Gor Gor Mui Mui (Closed)

去觀塘接個朋友收工，佢帶咗我去食創紀之城一期樓下嘅新餐廳 — 哥哥添飯•妹妹泡茶。個餐廳名夠曬特別，裝修好文青，原來係台式fusion餐廳！岩鹽咸豬肉拼皮蛋醬生菜包 配蒸刈包（$108）一塊塊咸豬我配上非常特別嘅皮蛋醬，夾係軟香刈包入面食又得，夾係爽口新鮮生菜入面食都得，自己DIY配搭別有一番風味！鹽酥脆炸雞拼魯肉飯（$108）份量幾大，我哋揀咗唔辣嘅鹽酥脆炸雞，竟然有成半隻，炸到好酥脆嘅雞髀同雞全翼各一件，同油香十足嘅台式魯肉飯超夾，仲有椰菜絲沙律，可以去除炸物嘅油膩又清爽！升級時令前菜三小碟＋滷肉青菜/杞子燙青菜＋小甜品（+$10）今日嘅前菜有蒜片花生、甜苦瓜同漬物，個人好推薦杞子燙青菜，口味清淡但淡淡杞子香！小甜品就係朱古力同忌廉泡芙！起司肉鬆蛋餅（$42）正常發揮，煎得夠熱芝士半融，蛋餅上面有沙律醬同茄汁，口味偏甜。薰衣草芒果烏龍（+$25）用咗好靚嘅高身玻璃雕刻杯，好啱打卡，烏龍茶入面有一大片葡萄柚，茶香但唔苦，飲落幾清新，加上薰衣草香氣，有種寧神放鬆嘅感覺！乳酪芝芝蘆薈巨峰（+$38）最上面係較為輕身嘅芝士奶蓋，帶有淡淡乳酪嘅酸，同埋勁多蘆薈，超滿足！…Read More

之前火炭店已經想試 但得外賣遲遲都未try觀塘竟然開左堂食 終於有機會食下以簡約純白文青風作裝潢的台式料理店質素都很不錯 份量都好大份好有飽足感😗有魯肉飯.乾拌麵.湯麵.更有多款台式小吃等!.▫沙茶厚豚及夜市小香腸配四色乾拌麵 $88e勁大塊豚排😳 炸得外脆內嫩有肉汁!啖啖肉同時有肉感 加埋沙茶醬好惹味仲有涮咀小香腸煙韌juicy～更有溏心蛋.菇.紅蘿蔔絲.海帶絲等拌麵記得要沾埋沙茶醬!! 口感整個很豐富:).▫麻辣牛肉牛筋湯麵 $88同樣地好大碗😜 湯底帶點微辣 味道濃而不膩仲加左些蟲草花去烹製 令湯頭更香!麵條彈牙爽口 牛肉牛筋份量頗多 都好軟嫩入味😚.▫滷肉青菜+定食三小碟 +$10滷肉調味剛好 好香口 用黎拌飯應該都唔錯三小碟有椒鹽蝦仔.醃菜.黃瓜(?) 分別都好開胃.▫重碳焙桂香烏龍奶茶 + $16好似應該嗌花茶的🥺 見人地好igable!不過都幾好飲 茶味突出好香醇 飲落都好順口:)…Read More

呢晚見返上年一齊學畫畫嘅同學仔，見面自不然就會講起畫畫嘅嘢～比起畫畫，有時更鍾意討論同欣賞畫作。·醬麴紅燒鍋肉配流心炸蛋🍳再配滷肉青菜🥬呢種肉嘅整法，其實係有啲似東坡肉，都係炆得好冧又好入味。不過唔同嘅係肉嘅脂肪比例就會瘦返少少，而醬麴嘅味道係幾微妙嘅，有種講唔出嘅特別味道喺度，我係覺得唔錯啵～至於個炸蛋💣 🤣⋯⋯就好似一隻煎蛋變返一隻完整嘅蛋嘅形狀，係幾過癮喎～·養生花雕鮑魚醉盤配燙青菜🥬花雕酒味好重，唔理係鮑魚、雞，定係蝦都好入味～雖然有酒味，但係都易入口嘅！