今晚，一家大細，有老有嫩，一行5人去左位於銅鑼灣利舞台17樓嘅牛一。牛一，由佢幾年前係銅鑼灣廣場地庫果陣，已經開始幫襯佢。到佢幾年前搬左嚟利舞台，再開到成行成市。唯一不變就係.....CP值爆燈！由於今日6:30左右就去到，所以好好彩唔洗等好快就有得入去。環境：暗暗地幾好氣氛，乾淨程度亦都算係唔話得。食物：今日叫左鮮茄龍蝦湯，丫，唔係，係鮮茄濃蝦湯先啱。牛肉，我地就選擇左極上美國牛肉（大人178，小朋友長者138）。如果喜歡食和牛，佢地個極上日本和牛真心推介。不過今日有老有嫩關係，怕佢地吃不消，都係叫返極上美國牛肉算。不過唔好睇少佢，啲牛肉唔肥，有紋理，好啱老人家小朋友食。豚肉，我真心另一個推介，厚薄啱啱好，唔肥，打邊爐一流。出面自己拎嘅火鍋配料有好多，丸類，菜類，麵類，豆腐類，重有乳酪蛋糕，汽水啤酒。如果你每一樣都拎少少入去試，一定好快就飽。不得不提係佢個日本和牛咖哩加白飯，雖然飽肚，但係我每一次去點都會整一碗細細地食下，試過你就知好野。小朋友最鍾意嘅芝士丸同腸仔。90分鐘嘅火鍋放題，去到最後既15分鐘，佢地會溫馨提示返你淨低15分鐘，你可以選擇加鐘，或者找數。到果陣，食多少少就去拎埋乳酪蛋糕，時間咁就啱啱好。10月31日前，星期一至四晚市，重有85折。正。…Read More
