今日目標係深水埗嘅哩間越南小食店，聽啲朋友話哩間鋪可以一試所以就黎嘗嘗啦~ 望住餐牌，唔記得嗰刻想緊啲乜，本來想叫碗【生牛肉河】的，人地招牌都寫明sell牛肉喇，但我都會無啦啦咁叫咗碗【風沙雞翼配越式扎肉撈檬】的，可能想試下佢地嘅雞翼，又唔想喺一間食飽呱。。。。。。 加3蚊就跟餐有杯【滴漏咖啡】喇，咁當然唔可以錯過啦~~~ 真係話咁快就到，嘩，顏色好靚咁wo，除咗扎肉同雞翼之外仲有生菜，青瓜，蔥，花生碎，芽菜等等~ 但好睇唔夠嘅，味道係非常地重要的啊，眼睇覺得表面乾乾地，試咗啲啲懞粉，淡淡地，就試下將碗野撈下喇，撈呀撈，但依然覺得乾乾的，再試下味，依然係淡的，咁當然又係加調味料嘅時間喇~ 
見到檯面有個裝住【魚露醃白蘿蔔絲】嘅玻璃樽，就知道哩樣就係碗粉所欠缺嘅一環了，打開聞聞，聞到有朕淡淡嘅酸味同香味，應該冇錯喇，加啲啲試下吧~ 加加，撈撈，食食，嗯。。。好食咗。。。再加，再黎。。。又好食多少少。。。咁我係咪應該成樽魚露倒落去呢 咁當然係誇張少少嘅講法，但無可否認嘅係如果加唔夠嘅話就同淡而無味冇咩分別囉。。。不過，如果加得夠嘅話，碗粉嘅味道係可以好好的，酸酸甜甜的，開胃非常，食得人好精神舒服 檬粉煮得啱啱夠熟，軟硬度啱啱好令人冇投訴，同生菜芽菜等等嘅配菜配合得唔錯啊，再加上軟軟的扎肉，整體感覺非常良好，但點解唔上檯之前就為客人加返足夠嘅魚露呢？哩個就係點解我冇喺幅檬粉相上加個贊嘅原因了:) 我係特登將啲雞翼同碗粉分開講的，因為嗰幾隻雞翼真係幾好味的，醃嘅時間啱啱好，好夠味但一啲都冇過鹹，可以好清楚咁睇到表面啲蒜，炸得夠香又唔會太油太熱氣，抵贊！
啱啱開始食嘅時候杯【滴漏咖啡】就已經上檯了，滴到我啱啱食完碗粉嘅時候就啱啱滴完，真係啱喇，就好似食甜品咁，早知道就叫多杯野飲等我可以邊食邊飲啦 好喇，我開始對付我杯【甜品】喇~ 先攞走上面嘅滴滴裝備，然後打開檯面上煉奶嘅蓋，然後就。。。狂加！！！哈哈，講笑，我就加咗3細羹，加幾多依自己口味決定啦，唔好問我 飲啖先~ 嗯。。。。好好味，好香好濃嘅咖啡味。。。真係好正。。。慢慢享受。。。滴咗咁耐溫度啱啱好唔會太熱，令我可以好舒服咁享受哩杯咖啡。。。真係好舒服，係我飲過最好嘅其中一杯咖啡之一，只係加3蚊嘅跟餐咖啡，水準係不可思議地好～～～ 哩餐午飯都算食得滿意，埋單先35蚊，都幾抵架喇~ 最後總結一句，如果碗檬粉調好味先上檯嘅話我就一定會俾個笑臉架喇，宜家嘛，ok啦:)…Read More