落埋少少杞子做點綴，好睇又好食～😋·大腸包小腸🌭雖然佢唔係熱狗，但係佢就好似台式嘅熱狗咁～用糯米整到好似麵包咁嘅形狀，中間預留位置放條台式腸落去。佢係一款食落會飽肚嘅小食～🤔咁我覺得重點係好食同成件事係夾嘅～·QQ紫芋波⚽️🏀甜甜嘅紫芋餡，加埋外脆內軟嘅外皮；熱辣辣同上面加咗酸酸嘅沙律醬，去咗嗰少少油膩感，成件事係幾好嘅～·肉桂蘋果紫羅蘭🍎- HOT肉桂味好犀利，一飲就好濃烈地湧出嚟～跟住出嚟就係蘋果清香，最後就係一種我好陌生但又好特別嘅味道，相信呢啲就係紫羅蘭。🤔🤔咁呢個組合係幾微妙，係值得一試～😎·水蜜桃🍑果粒愛玉 - COLD一飲就係濃郁嘅水蜜桃🍑味，但係做得好嘅就係佢唔太甜，飲落去係舒服嘅～😌再有少少愛玉可以咬吓，咁成件事係好嘅～·九層塔一口鹽酥雞🐔其實炸得脆口，脆皮唔好太厚，夠熱就得～比較特別嘅就係有九層塔嘅味道，佢成功整走咗一啲鹹同油膩嘅感覺⋯⋯🙊所以都食得開心啲～😬·鮮手工製芋圓奶茶可能我哋講嘢講得太多，講到臨尾有啲口渴，所以我叫多咗杯嘢飲。😂😂想讚一讚佢啲芋圓，夠彈牙爽口，唔同顏色真係食到唔同味道～😯有啲出奇蛋嘅感覺⋯⋯🤪·或者咁講，大概我哋生活要搵到一啲興趣，再將佢成為樂趣。對生命有passion，遇到一啲spark先有繼續落去嘅動力⋯⋯🧐🧐畫畫可能係其中一個可能性。🤨…Read More

今日去開觀塘，順便黎創紀之城既哥哥添飯•妹妹泡茶食返餐，之前食過發現野食質素唔差而賣相有心思，仲要唔收服務費，一於encore先。哥哥添飯•妹妹泡茶係做台灣菜。呢度有堂食晚市套餐，包前菜，主菜6選一，同小甜品，加配飲品有$10折扣。不設加一服務費。飲品有唔同種類既台式飲品如奶茶，果茶，氣泡系列等等。另外餐牌仲有夜市小食，同滋潤甜品。今晚我哋好肚餓，叫左兩個堂食晚市套餐，3份夜市小吃同兩碗甜品大快朵頤。胡麻醬青瓜雞絲沙律 $33胡麻醬青瓜雞絲沙律係加左手撕雞嘅青瓜絲，撈左胡麻醬同加左花生，食落清爽又夠味道唔會寡。服務員仲另上兩細盒胡麻醬，比你唔夠再加。九層塔一口鹽酥雞球 $28九層塔一口鹽酥雞球一客10件，有大有細，份量算好多。鹽酥雞新鮮炸起，皮算脆，肉有少少實，味道帶少少辣，幾惹味，連九層塔脆脆我都清哂。QQ紫芋波 $22QQ紫芋波一客5粒，上面加左少少沙律醬，都係熱辣辣上枱，食落煙韌，而且味道少少甜，夠紫薯味，唔錯唔錯。堂食晚市套餐係成份餐咁上俾你。破布子煎封比目魚配蟹肉菠菜圈 $128煎封比目魚賣相好好，一客兩件，煎得皮脆肉滑，有少少骨不過問題不大，上面加左幾粒連核橄欖，味道剛好唔過鹹。