Jervois Cafe

今晚屋企無飯開，就約咗老死出嚟食飯，趁住要出旺角換啲信用卡禮物，所以，食飯選址於旺角區，加上老死住新界，近番旺角東站佢亦方便走人。最後，搵到嚟「蘇杭冰室」，一來大家都鍾意茶記，二來見佢上環店嘅風評不俗，再者，見佢啲扒餐好似幾得，老死又想平平哋鋸吓扒，所以，就定實晌度食。 旺角即喺旺角，人流多，踏進餐廳，一眼望落都乘幾滿，幸好茶記就喺快上快落，就算要等都唔會耐。餐廳環境唔玩懷舊，反而有啲北歐簡約風，一室淺木色系，牆上掛咗唔少植物作點綴，啲燈飾亦幾有風格，整體裝修予人感覺清爽。 最鍾意啲卡位，專登間高啲間板，咁樣覺得防疫效果會更好，用餐都安心好多。加上整潔光猛，個人都醒神啲啦。 而枱面只放咗少少調味料，各樣餐具就如大多數茶記咁，放晒晌側旁嘅拉櫃中，自由取用，唔使煩住啲侍應。 食物嘅選擇上，一如茶記特色，包羅萬有，仲有好多乜餐物餐。之但喺，佢哋亦有唔少招牌特色嘢，如煲仔麵餐、招牌蔥花滑蛋飯系列、推介扒餐……等等，最神奇，連梳乎厘班戟、火焰雪山都有。可惜今晚唔喺同老婆嚟，否則佢一定會試。飲品除茶記常見嘅之外，更有多款如無酒精雞尾酒嘅「蘇杭特飲」。煙肉忌廉湯扒餐包餐湯，但就只得一款忌廉湯，原以為只喺普普通通嘅忌廉湯，原來仲加咗好多煙肉碎，入口忌廉湯打得柔滑細緻，卻又有陣陣煙肉嘅鹹香味。炭烤西班牙有機豬鞍扒 $158老死話揀豬鞍扒，因為既來自西班牙，又喺有機飼養，心想自然質素會秤高啲。成品出嚟嘅賣相比餐牌好，以木鉆板作餐碟，好似啲高級西餐廳咁。豬鞍扒外觀燒得好靚仔，一條條坑紋縱橫交錯，一身炭火香，而豬鞍扒嘅份量亦唔少，好厚身，配上大量炸薯條及烤蔬菜。豬肉就一定要全熟，但切落感覺卻喺非常之軟腍，小弟都試咗一小件，入口好腍身，完全無粗嚡感，豬肉味的確稍勝一籌，確喺一件高質素嘅豬鞍扒。炭烤紐西蘭羊扒 $168小弟對幾款扒餐都有興趣，不過，羊扒就偏愛少少。我嘅炭烤紐西蘭羊扒賣相一樣唔失禮，一客有3支，燒得表面甚有炭火嘅焦香，非常誘人。肥膏唔多，所以，羶味唔算好犀利，但仍保持到羊肉嗰種獨特嘅味道，要咗5乘熟，食落外層帶微焦，裡面又腍又富肉汁，沾上少少黑椒汁，更香濃惹味。幼身薯條炸得好香脆，唔油膩，而扒蔬菜亦無交行貨，都喺啲靚嘢，如意大利青瓜、新鮮蘑菇、水果黃甜椒、烤原個蒜頸，睇得出喺誠意出品，仲幾好食。菠蘿冰 +$9扒餐包基本熱飲，凍飲加$3，特飲就加$9。老死話食扒就配啲清爽凍飲，所以，揀咗懷舊菠蘿冰，原以為無咩特別，佢話菠蘿似喺用上新鮮菠蘿粒，非罐頭貨，原因一來菠蘿嘅味道清甜啲，二來菠蘿嘅形狀較巗巉，唔似罐頭貨啲切口咁齊整。奶茶紅豆冰 +$9平常去茶記，十居其九都喺揀飲熱奶茶嘅，不過，今晚鋸扒，就轉飲杯凍飲，最心水都喺奶茶，亦鍾意紅豆冰，所以，奶茶紅豆冰就可以滿足晒兩個願望。個茶底夠晒香，再配以大大粒飽滿嘅紅豆，又腍又清甜，襯羊扒一樣OK！雖然今晚只喺嚟到茶記，但兩份扒餐做得認真唔失禮，有樣有內涵，所以，越晏越旺場，真喺有時都唔可以睇小啲茶記，出品一樣有級數。…Read More

有間冰室，似乎好受歡迎，要拜會佢就要過海，但終於有好消息旺角原來都有一間，唔使捱貴車費食佢喇好少地方會有三拼滑蛋飯，而且價錢同雙拼一樣，當然係要一次過食叉燒、滑牛同蝦仁啦！三拼感覺協調之餘，更各有千秋。蛋滑、牛滑、蝦滑、叉燒亦滑，太黯然喇芝士撈麵同樣出色，芝士多得嚟又唔會膩，同麵嘅份量好平衡加上最佳拍檔吉列魚柳，毫無負擔咁KO咗成碟撈麵豬鞍火候唔錯，肥瘦剛好，蔬菜都燒得好有火氣，意粉幾香牛油味另外碗白湯加咗啲粉絲，口感提升咗梳乎厘pancake軟度啱啱好，空氣感十足，抹茶蕨餅同醬都超足抹茶粉，澀得相當刺激呢度嘅飲品竟然係玩fusion，可謂大膽。班蘭同紅豆冰居然可以共處一杯，紅豆同濃郁嘅班蘭醬夾到無倫本以為藍莓奶茶一定係藥水味，點知茶味勁出，又不失果香，原來真係咩都有可能…Read More