Sun Shing Chiu Chow Restaurant

本身就係潮州妹嘅我，真係細細個食潮州粥、潮州餸大。近年因為媽媽不在，已經少了很多機會食到家常潮州便飯。自從加入潮州菜關注群組，攬到我心思思食日想食，終於今晚約埋家姐去九龍城食潮州菜。八點左右去到，已經坐滿座要等位。老闆娘都好好拎咗啲摺椅比我地坐住等。大概十五分鐘左右終於有檯了。入座後即刻睇吓食啲乜。潮州人家常飯餸 《潮州春菜》，呢個食番兒時屋企的味道。細細個屋企一定有一煲坐鎮，春菜要煮到又淋又入味，放入鹹豬肉，春菜吸收鹹肉香，送粥一流。《胡椒豬肚湯》呢個都係童年回憶，記得細個試過幫手洗豬肚，又要粗盬去潺又要白鑊炒完先煲，工夫都係唔少。另外胡椒最緊要煲夠時間先會爆開，湯先夠胡椒香辣味，飲完十分暖胃有益。加埋潮州酸菜，成個湯鹹鹹酸酸辣辣，又係一個湯，啲豬肚酸菜又可以做一個餸。:)《滷水鵝片》滷水鵝以前好矜貴，記得細個每逢過時過節，媽媽先會買一隻鵝返嚟自己劏。整滷水鵝要搞足兩日，都算是功夫菜之一。食鵝點都要有少少肥至好味，滷水夠味，入口有花椒八角香。呢間嘅鵝肉嫰甘香，片片厚薄均一，啖啖鵝肉令人齒頰留香。《煎蠔仔餅》真係潮州菜最受歡迎熱門菜之一。香脆惹味，蠔仔鮮甜，加埋芫荽蔥同魚露，大人小朋友都鍾意食。《韮菜豬紅》呢間韮菜夠嫩，吾會好老好多筋。豬紅整得幾出色，又夠滑又夠味，真係好好食。普通食材都煮得好昧，呢個先利害。《高手反沙芋》係潮州經典菜式。每逢農曆新年媽媽都會整。不過因為生芋頭會令皮膚痕癢，所以冇學過整。依家相信都越嚟越少人識整，所以幾飽都好，家姐堅持要食。芋頭好靚夠粉，師傅真係高手，每件芋頭都均勻沾上沙糖，真心十分欣賞。最後，我哋當然食唔曬，吾好浪費，打包咗返屋企比阿仔宵夜，等佢都品嚐一下潮州傳統飲食文化。老闆娘同高手師傅都好有善，知我哋兩個係潮州妹，一有空閒就走埋嚟坳水吹，仲話請我哋飲多支青島咁話喎，真係感受番兒街坊的人情味。臨走仲要比我見到肥美鹽焗烏頭魚，今次無食下次一定要食。…Read More

