Choi Fook Royal Banquet (Kings Wing Plaza 1)

今日放假，特登同爸媽去飲茶，見石門呢間酒樓都開左一段時間都未去過，今日就黎呢度會一會佢。去到酒樓原來呢間酒樓都唔算細，個大堂都幾大，又冇柱位，裝修都幾光猛時尚，座位夠濶落，唔會俾人覺得枱連枱既擠逼感。如果擺酒呢度都幾適合。因為我預先book了枱，所以唔使等位就可以直接入去，侍應安排了我們入房坐和預先問定我們要什麼茶，所以一坐低就好快有茶送上。房入面得幾張枱，環境清靜，同朋友黎飲茶傾偈就啱晒！我們坐下後第一時間就睇下有咩好野食，原來呢度有幾款點心係得過獎，咁當然唔好執輸叫幾款黎試下佢啦，額外再叫了其他點心和一碟炒野。三個人食應該夠吧！叉燒腸上枱，他們用一隻長碟來盛載，叉燒餡算幾多，腸粉都幾滑，唔錯！第一款得獎點心上枱，呢碟叫做芝心海皇千絲春卷，淨係睇個樣都已經殺晒！啲米粉絲炸得好鬆脆，包裏入面的芝士餡幾濃，入面仲有冬菇，加埋一些蝦粒，外脆內軟，非常香口鮮味，食完一粒都忍唔住要再食多一粒！我最喜愛的咸水角新鮮炸起，面頭好脆，入面熱騰騰，餡料十足，正！銀芽肉絲雙面黃，一上枱感覺好大碟，未食都覺得抵食！麵炸得好脆，加上肉絲同芽菜，令成碟麵都香氣撲鼻，我都不禁食左三碗！嘻嘻！！第二個得獎點心係旋風流心奶皇包，外表成個旋風造型，相當得意，一咬落去啲奶皇就好似火山爆發咁流出，奶皇好香滑，個包好軟腍，真係值得回味！蝦餃皇皮做得夠薄，入面的蝦好爽脆和飽滿，值得推介！第三款的得獎點心係原隻鮑魚燒賣皇，他採用細細隻原隻鮑魚放上面，口感彈牙唔靱，配埋個燒賣皇一齊食，簡直係人間美食！呢度既食物質素同環境都唔錯，下次會再來！…Read More

有朋自遠方來，緊係搵間香港特色風味既餐廳俾佢地體驗一下香港文化，今次就試下石門呢間酒樓！成個場地都好體面，仲要冇柱位，擺酒就真係岩哂裝潢都唔錯食物方面，燒腩仔個皮好脆，啲肉唔會好肥，岩哂怕肥又為食嘅我口味！呢度有好多獲得至高榮譽金獎既點心，我就隨便揀左兩款，港式街頭蝦米豬腸粉氣勢磅礴，將甜醬、花生醬吱係腸粉上賣相唔錯，而醬汁既份量非常平均，腸粉仲好滑同煎得好香口旋風黃金流沙包果然有料到，咬開之後奶黃一湧而至，奶黃蛋黃味香濃，包係熱辣辣架呢個伊麵真係冇得輸，湯底有鮮甜既海鮮味，仲要加埋帶子蟹肉，係我食過最好食既湯伊麵…Read More

好友喺沙田石門返工，星期六上午仲要返工，所以就好友放工直接喺嗰頭飲茶。我比較早到，咁就先上酒樓攞左飛先，不過都唔需要等好耐就已經可以入坐。我地見到其中有張點心紙寫住榮譽金獎點心，我地就選左兩個得獎點心。黃金流沙包，不愧為得獎點心，真心值得推介。入面流沙餡好滑好CREAMY，甜度適中。芝心海皇千絲春卷 用上一條條如髮絲嘅麵條絲包成，入口非常香脆。煎芋頭糕足料，芋頭味香濃，質感挺實，唔會靠溝粉，煎得都好香口。雞扎我無食，不過齋睇嗰賣相都唔差。鯪魚肉煎釀虎皮椒煎得夠熱夠香，尤其係鯪魚肉果一邊，泛起金黃色而有點脆口，入口熱騰騰，鯪魚肉彈牙有鯪魚香，虎皮椒爽口，吃起來唔會太辣。椒鹽龍鬚炸得好脆，又唔會覺得油膩，食唔停口。蝦餃皇嘅皮做到薄身，中間嘅蝦肉鮮美爽彈好新鮮。四個人，埋單都只係三百頭，人均消費一舊水都唔洗，位置都頗鬆動，坐得都舒服，眞係週末有口福。…Read More

