Genki Sushi (Kornhill Plaza North)

3月5日, 今日呀菲呀比150週月紀念~ 呀菲返住工都特登飛個的去搵呀比lunch! 呀比就一早去拎定飛定位等我~ 因為平日lunch time呢度係超多人嘅, 所以午市時間一定要早d去到位!::: 三文魚腩 ::: $10 x 2大滿足之選~ 三文魚腩肥美, 大條, 比普通三文魚油潤, 確實不錯~::: 赤海蝦 ::: $10 x 2都係大滿足之選~ 赤海蝦大大隻鮮甜嫩滑口, 新鮮美味!::: 海鮮沙律軍艦 ::: $14以前鐘意食北寄貝沙律, 而家無左就唯有食呢個代替. 軍艦壽司嘅整體份量好似比以前細件左, 但好在用料都唔錯, ok啦.::: 海膽軍艦 ::: $40海膽軍艦都係比較細件, 上面海膽粒粒分明, 勝在夠新鮮! 最怕食到d唔新鮮既海膽壽司, 食落一大陣腥苦味... 呢個海膽軍艦就夠新鮮甜美~ yummy~::: 帆立貝壽司 ::: $16 x 2帆立貝壽司又軟又嫩, 食落亦有帶子鮮味~ 又係我地每次必叫之選!::: 牛油果軟殼蟹卷 ::: $20牛油果軟殼蟹卷新鮮整好, 軟殼蟹夠香脆惹味, 夾埋牛油果同松子仁一齊食味道口感更豐富, 青瓜又中和番炸軟殼蟹嘅油膩~ 其他地方既花巧卷物都比不上~::: 炸蝦卷 ::: $20炸蝦卷賣相好整齊, 炸蝦係剛炸起, 外層鬆脆~ 配上紫菜同壽司飯, 滿足!雖然元氣係一間迴轉壽司連鎖店, 但品質一直都維持到~ 除左d高級日本壽司店, 元氣一定係我地食壽司既首選!…Read More

早一排師傅百無聊賴, 撞啱放飯時間又唔知食咩好, 行下行下就黎左呢度; 師傅見咁耐冇食過壽司, 加上從未試過一個人食, 正所謂人一世物一世, 點都要試下, 於是就咁行左入去!侍應安排迴轉枱, 坦白講迴唔迴轉師傅都冇咩所謂, 反正迴轉過後都又係落單柯打, 冇咩分別; 於是師傅坐底後就睇下有咩好食, 接住就係邊吃邊落單, 邊落單又邊吃, 最後一條友食左八大樣, 有鰻魚壽司, 蒸蛋, 蟹籽沙律壽司, 他他牛壽司, 炸蝦卷, 吉列豬扒手卷, 煙三文魚壽司同飛魚籽壽司! 說真師傅對魚生刺身類一向麻麻, 所以都係攻其熟食為主, 先講下有鰻魚壽司, 鰻魚壽司帶少少腥, 仲有少少骨添, 所以放入口時真係萬二個小心, 費事整損個口啦; 蒸蛋就熱辣辣, 蛋本身真係蒸得好滑, 口感一流, 不過裡面嘅海鮮又係比較腥, 嚴重影響蛋本身嘅味道, 扣分; 蟹籽沙律壽司就一如以往冇驚喜, 入口青青爽爽, 不過不失啦; 他他牛壽司嘅他他牛都幾鬆身, 而牛有少少筋, 都有牛味, 算係不錯架喇!炸蝦卷就真係炸得好香好脆, 而蝦身爽口, 加上細細粒容易食, 一啖一粒, 都幾好; 而向來係師傅最推祟嘅吉列豬扒手卷就同呢期恆指一樣, 直線下跌, 因為吉列豬扒十分乾身, 肉身亦較鞋, 同以往有好大出入, 雖然紫菜依然脆口, 但可惜挽回不到分數, 失望; 煙三文魚壽司嘅三文魚煙得唔香, 而且比較生同黏口, 入口已經唔掂, 點知仲要腥, 好彩得兩件, 如果多兩件都唔知點死; 最後係飛魚籽壽司, 飛魚籽可以話係最冇難度嘅壽司, 最重要係d飛魚籽要卜卜脆同埋紫菜夠脆口, 呢點佢地做得到, 不錯, 可惜飛魚籽份量略少, 扣少少分!總括黎講食物水準下跌唔少, 服務就幾好, 環境舒服, 至少呢間見唔到老鼠, 而價錢就唔算平, 埋單一個人成舊水多少少, 雖然食得好飽, 但談不上好味; 原來一個人黎食同多幾個黎食係冇分別, 只係一個人就食多幾件食少幾款咁啫; 是次一人前午膳笑臉真係難比, 勉強接受到, 但再來機會不大 !…Read More