蟹肉菠菜圈係新鮮菠菜圍圈再加啲蟹肉同蟹籽喺上面。另配一碗熱白飯。呢款主菜好健康，食材質素唔錯。前菜三款有椒鹽爆溪蝦，漬物拼盤同甜甜哋嘅苦瓜。椒鹽爆溪蝦唔算鹹，好鬆脆可口。漬物拼盤居然有牛蒡，好健康。小果物變左兩粒抹茶嶡餅配紅豆蓉，嶡餅味道正常，係較易散開，配紅豆蓉好夾。養生花雕鮑魚醉盤 $128呢款養生花雕鮑魚醉盤係星期二，四，六限定。今日可以叫。花雕醉盤賣相好特別，好似迷你下午茶架咁，上層架有鮑魚同蝦仁各一隻，仲有糖心蛋半隻，下層架有醉雞件，全部食物嘅藥材同酒味都超濃，味道甜甜地。質感方面，鮑魚有嚼勁但唔韌，糖心蛋嘅蛋黃係軟心，醉雞都好嫩。浸住湯嘅仲有青瓜絲，杞子，同玉竹。另配一碗熱白飯。時菜可揀滷肉青菜或者燙青菜，我哋揀左前者。滷肉青菜係新鮮油墨菜加上味道好好嘅滷肉碎，份量唔多不過夠食，完全無油好健康。鮮手工製芋圓奶茶 跟餐加$26 老細萬歲黑糖珍珠奶茶 跟餐加$18兩杯奶茶都大大杯，黑糖珍珠奶茶有成3份一杯咁多珍珠，珍珠食落非常煙韌，正。鮮手工製芋圓有3色，分別係芋圓，地瓜圓，紫薯圓。芋圓質感都算煙韌。奶茶好滑，茶味好濃，我哋叫左無糖同去冰，所以完全唔甜，而黑糖珍珠奶茶就帶少少黑糖嘅甜味。混一式綜合手工芋圓 $44混一式綜合手工芋圓有勁多料，包括芋圓，地瓜圓，紫薯圓，愛玉，珍珠，紅豆，綠豆，蘆薈，味道可揀黑糖薑汁或者梛汁。我地揀左椰汁。呢碗糖水超足料，滿滿一大碗，料多到滿瀉。食落口感勁豐富，有煙韌嘅芋圓同珍珠，滑溜既愛玉，腍腍嘅紅豆，仲有爽爽地既蘆薈，椰汁味道唔會太甜，反而紅豆蓉較甜。食完勁滿足！大三圓紅豆黑糖薑汁芋圓 $40呢碗甜品材料就簡單少少，有芋圓，地瓜圓，紫薯圓同紅豆。味道可揀黑糖薑汁或者梛汁。呢碗我地揀左黑糖薑汁，味道少少辣，加埋甜絲絲既紅豆蓉就又辣又甜。芋圓，地瓜圓，紫薯圓各2粒，紅豆蓉超多，味道都偏甜。裝修光猛，座位都正常。食左咁多野人均先兩舊水鬆啲，小食同甜品尤其抵食。…Read More

星期六又係我同呀媽撐枱腳嘅日子，兩條友廢事煮，所以近近哋出咗觀塘食。我想食台灣菜，上網搵到一間叫「哥哥添飯•妹妹泡茶」嘅食店，見個名咁過癮，就一於幫襯吓🤣。小店位處於創紀之城一期地下，即渣打銀行大樓嗰度，個人認為觀塘站比起牛頭角站行過去近些少。餐廳裝修唔錯，有一面落地大玻璃窗，整體行小清新路線🌿。餐廳三點後就賣晚市套餐🍱，價錢由$69至$128不等，另外仲有單點食物可選。套餐內容超豐富，有好多細細碟，彷如韓國菜，造型滿分💯。沙茶厚豚乾拌麵($87)，🍜乾伴麵用上白麵條，同刀削麵及拉麵唔同，口感偏軟，嗰種淋身並非因為煮得過熟而成。撈麵嘅配料有溏心蛋、粟米粒、青瓜絲、蘿蔔絲、菇同埋木耳絲，撈埋食能夠提升口感，加點爽脆效果。