士多啤梨味?!🤗 總結: 非常嘈吵, 師傅好忙, 食得好唔安樂. 師傅只係講低魚名, 冇乜交流, 非常失望. 魚料質素一般般, 調味唔啱我口味. 以呢個價錢, 我諗到其他選擇.…Read More
。大肥爸爸要求高，最怕去到新餐廳往往舉目無親，所以搵到新地方XO仔都定必先打頭陣，食過覺得好就跟店員師傅打好關係，之後先敢帶佢去。最近細佬推薦大肥閱讀OpenRice名壽司食評家香港武滕鶴榮先生所編寫o既文章，大肥居然好似上咗癮咁 
，成日都會話要跟住武滕兄去食好野，小肥上週六就立即安排大食會一試被獲好評o既「舞鶴」。餐店位於銅鑼灣鬧市中一幢飲食商廈o既頂樓，由於當日大廈兩部升降機其中一部故障，要上去o既眾多食客都要排出街外，三十七度o既烈日當空真係唔係個個頂得順架 
，小肥早到半小時都要等上十分鐘，一點後到達o既七旬會友更要等上二十分鐘，未食已引起大家鼓譟，有幾個仲見有少少暈添，估計可能係輕微中暑 
。（據悉，其實早一晚部升降機已停止運作，但搶救行動卻要留待翌日早上繁忙時間進行，加上行後樓梯由高層離去又會令警鐘誤鳴，教人動彈不得 
，客觀分析，業主好似有少少趕客囉！）佔用全層面積o既「舞鶴」門面簡單平實，布簾身後o既白牆凸起店名，入門前已覺其作風甚為低調。直入先由合起雙手o既青蛙三寶代表歡迎。 
。店內o既兩間廂房都已坐有食客。大堂除咗有個可容納十六人o既壽司吧之外，貼窗亦排有一列二人散座。右邊則有兩張四至六人卡位，間隔寬敞，厚墊椅櫈都好舒適。光顧o既客人大多都有預先訂座，一入門口更會上前跟Andy師傅打招呼，睇黎餐店都係做熟客居多。「舞鶴」午市做套餐為主，餐牌合共有三頁。大食會全體都係壽司迷，訂位時已指定要坐壽司吧，好明顯大家都會清一色咁叫「自選壽司定食」 
。定食分八件同十二件兩款，前者$220 + 10%，後者$268+ 10%，兩者均包有沙律、茶碗蒸、味噌湯、稻庭烏冬或蕎麥麵、及甜品，極之豐富。整個七月內，只要用餐時喺Facebook打咭，即可享有九折優惠，聽落都覺得抵呀 
！與靚靚媽咪同姨媽食壽司，叫日本清酒飲已成指定動作，小肥就單憑面前o既酒瓶點選咗樽「鍋島三十六萬石純米吟釀」。鍋島三十六萬石純米吟釀（$680/720ml）：酒品一反傳統地以冰凍o既白酒杯上 
，芬芳o既香氣喺透明玻璃杯內迴旋，慢慢細嚐分外清新涼快。先上o既沙律酸甜醒胃，味噌湯味道都好正常。喺最餓o既時候有小碗熱辣辣o既茶碗蒸落肚，食落好似特別香滑甜美，會友們都好有同感地無一不讚 
。XO仔約親人食飯都例必早到，除咗因為想飯前周圍影相，最重要係要先向店員或店長道出各長輩們o既要求及喜好，例如大肥喺壽司吧度食壽司要續件上，小肥就要喺佢到步之前睇吓師傅能否作出特別安排，幸好幽默o既Andy師傅夠靈活性，乜都就哂我地，當真令細佬感激不已 
。打響頭炮o既金目鯛壽司鮮濃潤澤 
。三文魚壽司豐厚甜美。油甘魚壽司爽軟油潤。吞拿魚腩壽司柔嫩肥美 
。蔥吞拿魚腩壽司清脆嫩口。晶瑩剔透o既甘蝦壽司幼滑爽甜。火炙三文魚壽司柔軟滑溜。火炙吞拿魚腩壽司幼嫩肥潤，香甜無比。壓軸o既碎蔥雜錦魚碎手卷清香嫩脆 
。日本粟米（$68/四件）：大肥最愛生食北海道出品o既白色粟米，聽到師傅話有生粟米食就立即叫咗兩客，會友八人剛好每人一件。黃色o既生粟米應該同我地食開嗰啲北海道白粟米唔同品種，因為食落雖然都好爽，不過就好似唔夠清甜同多汁囉 
。套餐包有一小碗稻庭烏冬或蕎麥麵，可選熱食或凍食。小肥碗熱食稻庭烏冬煙韌彈牙，食完多件壽司更覺暖胃非常 
。是日甜品為透明o既黑糖啫喱，微甜輕巧，一啲都唔滯。跟餐原來仲有餐茶或咖啡，小肥就要咗杯熱咖啡作結。真係好多謝武滕兄於OpenRice度推介「舞鶴」，令XO仔同長輩們認識到Andy師傅，並於週六享用咗一頓價廉美味o既自選壽司午餐 
。得知整個七月都可享有打咭九折優惠，大食會部份會員更開始籌備月內再臨，為求一嚐晚市每位$1,180/位o既廚師發辦，希望到時唔洗再排到出街外等升降機啦。
