珍記大廚小食

珍記大廚小食絕對係我近期食過最有衝動覆卓嘅外賣小店，食物邪惡惹味份量超大份， 仲要價錢停留喺十幾年前，如果我住附近或者喺附近做野，一定會忍唔住日日食。珍記雖然只係一間外賣小店，但街頭小食、飯麵、撈丁都有，大大碗飯都係$32，加$3仲有埋凍飲，唔好講味道， 哩個價錢而家都難搵。避風塘豬扒飯($32) - 豬扒飯上面鋪滿炸蒜粒，咸咸辣辣超惹味，豬扒由一大塊切成五小塊，下面碗飯超大碗，麻甩佬都冇可能食晒，正常人我覺得可以兩個人share一碗，或者叫佢少飯。叉燒滑蛋飯($32) - 飯量同豬扒飯一樣咁多，滑蛋同叉燒份量都好多，叉燒有六七舊厚切，雖然冇得同燒味鋪嘅叉燒比，不過唔會太瘦太韌都唔差，滑蛋幾滑，比唔少得個樣嘅餐廳好食。炸雞脾($18) - 炸脾又脆又唔會成口油，雞肉唔會太乾，雞皮外面沈左好多鹽同黑椒，所以又係好惹味。煎釀三寶($10) - 相比之前幾樣野食，煎釀三寶味道算係較為普通，不過$10有六件絕對係抵食之選，如果本身唔係太肚餓，食一份都夠。凍檸茶(跟餐加$3) - 本身$32大大碗飯已經抵，仲要加$3有埋凍飲，除左普通咖啡檸茶檸水，連菜蜜都唔洗另外加錢。總結，炸脾同避風塘豬扒飯哩啲邪惡野絕對冇得輸，其他野食亦正常，哩個價錢有咁嘅味道絕對係超出預期。…Read More

原本今日happy friday，男朋友嚟接我收工好開心。但係臨收工先嚟開會，搞到遲咗成半個鐘頭先走，個人又攰、頭腦實晒⋯☹️然後男朋友就帶咗我嚟呢間街頭小吃店，俾我「任叫任食唔嬲」！🤣🤣🤣估唔到鋪頭細細間，竟然有滑蛋蒲燒鰻魚飯！😱 老闆娘話係最近先新推出嘅，緊係要叫嚟試吓啦！嘩，竟然係「圖文不符」！明明幅圖係得幾舊仔嘅鰻魚，個飯送出嚟係成條鰻魚嚟㗎囉！🥺 賣$58嘅鰻魚飯簡直超值啊，仲有滑蛋真係滑嘟嘟㗎！😋講到香港嘅特色街頭小食，點少得煎釀三寶、韮菜豬紅、豬皮蘿蔔，同茶葉蛋呢？！今晚咁啱賣晒蘿蔔，唯有「怒叫」晒其餘三樣啦！😆 煎釀三寶$10有六件任選，煎得剛剛好唔會太熱氣，又唔油膩。韮菜豬紅$20份量十足，調味唔會太重口味，豬紅亦大大粒唔會一夾就散。茶葉蛋$10三粒，咬開可以見到成個蛋白都變晒色，滷到入晒味！😋見到小店寫住「馳名食雞」，我哋兩隻「雞精」又點可以錯過呢？！😎 招牌蔥油雞扒好特別，厚肉嘅雞扒煎得好香脆，配埋招牌蔥油非常香口！仲叫咗麻辣手撕雞，叫咗中辣食落都唔算好辣，下次可以挑戰大辣喎～😌 一碗手撕雞裡面超豐富，有雞絲、芽菜、菜甫、紅蘿蔔絲等等，非常之足料好味！獲得「雞精」誠意推介～🤣好耐冇咁樣坐喺街邊食街頭小吃，平民嘅價錢就可以食到咁多特色小食，真係好滿足啊！…Read More

這間珍記大廚地方細細，門外只得一張枱給客人坐，所以大多數都是外賣吧。但餐牌選擇都頗多，除了有掃街美食，燒賣，魚旦，煎釀三寶等，還有很多他們的招牌小食，他們馳名食雞，是自家醃製的，所以蔥油雞扒，炸雞脾，鹽酥雞都是他們的推介。大大碗蔥油雞扒飯，只需$32 ，已經是二人份量吧。雞扒大大塊，炸得皮脆肉嫩，重點是他們的手剁蔥油，十分香濃，送飯一流。大大隻的邪惡生炸雞脾，炸得金黃，肉嫩多汁。最好襯熱食啊!豬扒包內的豬扒香煎過，夾著生菜蕃茄沙律醬減輕油膩感，如果個包身可以烘脆一點會更好。另外煎釀三寶$10 有6件，這個價錢很久沒見了，有豆腐/茄子/青椒/紅腸/蟹柳等供應。釀的魚肉不是一團粉漿，而是真魚肉，讚呀!這裡的自家製的辣椒油都值得一試啊~…Read More

