江湖小棧

秋去冬來想暖下身🥶|人氣排隊超香飯焦煲仔飯🍲|極邪惡任加豬油仲有得自選材料🐷😈|江湖小棧「差不多冬至，一早一晚還是有雨」秋去冬來，終於嚟到有絲絲涼意嘅初冬，最啱搵D新鮮熱辣嘅好西暖下身，咁啱同朋友嚟到荃灣行街，朋友就提議試下依間人龍熱門煲仔飯，啱啱嚟到門口大概晚上6點半左右，已經有唔少客人排隊等候入坐，店員比完籌號後會大約叫我地乜時間再返黎，我地大概等左30分鐘左右入座，餐廳坐位唔算多，擺枱稍為擠迫，店員好好客，而且小店格局亦啱哂冬天想食返煲暖笠笠煲仔飯嘅朋友，別有一番滋味。餐廳餐牌亦別具特色，全部都係武林秘笈做封面，同餐廳店名相映成趣，除左煲仔飯，仲有串燒等送酒小食添。-串燒牛舌&雞軟骨 3.8/5⭐️我地叫左一串牛舌同雞軟骨做小食，牛舌幾大粒，咬落唔韌，調味用上孜然粉，幾惹味。雞軟骨份量頗多，亦都用孜然粉調味，正常水準發揮。-招牌燒通菜 4/5⭐️見到好多客人都點依道招牌燒通菜，我同朋友都想叫碟菜食下，通菜上面鋪滿蒜蓉、椒鹽同馬拉盞，食落好多汁惹味，通菜有串燒嘅風味，都幾推薦。-自選煲仔飯(蒜蓉，鮮肉排，滑雞件，臘腸) 4.2/5⭐️選擇困難症嘅我地，面對住五花八門嘅煲仔飯無從入手，所以我地非常開心見到有得自選唔同餸菜嘅組合，不過稍稍可惜嘅係，醃醬都當左一味餸，店員推薦我地揀蒜蓉最穩陣。煲仔飯大概落單後20分鐘左右上枱，店員亦奉上極邪惡嘅豬油同甜豉油比我地自己加，再焗多一陣之後，就可以打開香噴噴嘅煲仔飯，撈勻所有材料之後再揭盅我地最關心嘅煲仔飯焦，果然非常香脆，煲仔飯夾雜邪惡豬油同甜豉油，令我地食指大動，蒜蓉配上鮮肉排啖啖肉之餘亦非常惹味，滑雞件就正常水準發揮，加埋臘腸嘅錦上添花，我地唔洗十分鐘就光速食哂一煲，勁滿足。–總結:餐廳主打煲仔飯，選擇種類繁多，亦有特色豬油任添，睇到門口等候嘅客人數量就知道係街坊熱愛嘅餐廳之一，想食一間穩陣唔中伏嘅煲仔飯，依間好推薦!====江湖小棧 (荃灣)📍荃灣鱟地坊30號寶成大厦1號地舖====…Read More

今日黎到呢間荃灣出名既煲仔飯，都等左成9個字先入得，強烈建議冬天先好去食，因為都等到身水身汗🤣🤣，同埋冬天個味道應該有加成！北菇滑雞煲仔飯，臘味排骨煲仔飯（83$）兩樣加埋一齊講啦，因為其實佢d餸都唔差既，特別在佢有自家制既豬油，加埋鼓油落去，焗個兩分鐘，勁香！好食！黑椒豬手（92$）呢個佢整得非常淋同入味，幾好！招牌燒通菜（48$）呢個比較菜上面鋪滿左蒜蓉，加上佢用馬拉盞同椒鹽炒過，幾香口！…Read More

