早排某日放工同幾個同事去咗打邊爐，粥底火鍋都食過兩三次，但就未幫襯過鍋心。佢喺Office附近有分店，放工行過去就有得食，勁方便我哋😊。我印象中餐廳勁高人氣，上年閒日Walk-in無位，但今次我哋晚上六點半鐘去到就直接入得，仲有位剩。餐廳分3️⃣三輪用膳時間，分別係(A)18:00-20:30、(B)20:30-23:00以及(C)23:00-02:00；店員係會好準時清場的！現時政府防疫措施對營業時間有所影響，應該做得兩輪。餐廳收費好簡單，就如佢哋所講「喺鍋心絕無海鮮價！」，按人頭劃一收費$200，唔需要另收加一服務費同醬料費👍。不過留意番價錢就唔包飲品，另外亦有每日精選特價海鮮可以追加。店員先遞上調味架，比我哋溝醬油🥢。首先要揀選嘅係粥底鮮味靈魂二選一，肉蟹🆚波士頓龍蝦(每位加$20)，而沙白蜆係必點項目。我哋四個人每款各嗌二，每人份量為半隻，即合共一隻蟹同一隻龍蝦🦀。肉蟹，真係好好肉，特別係個蟹鉗，但蟹肉愈好食，個蟹殼普遍都愈硬。就算用工具都要出盡九牛二虎之力😭。波士頓龍蝦，雖然係過份包裝，但肌肉亦非常發達。蝦身同鉗都有肉食，而且波士頓品種無咁多刺，易剝啲😜。自選海鮮七選五，我哋好有共識地Foul走唔要大尾魷同多寶魚🐟。鮑魚，有四大隻，口感幾彈牙，不過拆殼過程有啲困難！但其中一位同事話佢嗰隻啲內臟位臭臭地😅，我哋就無嘢，可能個別問題。貴妃蚌好鮮甜，唔錯，一人一隻。蝦，有一桶，無數確實數量🦐，但每人起碼食到兩隻，味道都幾好。記住留番隻蝦到最尾食粥時食啊！花甲，有一大碟，再夾埋沙白蜆，應該有成60隻。其實沙白同花甲差唔多，不過無乜選擇，唯有兩款要哂。幾欣賞嘅係只得一兩隻蜆有沙👍；但貝殼大小有啲參差，大隻好食啲。元貝，有四隻，正正常常，最普通係呢樣😶。餐廳貼咗張紙出嚟教我哋每樣海鮮分別要淥幾耐，仲提供埋計時器，咁就唔驚會煮到老哂啦😝。另外，再可自選八選配料，同樣地唔可以重複揀相同嘅款式。選擇都多嘅，超過三十款，肉類、餃子、丸類同蔬菜等通通都有🍲。如果八款都唔夠食，可以另加$20要多一款配料。肥牛，打邊爐如果無牛肉就不如唔打好過，估唔到🐮肥牛幾大碟之餘，肉味仲幾濃郁。有時唔洗打甚麼旗號都可以好好食。西班牙豬梅頭片，豬肉片呈嫩粉紅色，每片圓圓的，無臭豬味🐷，可以一食！其它六款配料要咗響鈴卷、萵筍、蘿蔔片、花枝丸、魚皮餃同炸魚腐。全部份量都啱啱好，有多無少。佢呢隻🍢炸魚腐我無食過，外面有啲似豆卜，幾正。魚皮餃細細的，個皮幾爽。響鈴同蘿蔔啱哂索湯，而萵筍就幾時都咁好食。最失望係花枝丸，因為係街市最唔足料嗰種🙈。鍋底開頭比較清淡，所以先食海鮮最為適合🈴️。除咗個湯底可以愈熬愈出味，同時亦能品嚐海鮮嘅鮮味。無錯，真係每樣都好新鮮😋！滾到咁上下，已經八點，店員提我哋差不多要煮粥了🍚。佢先幫我哋將未食完嘅餸撈起，再落稀飯慢慢煮。我哋頭先打邊爐時已經預早落咗三款海鮮粥嘅準備蔬菜，即係包括🎃南瓜粒、芋頭粒同🌽粟米片。前兩者一早已經煲溶哂～。店員落稀飯外，亦會加入鍋心五寶［即芫荽、冬菜、菜脯粒、大頭菜粒同豬油渣粒］一齊煮。我哋走咗豬油渣，但由於其他配料份量太多、味道太搶，啲粥煮完出嚟比較重口味，我哋都唔太鍾意😣。下次再食嘅話一定要減量，甚至唔落。原味海鮮粥應該幾正，因為集海鮮同配料嘅精華於一身。啲粥勁大煲，每人可以食到兩碗，但已經好飽，食唔哂囉。店員話啲粥係可以打包㗎😱！我哋無嗌飲品，但都無太渴，可能唔重味精吧🤤。環境方面，餐廳冷氣充足，座位闊落，整體感覺都算乾淨🙇🏻♀️。餐廳設有洗水盤，方便客人洗手。題外話，唔太覺眼海鮮魚缸嘅位置🤔。我哋食到八點半先走，門口企滿等食第二輪嘅人👏。不過我唔係好明點解餐廳要咁堅持夠鐘先放人入，明明上一輪都坐唔滿，加上收費亦一樣，真奇怪。總括嚟講，鍋心真係無得輸😍，雖然個粥同預期中有落差，但啲海鮮同火鍋配料真心正。再者，每人$220全包好鬼抵，又夠飽。店員仲畀咗啲優惠卷我哋試佐敦間海鮮燒添！餐廳高質，絕對值得推介💯。…Read More