之前坐巴士經過石硤尾，見到有間新開嘅小食店幾光猛。今日Lunch就同同事行過嚟買外賣試下，小食店係一眾舖仔入面最多人幫襯嘅👏。我哋睇緊有乜食之際，有個後生仔同我哋「介紹返」，我仲以為佢都係客人等緊嘢食😆。後生仔應該係老闆，佢同我哋介紹呢到嘅🐓雞類食品係最出名，例如蔥油雞扒等等。其實基本上呢到每樣食品佢都好落力簡介，比起Omakase師傅更為詳細同真誠🙈。皆因小店一月先開張，但就遇上疾情問題，所以佢只能夠加倍努力💪，希望襯呢個時世做多啲街坊生意。經老闆介紹下，我哋嗌下嗌下都嗌咗唔少嘢食🤤，好彩有大媽喺到，全部食得哂。見老闆咁落力，雖然我哋買外賣，但都襯食物新鮮滾熱辣整好嘅時候，影張相幫佢宣傳下。炸雞髀🍗($18)，勁大隻喎！我哋落單後，見住呀姐即刻拎去生炸。外皮幾脆，雞肉唔淡，不過雞皮某啲位鹹咗少少，啲鹽可能灑得唔夠均勻。沙嗲牛撈一丁🐮($21)，本身老闆極力推介蔥油雞扒，但我哋已經嗌咗雞髀，所以要沙嗲牛；不過老闆都堅持加啲蔥油俾我哋試下XD。呢到嘅沙嗲牛好高質，個汁好好食好濃，同事話係用咗沙茶醬，同平日普通嘅沙嗲有啲唔同喎。另外，牛肉份量好多，肉片好嫩同好大片！麻辣手撕雞米線🐔($32)，我哋都驚拎到返去米線會淋咗同脹哂，好彩無。老闆問我哋食唔食得辣，佢話佢哋秘製嘅”麻辣”辣過”辣”，所以跟佢要咗”辣”；但食落其實都幾辣下🌶，勉強頂得順。啲辣係撈落手撕雞到，而唔係個湯底，如果乾撈米線效果可能更佳。特製豬扒包🐷($25)，呢個包又係老闆誠意推介，佢好講究包同餡料嘅配合。包包一定要新鮮食，先食得出成個組合嘅精華所在。包包外脆內軟，入面好多沙律醬，連埋蕃茄、生菜同豬扒食，正👍。煎釀三寶🍢($10/6件)，呢個真係超抵食，雖然比較細件，但比平日多款式，更加繽紛。呢到係五寶，包括青椒、茄子、豆腐、紅腸同未見過嘅蟹柳！味道唔錯，不過釀魚肉厚啲就好。炸多春魚🐟($14/4條)，因為請埋其他同事食，所以要咗兩份。呢個就正正常常啦，無乜特別。總括嚟講，呢餐真係好豐富，食到好飽，而且每樣食物味道都幾好😋。大部份都係香港傳統小食，但同時加入咗小食店嘅自家製心思。再者，定價非常平，份量多，啱哂做附近居民同學生生意；希望學校快啲復課，小食店客似雲來。畢竟睇得出老闆有花心機設計菜式，例如佢話呢度賣埋米線係因為學生鍾意食米線多過飯，另外仲有賣日式小食如炸蝦同冷麵，以切合客緣口味。最後，我發現呢間小食店係撐香港人的店💛。…Read More

同朋友行JCCAC之前去醫肚先，見人地食緊炸雞肶好吸引，所以試一試~我地3個人，每人點咗兩樣野，包括炒米粉（＄14）、吉列大蝦（＄18）、炸雞脾（＄18）、煎釀三寶（＄10 6件）、特製雞扒包（＄25）同埋蔥油雞扒撈丁（＄21）。好難得既係每樣野都即叫即整，新鮮熱辣！炸雞肶係我既至愛，隻雞肶大大件啖啖肉，加上皮脆肉嫩又多汁，正！煎釀三寶10蚊就有6件，超抵！仲要每件都炸得香口，最鍾意豆腐釀魚肉，外面金黃，內裏嫩滑😋吉列大蝦外皮脆口，蝦肉彈牙，忍唔住食咗3隻🙈炒米粉本身味道較淡，有辣醬同麻辣醬可以自己調味。朋友本身嗜辣，兩隻醬都有試，話辣醬夠香，但後勁唔會太強，唔怕令喉嚨唔舒服。而麻辣醬就辣味重d，不過麻得嚟唔會嗆喉，食落過癮。蔥油雞扒撈丁既重點在於蔥油，一遞過嚟蔥香四溢，撈埋出前一丁好惹味！特製雞排包比想像中大，麵包鬆軟，內裏既雞扒好厚身，份量毫不吝嗇！食完好飽好滿足…Read More