沙茶醬原來係直接放落麵度，味道幾香，但如果可以濃味啲同鹹啲就更惹味，我食開重口味嘛。最後，🐷厚豚係煎豬扒，分開另上，上碟時經已切件，食用方便。哥哥招牌塩麴雞拼傳統台南香菇蝦米油飯($83)，塩麴係指調味料，佢用於醃雞。🐔雞係用上類似切雞嘅連骨雞件，並非雞扒，係傳統中菜風味。隨雞附有酸辣汁，以及冬菜粒同青瓜絲伴飯食。另一邊廂，油飯富有自家特色，🍚飯粒染上醬油啡色，並混入香菇片，味道恰到好處，香而不膩，軟硬度適中。另外，仲有一隻煎太陽蛋添。唔知我有冇聽錯，店員好似話可以添飯！前菜有三款，會因應時令供應更改。🦐椒鹽爆溪蝦細細粒，用上椒鹽爆香，連殼食埋酥脆無比。苦瓜經蜜糖醃製後，苦度所剩無幾，得返甜味。漬物拼盤有三味，牛蒡最為入味兼好食。套餐仲會配上青菜，可揀滷肉味或原味，識食一定揀前者💚。青菜採用A菜(即油麥菜)，口感爽脆，伴上滷肉粒以添鹹香。此外，每個餐亦會送上時令水果杯，顧及健康需要。飲品方面，跟餐嗌台式飲品可享$10優惠🈹。我哋要咗有時候想喝紅豆奶茶(原價$28)以及玉桂蘋果紫羅蘭(原價$35)，兩杯均係凍飲。奶茶口感順滑，唔會太甜，紅豆如果煮得淋啲就更佳。花茶勁重玉桂香，幾正😍。由於飲品放咗原條玉桂木，所以都真係幾濃味吓，介意者勿點。紫蘿蘭作為茶底，味道偏甘苦。總括嚟講，呢間新派台菜館唔錯喎🇹🇼。套餐除咗擺盤五彩繽紛之外🌈，內容堅係豐富，而且無論前菜定主食都有返咁上下水準。餐牌菜式選擇多，我仲有好多嘢想食，一定會再嚟幫襯！…Read More

可憐既朋友仔今晚有排OT🙈 見佢咁慘我就去佢公司附近陪佢食埋個晚飯先由得佢再孤伶伶加班啦～(反正我公司行過黎都唔遠🤣)呢度既晚市套餐包左三款前菜，一款主菜同一款水果，擺盤吸引又精美😍我叫左紅燒牛肉麵(少麵)&熱水蜜桃果粒愛玉(少甜)，朋友揀左星期一三五限定嘅花膠胡椒豬肚雞&熱鮮手工製芋圓奶茶(少甜)，兩個都係配滷肉青菜😊椒鹽爆溪蝦好香口😋 食落好似台灣好出名果個蝦叔叔，不過呢個係迷你版😂牛肉麵湯底勁濃郁勁香😍 麵條彈牙👍 牛展厚身但略嫌唔夠淋，牛筋就好淋好入味😋熱水蜜桃果粒愛玉(少甜)有淡淡既水蜜桃同玫瑰花味，幾清香👍愛玉好有口感，呢個組合都幾夾😋花膠胡椒豬肚雞湯勁重胡椒味，都幾刺激😂用料超大方！！朋友淨係食料都食飽，飯都唔太食得落🙈佢大讚啲雞肉好似慢煮出黎咁，口感非常好👏豬肚唔會韌，花膠又俾得多，呢個set性價比超高！！❤️佢差唔多飲曬成碗花膠湯結果飲唔落杯芋圓奶茶😂 就決定拎返公司邊飲邊加油🙈🙈 祝福佢🙌…Read More