這間位於石門既茶樓，轉眼都開了兩個多月，環境裝修未至於華麗，亦算雅緻，而且座位寬敞，坐得舒適。:)來到當然要點得獎點心之一的旋風黃金流沙包，軟綿綿的口感，一咬流沙已經滲出來，很滋味。另外得獎點心是真功夫潮州炸粉果，單看賣相經已很吸引，入口十分香脆，再配高湯，讓炸粉果再昇華另一環境界。脆肉瓜蝦餃，蝦肉份量不多，如果四粒就好點。香煎南瓜芋夾，芋頭絲夾雜有南瓜，不是別處茶樓有得吃。咬落香口，還有香芋頭味加點南瓜絲高纖維，好吃。…Read More

今日爸爸生日一於請佢去石門新開既彩福皇宴飲早茶順便試吓佢哋d點心需然石門冇地方好行，唯一好處就係有三間酒樓，去飲茶時唔使等位入到去酒樓望見個場好新好靚，而且好寛敞坐落唔壁，任你選位坐碗筷用具和地方都乾淨整潔，睇餐牌都好多點心選擇，我就選左一d平時都會食既(家鄉炒米粉、梅菜肉餅蒸飯、香滑鮮蝦腸、原盎瑤柱灌湯餃)和一d連續四屆攞奬點心(港式街頭蝦米豬腸粉、旋風黃金流沙包、原隻鮑魚燒賣皇)睇吓值唔值得攞獎，點心係即叫即蒸，點心未到就嘆吓茶吹吓水先，茶唔算最頂级但都唔係嗰啲下價茶冇味難入口，大约十五分鐘左右，點心就慢慢送上，首先試吓個飯先，需然睇落個賣相唔係好靚但食落去啲飯唔鬆散唔鞋，肉餅唔肥唔瘦，味道剛剛好:)香滑鮮蝦腸，個外皮軟滑可口，而細心之處係蝦腸唔係一條條唔使自己分開，可以一口食哂，每嚿有原隻大蝦爽口彈牙家鄉炒米粉需然冇乜材料，得啲西芹、红蘿白、蔬菜和火腿絲，但都唔係啲頭頭尾尾，而且嗰米粉炒得幾乾身唔油膩，味道香口原盎瑤柱灌湯餃，睇已經覺得正因為有原粒瑤柱和松草花，而且隻餃好足料和大隻，瑤柱咬落幾淋，皮薄餡靚，有豬肉、冬菇絲、筍絲、蝦，食落啖啖肉，口感豐富，湯濃冇味精感輪到試得奬點心，港式街頭蝦米豬腸粉，睇賣相真係令我想起以前在街邊小販檔買腸粉既情景食落真係有返以前既感覺，佢每條腸粉都加左甜醬、花生醬和辣醬，腸粉軟滑，內裏有蝦米增加口感，其實食腸粉最重要係混醬，如果混得好內裏冇料都好正，我食完呢個腸粉但我覺得未到完美，因為個辣醬，辣左少少蓋過左個花生醬和甜醬味道旋風黃金流沙包，食落軟绵绵，而且內裹蛋黃真流沙狀，好香好好味，甜道適中，真係好不過食既時候，小心好熱和蛋黃流出來原隻鮑魚燒賣皇，見到已經覺得好高級好正，真係想一啖食落肚不過我選擇慢慢品賞，鮑魚幾有鲜味而且好冧，燒賣d肉幾好味幾彈牙，呢個真係值得攞獎呢間真係唔算貴而且好食，環境又舒適，以後又多一個地方飲茶…Read More