秋風起，除咗食臘味之外，仲係食煲仔飯嘅季節，係天氣轉涼嘅時候，一打開個煲蓋，聞到油香撲鼻而來，香港人絕對抗拒唔到呢一種咁港式地道嘅美食。今次介紹嘅呢一間煲仔飯，之前已經食過一次，上年去食已經係大排長龍，今年再去食依然無變，絕對係荃灣煲仔飯嘅代表，今年再去睇吓佢究竟有冇退步。荃灣既江湖小棧係一間以武俠為主題既港式餐廳，主打煲仔飯，以佢嘅賣點就係除咗豉油之外，仲有秘製豬油，邪惡嘅豬油撈埋煲仔飯入邊非常惹味，令到佢大受歡迎，因為豬油嘅香味令到飯味提升幾個層次，客人仲可以自己揀唔同嘅配料，好似牛肉、臘肉、臘腸、滑雞、肉餅、排骨、咸蛋、窩蛋等。另外煲仔飯嘅靈魂飯焦都係呢度嘅吸引人之處，因為佢哋可以做到黃金幾完美飯焦。餐廳喺荃灣既鱟地坊，喺荃灣一個舊市集嘅特色地方，亦都係其中一個最多嘢食嘅荃灣地區，由路德圍經天橋行去對面，就可以搵到呢間睇落平平無奇但深藏不露既餐廳。我上年第一次嚟呢間餐廳，六點幾嚟到嗰時俾佢嘅人龍嚇親，出邊有10幾20人，最後過咗一個鐘多啲鍾意入到去，不過餐廳嘅好處就係攞飛，而且會大概話你知幾耐可以入去，所以我一個鐘我就去開附近行吓，差唔多時間到就真係差唔多可以入去。今年我吸取教訓，係五點十就到左餐廳諗住做第一批客，終於比我成功，但我只係咁岩好彩入到，係啱啱好最後一枱客，因為原來餐廳改咗5:30開門，呢個我睇OpenRice嘅時間都唔知，所以六點前呢間餐廳就已經滿座，另外話你知呢知間餐廳只做晚市，佢淨係做夜晚煲仔飯小菜就已經足夠，可以見到佢有幾受歡迎。另外餐廳都好細心會擺一啲位係出邊比大家坐住等。江湖小棧店如其名，入邊嘅裝修好有武俠小說嘅感覺，好似客棧，連餐牌都係武林秘笈、英雄帖，每一本Menu各方面都唔同，我呢一本係玄冥神掌，確實有江湖嘅味道。睇過「玄冥神掌」，餐廳主打即叫即做既煲仔飯，款式多達23種，全部都係$83一煲，除咗可以揀招牌口味之外，仲可以自選餸菜，最多可以揀3款餸，特別既餸好似有豆豉鯪魚、蝦膏、榨菜，好似食車仔麵咁，另外仲有煲仔菜、小菜、生滾粥、小食等等，小菜嘅款式會比起一般大排檔少。另外一提，呢間小店係前年11月曾經遭遇過催淚彈攻擊，老闆親身感受過強勁既催淚煙，感到無比刺痛，非常嬲，因為警察完全顧忌市民既安全，特別係有坐輪椅既老人家、一家大小有嬰兒既客人，知道投訴無門，於是係門外貼紙宣佈拒絕招待警察，雖然表示過唔好強行標籤自己餐館係咩顏色，但此舉再加上被示威者啟發後，之後有派水舒緩受催淚煙影響既街坊，足以證明係良心既小店。-1️⃣ 窩蛋牛肉煲仔飯 💰83（👅: 8.5/10）呢度嘅煲仔飯都係即叫即煲，所以要等差唔多20分鐘，上枱時已經見到佢出煙熱辣辣。呢度嘅煲仔飯最特別嘅，就係店員會比一樽是豉油同一樽獨有豬油，豬油係依度嘅師傅自己煉製，可以自己決定落嘅份量，落完之後冚蓋等一兩分鐘就可以食得，一打開嗰時見到滿滿既蔥花，香味十足。另外呢一間餐廳係我食過咁多間煲仔飯最細心一間，因為佢會比毛巾我哋開煲仔飯個蓋。呢度嘅時候係鹹豉油，而唔係甜豉油，豉油唔使落咁多已經好足夠，落得多反而豉油會集中係底部同埋飯焦，變咗有啲地方好重味有啲地方淡啲，而且太多豉油會蓋過餸嘅味道，而加咗豬油個煲仔飯香味突出，特別香口，但都唔好落咁多，因為太多會令到個飯比較濕。飯係粒粒分明，軟硬適中，水份啱啱好，夠乾身，淨係聞已經聞到飯香，食落有少少米香，加咗豬油絕對係香氣撲鼻，而且同飯香相輔相成，再加埋豉油好難唔好食。