星期六去試新餐廳，地點係位於觀塘創紀之城既哥哥添飯•妹妹泡茶，個名非常特別。餐廳喺地下，好易揾。呢度係做台灣菜。餐牌係用膠file夾住打印出黎嘅格仔紙，好攪笑。呢度有堂食晚市套餐，包前菜，主菜八選一，同小果物，加配飲品有$10折扣。不設加一服務費。飲品有唔同種類既台式飲品如奶茶，果茶，氣泡系列等等。另一款堂食晚市套餐有魯肉飯，乾拌麵，青咖哩，塩麴雞，同魯肉湯麵，另外餐牌仲有夜市小食，同滋潤甜品。今次第一次黎，我哋叫左兩個堂食晚市套餐，一份夜市小吃同兩碗甜品大快朵頤。堂食晚市套餐係成份餐咁上俾你。前菜三款有椒鹽燒肉粒，椒鹽爆溪蝦，同漬物拼盤。椒鹽燒肉粒同椒鹽爆溪蝦份量唔少，都唔算鹹，前者好脆口而後者好鬆脆可口。漬物拼盤居然有牛蒡，好健康。小果物係三舊紅蘋果同一舊哈蜜瓜。養生花雕鮑魚醉盤 $128呢款係星期二，四，六限定。今日啱啱好可以叫。賣相好特別，好似迷你下午茶架咁，上層架有鮑魚同蝦仁各一隻，仲有糖心蛋半隻，下層架有五件醉雞左右，全部食物嘅藥材同酒味都超濃。質感方面，鮑魚有嚼勁但唔韌，糖心蛋嘅蛋黃係軟心，醉雞都好嫩食落仲甜甜哋。浸住湯嘅仲有青瓜絲，杞子，同玉竹。另配一大碗熱白飯。時菜可揀滷肉青菜或者燙青菜，我哋揀左前者。滷肉青菜係新鮮油墨菜加上味道好好嘅滷肉碎，份量唔多不過夠食，完全無油不過味道好好。破布子煎封比目魚配蟹肉菠菜圈 $128煎封比目魚賣相好好，一客兩件，煎得皮脆肉滑，有少少骨不過問題不大，上面加左幾粒連核橄欖，味道剛好唔過鹹。蟹肉菠菜圈係新鮮菠菜圍圈再加啲好有鮮蟹味嘅蟹肉喺上面。另配一大碗熱白飯。呢款主菜好健康，食材質素唔錯。有時候想喝紅豆奶茶 跟餐加$18”有時候想喝紅豆奶茶“個名好長，少見有紅豆奶茶飲，即管試吓先。奶茶嘅茶味好香濃，質感亦滑，下底有好多原粒紅豆粒，用飲管都吸唔哂。靚靚雪燕桃膠奶茶 跟餐加$30呢杯靚靚雪燕桃膠奶茶就勁多桃膠粒咬，好有口感。唔想浪費就整爛張膠紙用匙羹食埋啲桃膠。起司肉鬆蛋餅 $26另外叫左一客夜市小吃分享。起司肉鬆蛋餅係一大條蛋餅切開左四件，薄薄餅皮包住雞蛋餅，再入面係肉鬆同芝士，上面灑上黑白芝麻粒，再加上甜酸醬同沙律醬。食落肉鬆味同甜酸醬重，口感煙煙韌韌，全不油膩，同我之前試過嘅蛋餅有啲唔同。呢個價錢幾抵食。雪燕桃膠百蓮燉梛汁 $40雪燕桃膠百蓮燉鮮奶 $46甜品絕對唔少得，叫左雪燕桃膠百蓮燉梛汁同雪燕桃膠百蓮燉鮮奶。首先兩碗甜品都超足料，啖啖都有好多爽爽嘅桃膠，稔稔嘅蓮子，同脆脆哋嘅百合，超抵食。味道方面，鮮奶完全唔甜，好健康。不過個人鍾意梛汁多啲，少少甜甜哋好味道。野食本身質素唔差，賣相居然出奇地有心思。服務員人手充足而態度友善，但係並唔收服務費。裝修光猛，座位都正常。食左咁多野人均先兩舊水鬆啲，抵食。…Read More