Bloom by Wang Jia Sha (Deli Place (Site 4))

📌 王家沙．花樣年華 - 紅磡黃埔天地享膳坊(第4期)地下G16號舖🗓(22/3) 星期三 ⏰ 晚上7點左右 💈特式：對上一次食王家沙已經係多年前，印象中佢價錢雖然唔平，但質素都有返咁上下，今日過開嚟黃埔又想食上海野，所以就揀左佢。🥩🍔🌭🌮🥗🥯🥘🍲🍝🍣🥟🍤🍱食物：餐廳主力做上海菜，所以我都係叫返幾樣上海菜既代表嚟試，包括韭黃炒鱔糊/招牌蟹粉小籠包/炸黑毛豬扒擔擔麵，而家等我同大家講下味道先。韭黃炒鱔糊 - 呢個份量都正常，但價錢賣$138就有少少唔值，因為鱔肉同韭黃嘅份量，大約只有2:8比，淨係得個面見到鱔肉，個底全部都係韭黃，不過味道係ok的，韭黃炒得好香又無渣，係鱔肉就偏韌唔夠爽口。招牌蟹粉小籠包 - 上海菜又點少得小籠包，叫左呢個蟹粉小籠包，$78有5粒，呢個價錢合理，小籠包size都唔細，皮亦做得夠薄，但頂位d皮有少少蒸未透，有少少硬，湯汁亦略嫌不夠多。炸黑毛豬扒擔擔麵 - 呢個擔擔麵賣$138，反而我覺得佢算抵食，因為麵量真係有好多，夠2個人食有多，不過質素就一般。首先上枱時個湯唔夠熱，；此外，麵量係多，亦都係用上海麵底，但煮得太淋，淋到d麵都痴埋一餅；炸豬扒味道係唔錯，不過炸得太過油。☕️🍵🥤🧋🍺🍷🥃🍹🧉🍾🍶🥛飲品 : 因為餐廳有提供茶水，而家仲要係收$12蚊一位，所以就只飲茶，無再加其他飲品。🍽環境：餐廳環境係唔錯，裝修又有心思，整體感覺良好，地方同坐位都寬敞闊落，坐得好舒適，開張多時亦keep到裝修新淨企理同衛生。🤵🏻🤵🏻‍♀️🤵🏻‍♂️服務：店員服務態度都ok，店舖係用剔紙仔落單，不過餐廳地方大，但職員人數少，較入嘅坐位好難先搵到職員提供服務。💰💸價錢：叫左以上3樣食物，埋單$429蚊，因為佢地仲要收每位茶位$12蚊同小食又$12蚊，所以我覺得就偏唔抵，同區仲有更多性價比更高嘅選擇。🐲💬總結：我覺得王家沙以前比我嘅感覺係價錢偏高，但食物質素好好，而家好似有少少倒退，希望佢地可回復當年水準啦。推薦指數：❤️❤️🤍🤍🤍…Read More

邊個話後生唔可以中意食中菜？我就係好中意食傳統嘅食物所以今次黎到主打年輕路線嘅花樣年華食餐飽😍因為晚市有八五折 超級抵食啊👏🏻先黎一客招牌蟹粉小籠包($78)咬一啖 濃郁嘅湯汁滿瀉 肉汁非常豐富將蟹粉滋味完全包住係透薄嘅皮入面👍🏻而我咁中意食辣 點少得正宗酸辣湯($58)一碗充滿酸辣鮮香 而且十分開胃 好味道😌另一樣開胃飽肚嘅係老壇酸菜魚($238)一大盤最適合三至四人食 魚嘅份量都多濃湯相當惹味 新鮮雪白的魚肉 嫩滑鮮味底層仲有紅薯粉墊底 實夠飽肚架😋最後一款真係好少見 就係石鍋鮑魚飯($138)雖然得一隻鮑魚 但幾入味 石鍋可以保持溫度所以啲醬汁Keep住左 令飯粒沾上鮮味😝-裝修環境：✨✨✨✨✨服務態度：✨✨✨✨✨食物質素：✨✨✨✨✨(5個✨為滿分)唔信我嘅可以自己去試試😂…Read More

心血來潮想食滬菜，突然間醒起好耐無食嘅王家沙，於是就去咗黃埔天地享饍坊嘅王家沙花樣年華。・招牌蟹粉小籠包：食滬菜，當然唔少得小籠包啦。小籠包都有三種選擇 （蘇式鮮肉、招牌蟹粉、松露），我就揀咗最大路嘅招牌蟹粉小籠包。一籠有五隻，隻隻都皮薄多汁，蟹粉肉餡又好新鮮juice。如果唔係點咗五、六道菜，點多一籠都仲得呀。・王家沙擔擔麵：擔擔麵係另一個我好中意食嘅經典滬菜。「王家沙」除咗傳統嘅擔擔麵，仲有紅燒牛腩同黑毛豬扒可以選擇。同小籠包一樣，我都係揀返最大路嘅王家沙擔擔麵。擔擔麵保持住水準，好好食。但略嫌唔夠辣，可以將辣度再稍稍提升就完美喇。・韭菜炒鱔糊：鱔肉有口感，而且鮮甜，加上韭黃獨有嘅香味，令整道菜嘅鮮味提升不少。・鮮拆蟹粉扒豆苗：來自另一張點餐紙嘅菜式，應該係時令菜式嚟。鮮拆蟹粉加上蟹糕，同鮮嫩嘅豆苗炒埋一齊，嗰一種嘅鮮甜蟹味，分外香口。・上海醃篤鮮：醃篤鮮是上海一種春季時令菜式，用冬筍、咸肉、豆腐皮結同鮮豬肉，置於文火上慢燉。「王家沙」將依道醃篤鮮做得好好，可以品嘗到食材嘅原汁原味，無添加鹽、味精等任何調料，全是食材的鮮味。・芝麻豆沙餅：十分脆口，餅皮唔會太厚。芝麻落得好足，所以好香。豆沙餡亦唔會太甜。…Read More