窩蛋撈堝埋個飯，食起上嚟充滿蛋香，令到個飯味道層次更加豐富，而牛肉方面都算嫩滑，咬薄無筋，有少少肉味。最後就係煲仔飯最重要嘅飯焦，呢度嘅飯焦差唔多係完美，如果識得整飯焦嘅話，呢度嘅飯焦絕對係頭盔型，可以成塊起出嚟，唔會痴住個煲，飯焦呈金黃色，再加上豉油令到色澤更加令人流口水，咬落去脆口但唔痴牙，有小小煙韌，食落去唔會過燶，只係表面有少少焦，好似食緊米餅，絕對係恰到好處。-2️⃣ 北菇滑雞鯰魚煲仔飯 💰83（👅: 8.5/10）之後就叫左呢度比較多人嗌嘅餸，除左北菇滑雞鯰魚，呢度嘅排骨臘腸都係最多人叫。食左幾舊入口幾滑，食落鮮嫩冇骨，而冬菇份量夠多，滑雞都唔小，食落算嫩，不過兩者本身個味道都係偏淡，因為兩樣都冇醃過，要靠豉油或者其他配料。-3️⃣ 招牌燒通菜 💰48（👅: 7.5/10）咁大班人難免要叫一個菜，就叫仔過好多人嗌嘅招牌燒通菜，上面係蒜蓉、椒鹽同馬拉盞，上枱時見到份量唔算好多。通菜燒過嚟，但唔會太乾身，食起嚟有汁，而且會有燒過嘅香味，但唔會有燶味，食落因為有好多蒜頭粒細，味道濃郁，香氣十足，但同時味道都會重啲鹹啲，食起嚟唔算好特別。-4️⃣ 錫紙花蛤粉 💰108（👅: 8.5/10）呢個算係有驚喜嘅小菜，店舖除咗有依個錫紙花蛤粉，仲有川辣煮花蛤煲，而呢度嘅海鮮都係即日喺街市買返嚟，所以花蛤都係保證新鮮。上枱個時出晒煙，而且係用錫紙上所以可以保持溫度，份量非常多，花蛤夠大隻飽滿，洗得夠乾淨，咬落去滿足，食落冇沙，而且有鮮甜味，因為佢有唔少蒜頭，所以食落香辣蒜蓉味重，但唔會好辣，非常惹味，不過原來佢好似可以要求辣度，我冇要求不過食落就唔辣。配料方面仲有金菇、粉絲、洋蔥，洋蔥令到香味更加突出，粉絲絕對係將花甲既鮮甜，同埋蒜蓉辣味嘅精華吸晒入去，食落去非常入味，忍唔住一啖接一啖。-5️⃣ 酸菜煮鱸魚 💰138（👅: 8/10）另外叫咗個酸菜魚，呢個都係好多人叫既菜式，因為我本身好鍾意食酸菜魚，不過上枱嗰時同我平時係川菜食到嘅酸菜魚唔同，佢個湯睇落唔係平時酸菜魚嘅顏色，係差唔多乳白色，而且冇咁油膩，份量幾多不過睇落係一個魚湯多過酸菜湯，而且係會用一個爐上Keep住咁滾。上面嘅係鱸魚肉片，分量非常多，湯底係用新鮮鰂魚煮成濃郁既魚湯，另外仲有酸菜、豆卜，可以睇到佢入邊係冇用花椒。魚嘅份量以呢個價錢來講係非常之多，而且每一舊都非常大舊，比起平時用生魚，呢度係用原條鱸魚，入口夠嫩滑，啖啖肉，不過部份位會有骨，唔似平時酸菜魚嗰啲冇骨食落咁爽。而湯方面飲落去辣味同酸味都好小，反而係飲到魚湯嘅鮮甜味，所以好形容佢係似一個有酸菜嘅魚湯，多過以酸菜熬製而成嘅湯，如果鍾意飲到魚嘅味多過又酸又麻既，或者對於唔食得辣嘅人來講，呢個湯係唔錯，但如果係抱住食到川菜個種會失望。-6️⃣ 牛舌 💰25（👅: 8/10）呢度都有唔同嘅串燒，今次就試咗牛舌，調味方面主要係孜然粉，牛舌大大粒，咬落去夠厚，比較煙韌，有嚼勁，食落去有肉汁，牛味都食得出，算係唔錯嘅牛舌。