九龍城除咗多泰國菜館之外，其實都有好幾間高質素嘅潮州菜館，仲要係越傳統越冇裝潢嘅就越高質素越正宗。今日有個朋友就發起去九龍城打冷，我哋一行四人，相約7點喺新城潮州飯店門外等，估唔到平日晚市都座無虛席，等咗一陣先有位。一入門口就見到好多傳統嘅潮州菜食材，凍蟹、滷水鵝等等，全部都好吸引。一坐低店員就會奉上三款調味醬汁，包括有配搭滷水鵝嘅醋汁、魚露同潮州辣椒油。我哋先嚟一碗咸菜胡椒豬肚湯清一清個口腔，呢個胡椒豬肚湯望落清澈，估唔到胡椒味勁度十足，配合埋酸菜嘅味道，飲幾啖非常精神爽胃。食潮州菜我就最鍾意食滷水鵝片，上裝起片啖啖肉就最正喇，鵝肉肥美但又唔會有太多肥膏，亦都唔會滷得過鹹，而鵝片之下仲有豆腐同花生墊底，我同朋友唔使5分鐘就已經清晒成碟鵝片。另一個食潮州菜必食嘅當然就係炸蠔餅，蛋漿炸得金黃香脆，而入面嘅蠔仔粒粒飽滿，我就鍾意配合魚露一齊食，更能帶出炸蠔餅嘅鮮味。今次難得四個人一齊嚟，所以就叫咗條人多先試到嘅烏頭魚，店員會預先將烏頭魚打開，一上枱就見到白滑無比嘅魚肉，老店果然功架十足，烏頭魚處理得非常好，所以唔會過熟，啖啖肉夠鮮味。原本打算叫豉椒炒蜆餸啤酒，不過咁啱蜆賣晒，就改為豉椒炒蟶子。蟶子比蜆更好肉，隻隻新鮮肥美，食落更滋味。總覺得叫番碟招牌小炒皇先夠大排檔風味，而且因為每家店嘅小炒皇材料都不盡相同，所以每次都可以比較高低。新城嘅小炒皇除咗有韮菜花作主調，配菜種類及比例同樣豐富，大大隻蝦乾同粒粒香脆嘅腰果確令呢道菜生色不少。老闆娘介紹我哋食潮州春菜，原來即係平時食嘅芥菜，起初睇見咁平凡嘅賣相都冇抱太大期望，不過一食之下真係不得了，經潮式製法煮過嘅春菜完全冇印象中芥菜嘅苦澀味，而且鹹度適中，我自己一人食咗超過半碗，絕對係我嘅私心推介！蠔仔粥材料豐富，我起初以為蠔仔粥就只有蠔仔，而新城嘅蠔仔粥仲有魷魚、冬菇、鹹魚、肉碎，再加入冬菜蔥花，口感豐富而味道有唔同層次，真係好驚喜。食過潮州菜都知其中一道好出名嘅甜品就係反沙芋，呢度真係每道菜都大大碟好抵食，連呢個反沙芋都唔例外，熱熱嘅芋頭配合砂糖真係好好食！呢間雖然係非常傳統嘅老店，但吸引到好多年輕嘅食客三五成群咁嚟幫襯，又有好多已經係光顧多次嘅熟客嚟捧場，就知佢嘅吸引力。而且每個店員都好親切，又會聽取客人嘅意見，聽老闆娘講呢度已經接近30年歷史，所以真係充滿着無限嘅情懷。…Read More

屹立喺九龍城超過20年嘅打冷老鋪，餸菜款式多，打開餐牌，見到樣樣都想試想食🤤，可惜個胃有限。🙈🙈老闆娘推薦羊腩煲。咁我地就叫左一煲，超大煲，好多羊腩，4個人食都多呀。佢嘅羊腩同啲汁一啲都唔羶，羊腩唔會淋治治，有咬口。最癲嘅係佢嘅馬蹄係超大粒🤩🤩，我真係未食過羊腩煲裏面有咁大粒馬蹄。馬蹄爽口清甜，好新鮮。老闆娘話佢哋朝朝入貨，自己親手刨嘅馬蹄，讚呀👍🏻枝竹都係大大塊，唔係散修修嘅。另一個要讚嘅係蠔餅🥳，蠔餅厚身，裏面嘅蠔比其他地方食嘅大粒同多，啲蠔同粉漿嘅比例啱啱好，冇出水，夠乾身，絕對冇一劈劈，炸得金黃🌟，但唔會有油益味。👍🏻滷水鵝片滷得入味，但唔會鹹。鵝片冇乜肥肉，不過一啲都唔韌。仲配埋好多煲咗好耐琳琳地嘅花生。🥜下面嘅豆腐就普普通通啦，冇太大特別。椒鹽白飯魚炸得脆口，唔咸，白飯魚都係偏大大條。三五知己送酒一流。🍺🍺呢度餸菜樣樣都大份，真材實料，抵食。店舖隨時間流逝，變得歷史悠久，人情味卻依舊。👨‍👩‍👧‍👦👨‍👩‍👧‍👦👩🏽‍🤝‍👨🏼👭…Read More

因為交通不便, 個人很少去九龍城開餐, 今次因為朋友生日聚會不得不來, 新城潮州飯店是傳統舊式潮州食店, 茶餐廳格局, 順理成章……裝修欠奉。******************************潮州蠔仔粥材料很豐富，內有蠔仔、柴魚、肉碎及香芹等, 蠔仔新鮮, 粥底唔腥, 不過就稍為鹹了點。滷水鵝片淡淡的滷水清香, 鹹甜適中, 鵝薄薄一片, 尚算嫩滑。肉碎四季豆半肥瘦肉碎炒得香口惹味，偏油略鹹，送飯一流。心形糖醋麵趣緻心心啱晒情侶食 糖醋麵表面煎得焦香，邊位脆口，伴以糖醋同吃，滋味滿分，今晚最like 的一味新城整體偏鹹, 食完有點口渴, 不知是否潮州人好濃味之故, 不過每人$60 可以食到滷水鵝片及蠔仔粥, 咁抵食, 什麼不足之處都包容到啦。…Read More