真姐港台美食

今日過去駱駝漆買完甜品，經過樓下有間小食店幾多人排隊，順便買咗幾個小食返屋企食！沙茶炒腸粉（$35）即叫即炒，睇住老闆娘攞起啲白腸粉剪完再煎，雖然話係小食但原來份量都幾大，仲落咗好多料包括芽菜、粟米等等，沙茶醬油份好夠好惹味！粢飯（$20）粢飯熱辣辣，拎上手比較腍，內餡有油炸鬼、榨菜，夠曬飽！煎釀三寶（$30）款式好多，但咁啱冇晒茄子，我就叫咗青椒、尖椒、紅腸、苦瓜、豆腐、魚蛋，個人尤其欣賞個紅腸，釀得夠貼，又煎得岩岩好！生菜魚肉（$30）同樣係即叫即整，生菜夠爽口，魚肉彈牙。花雕雞翼尖（$40）凍食嘅雞翼尖，份量都唔少，煮得幾入味又香！老闆同老闆娘都好好人，仲要開廿四小時，喺附近返工收夜或者想買宵夜返屋企都好方便！…Read More

放假又去咗駱駝漆行吓，嗰頭一向都人山人海。近入口位置有間小食店叫「真姐港台美食」，見好多人幫襯，買完仲直接企喺度食，相信質素應該有返咁上下😜。由於差唔多時間返屋企，所以我就決定買返去慢慢嘆，始終天氣仲係好熱🥵。小店門積唔大，不過所賣嘅食物款式都幾多，而且話明港台美食，香港同台灣嘅食品一應俱全。雖然係小食店，但如果講份量的話，佢一啲都唔少。外賣包裝企理，食物賣相吸引🥡。黃金炒飯($40)，我睇住老闆娘喺電飯煲裝飯出嚟再拎去炒🍚。炒飯好大盒，而且真係炒至金黃色，每粒飯都乾爽分明，難怪叫黃金炒飯💛。雖然唔係用咗好多料炒，🍳但蛋香好突出，都OK！爆料炒麵($35)，🍜炒麵堅係用足料炒，餸料將麵條覆蓋，包括各種蔬菜(茄子、四季豆、椰菜、紅蘿蔔同雜菇等)同肉碎，食落口感豐富。麵底係公仔麵，甚至可能係營多🤣？但最緊要夠惹味。牛雜($40/細)，小店嘅牛雜好出名🐮，一串真係唔夠食，要一碗就差唔多。細碗份量啱啱好，而且各個部位嘅比例好平衡，有齊牛腩、牛肚、牛肺、牛膀同牛腸等。佢哋炆得好入味，淋得嚟又有啲咬口，五香味恰到好處，唔會太苦或太重口味。煎釀三寶($30/8件)，呢度嘅煎釀三寶款式多，色彩繽紛🌈。我每樣都試咗一件，分別有茄子、紅腸、苦瓜、青椒、尖椒、豆腐同淨魚蛋。魚肉口感彈牙，亦唔算釀得太薄，我第一次食釀苦瓜，甘甘地，幾清新！由於太多人幫襯，我哋都等咗陣🙈。老闆娘勁好人，話等咁耐唔好意思，所以請我哋飲豆漿。🥛豆漿係佢自家煲製，味道天然，無多餘嘅甜味。總括嚟講，呢間超旺場嘅小食店出品唔錯👏，價錢大眾化，而且仲帶濃厚嘅人情味❤️，下次經過我都會再幫襯！…Read More

駱駝漆大廈真係又多嘢睇又多嘢買，行得耐咗就想買啲小食，就幫襯吓呢間真姐港台美食。早餐時段有套餐供應，今時今日嘅物價算係幾抵食。港式小食當然唔少得煎釀三寶，$20/5件，$30/8件，我每款要咗一件，食物新鮮，魚肉都彈牙。 行到鋪外已經聞到香噴噴嘅惹味牛雜，都好多人幫襯。陳皮魚蛋有辣有唔辣，熱辣辣又夠大粒。炸魷魚鬚同一般食開嘅做法有啲唔同，而佢嘅魷魚鬚特別大條，所以勁爽口。生菜魚肉嘅魚肉相對就比較腍身，勝在湯底夠鮮味。魚肉同生菜嘅份量都唔少。呢度仲有台式小食，爆漿芝士蛋餅入面有滿滿嘅芝士，真係會爆曬出嚟。肉鬆粢飯就買嚟第二日做早餐，入面都係爆曬餡。呢度位置夠晒方便，行開觀塘都可以幫襯吓。…Read More