-7️⃣ 汽水 💰13（👅: 7/10）-🌟今時今日要喺香港食到一煲好嘅煲仔飯都唔容易，依家煲仔飯煮法都五花八門，但煲仔飯最主要就係要火候啱啱好，要有完美嘅黃金飯焦，有粒粒分明而且唔會過濕嘅飯粒，加重味道香味但唔會過分嘅豉油，所以一個好食嘅煲仔飯絕對唔簡單，而呢間餐廳每樣都做得唔錯，比起配料方面佢嘅飯做得更好，今次煲仔飯未試到佢最出名嘅排骨同臘味，但秋天仲未完結，好快我就會再嚟。餐廳裝修用心，雖然設計唔係為咗來俾人打卡，但我今年去同上年去，入邊嘅裝修都係冇變過，好似係俾人打卡，但入邊嘅嘢食係絕對有質素，唔係好睇唔好食。要挑剔嘅就係呢度太多人去，大家如果唔係六點前就到，就有心理準備要等一個鐘。荃灣絕對係一個咩都有得食嘅美食天堂，而呢一間小菜煲仔飯客棧，絕對係荃灣唔可以錯過嘅一間餐廳，如果經過荃灣、甚至係想食都好食嘅煲仔飯，絕對值得黎一試呢度師傅嘅武林武功。煲仔飯飯焦:🥇荃灣 江湖小棧🥈西環 嚐囍煲仔小菜煲仔飯飯粒分明乾身:🥇西環 嚐囍煲仔小菜🥈荃灣 江湖小棧煲仔飯調味:🥇荃灣 江湖小棧🥈西環 嚐囍煲仔小菜煲仔飯配料:🥈荃灣 江湖小棧🥈西環 嚐囍煲仔小菜-👅味道: 9/10🍴環境: 7/10💰消費: $100-200pp (服務費: NA)…Read More

本來打算食另一間餐廳，不過太多人等位，太肚餓，所以轉食呢間煲仔飯。餐廳的名幾特別，叫江湖小棧。座位都算闊落，環境舒服。我地叫左三樣嘢食，豬腳好入味，份量都大，我就食唔膩啦。仲有個招牌燒通菜，味道特別，串燒通菜的感覺。最鍾意臘味排骨煲仔飯，臘肉唔肥唔瘦，自己選擇落多少豬油同醬油，再撈勻佢，好吸引，豬油好香，d飯唔會太乾，但係有飯焦，值得一試！煲仔飯的選擇有好多，只是我地揀左最傳統的煲仔飯，下次可以試下其他！…Read More

某日同班🐢🍯整完餅都好夜了 想揾食醫肚 但好多間都就關門 經過見到有間未關門就入左去喇🤣😆哩度都好有佬嘅飯堂嘅味道架😄😀哩度嘅煲仔飯 又整得幾出色喎👍🏽👍🏽哩個飯各叫做🈴️時臘味煲仔飯🙂☺️材料係有潤腸 臘腸 半肥瘦的肉肉 同埋葱花 食之前記得加少少豬油同埋適量的豉油 所以食材再撈勻 出嚟的效果係好好好味的呢🤤😋生腸煲同埋墨魚咀 個碟餸都好好味喔🙂🙃味道超有鑊氣 份量都好多下嘿嘿 不過啲生腸真啲太硬 真係咬唔開😂😅墨魚咀其實都幾大粒 但係味道就不過不失 不算很特別 但係都好味嘅😋😊串燒真係好出色👍🏽👍🏽#燒牛舌 一條大約有五六粒 燒得剛剛好 肉質真係幾好 又好juicy🍢值得推介 正正子😊☺️仲有招牌燒通菜 真係整得幾好食 不過啲菜可以再淋啲同埋再細條啲😅😅通菜上有勁多炸蒜🙂👍🏽味道都不錯 大家可以trytry喔😉☺️拍青瓜🥒就真係可以慳返🤣😆因爲真係食得出係即叫即整😅😅啲青瓜同啲醬汁真係分開 完全唔入味 真係no good.…Read More