最痛苦莫過於等開飯既時候喇。酒席坐唔滿,又要再花時間執位呢,仲要餓多陣添。基本上我都逢請必到,恭喜 Jerry Liu 新婚之喜 ﹗百年好合,白頭到老喇。
金豬耀紅袍,不錯不錯,滿意滿意。皮脆肉香,化皮脆卜卜又香口,瘦肉嫩滑甘香又甜美,不肥不膩,堅好食喎。
翡翠蝦仁襯羅衣,三十幾年後我鍾於懂得欣賞西芹喇,身體再無抗拒、反胃既感覺。西芹爽甜多汁趙到索索聲,味道清爽香甜,原汁原味。啤水咸蝦仁就一般喇,鮮味有點削而略咸。
桂花蚌邊皮位顏色暗啞甚不吸引,質地微爽帶韌,不容易趙啊,味道都係略咸。混上大量西芹配一小件蝦或桂花蚌的話,味道可以平衡一下。
珊瑚上素石榴果,婚宴上罕見的菜色,有趣啊。賣相顏色有點陰沉單調,石榴果貌似琵琶豆腐呢,連個汁都十分相似。芡是蠔汁來的,蠔汁配素食都好正路,整體還可以。
外皮有豆香嚥嚥韌韌,包著大量雜菜爽爽甜甜幾好味喎。何為珊瑚呢?原來食其形,西蘭花砌到恰似朵珊瑚,要加多一點想象力喇。西蘭花都非常爽甜卜卜脆,又不會過生有草青味,好食啊。
黃金燕液錦繡球,燕窩本身無味,而且係燕碎,好難食得出喎。炸得金黃鬆脆夠香口,蝦膠夠鮮夠彈,咬開時肉汁微微流出閃令令,狀甚誘惑。沾上甜酸汁使到鮮蝦味更出,又能減低膩滯感覺,真係幾好味呢。
金湯海皇蟹肉燴燕窩,依個不得了,超持濃高湯非常甜美,黏黏的感覺夾雜著鮮蟹肉味道。大啖大啖品嚐,蟹肉滑滑一絲絲、燕碎彈彈一粒粒,好好味啊 ﹗
碧綠鮮鮑片,我自已不太喜歡小唐菜爽硬的質感及清水的味道,而且做伴碟都經常已經變得冰凍,依道菜也不例外。生菜就好好多喇,熱燙燙捲上濃濃蠔油芡味,爽甜可口又多汁,搭上嚥嚥韌韌的鮑片也不錯。
清蒸大海斑,各位師兄弟妹既速度已經慢下來了,那我唔客氣喇,食返粒面珠登先 ﹗肉質非常彈牙結實,好有趙口又滑滑,好滿足啊 ﹗先 knock out 面珠登,唔好比佢停,要一氣呵成殺落去 ﹗
魚頭、魚雲、魚三角,全部消滅,啜得一乾二淨,骨膠原滑滑膠膠又黏黏,絕不浪費全收肚裡去 ﹗魚肚、魚骨、魚鰭亦都無一幸免,損得乾乾淨淨,半條肉絲都無機會留低 ﹗雪白魚肉沾上蒸魚豉油更添鮮味,那可以停得口呢 ﹗
金沙脆皮雞,只不過是炸子雞鋪上炸蒜罷了 ﹗大肥雞肥膏處處,有點油膩,不太喜歡。幸好都皮脆肉嫩,味道略咸,雞皮散發著炸蒜香味,不過不失。
干貝蛋白炒絲苗,似乎啖左少少,而且鑊氣欠奉,口感就幾好,夠乾身嚥韌而飽滿!上湯煎粉果,將鬆化粉果浸到上湯深處,半響即放入口試試,外脆內軟而嚥韌,幾有趣,一試無妨。
蓮子百合糖水,清爽甜味不過火,適合我這類不愛甜人仕。好少喜宴咁多甜品喎!蓮子百合糖水、紅豆糕、流心酥!
八個人一圍我仲要打左底,食到炸子雞已經食唔落喇,格硬試埋個瑤柱蛋白炒飯乍。 今餐除左條海斑普通一點外,樣樣都好好食仲有燕窩養顏添,多謝晒,哈哈!