Soul Guide

早排響樓上妹記食完飯先發現落一層有另一間裝修甚有玩味性的大牌檔，充滿懷舊元素但又幾新潮，環境舒適好多。呢期餐廳搞緊High冧啤酒節活動，多個本地啤酒品牌買二送一（任選不同品牌口味都得，送價位較低者），有獅子山啤，香港啤酒公司，Heroes，Moonzen，少爺，蜜月等等超過30款選擇！① 孫悟空琥珀啤酒 $60② 玫瑰紅茶季節啤 $57③ 鹹檸啤 $51雖然唔鍾意劈酒狂隊啤，但同朋友吹水都會飲翻一兩杯。我試左孫悟空有啲桃味，唔會太甜，幾易入口。而鹹檸啤亦都溝得唔錯，飲落幾清新。食物方面有好多選擇，佐酒小食都唔少，串燒，滷味打冷，小炒，川菜等等真係一次試唔晒。④ 大廚脆皮鹹豬手 $168豬手件件都好厚切，啖啖肉又唔會太肥，加埋脆皮真係佐酒一流！點埋個黃芥末再提昇一個層次。⑤ 懷舊雞蛋焗魚腸 $98呢啲買少見少既懷舊菜，雞蛋唔會太老，魚腸魚膶分量多但不覺油膩，配飯好好味！⑥ 沙嗲金菇肥牛粉絲煲 $128又一個撈飯絕配，沙嗲汁夠濃，無論食粉絲定撈飯都咁正！如果天氣再凍，食呢煲一定暖入心，因為影完相食完碗飯，呢煲小菜仲係熱辣辣。…Read More

麻甩佬食嘢最鍾意嘅一喺茶記，一喺就大排檔，貪啲小炒夠鑊氣，又平靚正，當然依家仲有少少冬菇亭形式嘅大排檔，但真真正正嘅大排檔真喺賣少見少。今晚同老死出嚟尖沙咀搞個小飯局聚舊，專登揀咗走大排檔路線嘅「港久新街」（取其諧音：港九新界），當然，呢度環境就舒服啲，嘆住冷氣食小炒。餐廳位置好方便，一出地鐵行幾步就到。裡面嘅裝修好有型，尤其天花啲彩色版最搶眼，仲有天花嘅斜板模仿大排檔嘅元素。除咗靠窗一排大卡位之外，裡面仲有好多張細圓檯，啱曬三五知己嚟食飯、吹水。 晌依家搵錢嘅年代，啲餐廳為提高翻枱量，都會設有時限，我就最鍾意呢度棟個牌話俾你聽，唔限時，仲要無開瓶費，無切餅費，唔會同你計到盡，淨係呢樣服務一環我都一定加佢分啦！ 上文都講過，店家定位喺大排檔路線，所以，當然有好多傳統嘅大排檔懷舊小菜、10大招牌菜，此外，仲有啲冷盤小食、潮州滷水、川辣菜式、串燒、炒粉麵飯……等等，非常多元化。 懷舊玉泉 $12過到嚟大排檔飲飲食食，點可以唔叫支汽水，難得呢度有啲懷舊嘅樽裝汽水，真喺估唔到呢支玉泉嗰樽真喺懷舊到小弟都未見過，淨喺呢點未食呢餐已經充滿情懷！烤生蠔 $10 / 隻講開抵，相信無乜邊枱唔點呢個，原價$28，依家只喺十蚊隻，見唔少客用盡個優惠成盤烤蠔咁上。好老實真喺抵到無朋友，大隻飽滿，鋪滿大量香蒜、蔥粒，入口蠔肉嫩滑鮮甜，蒜香滿溢。 羊肉串 $28、豬大腸 $28、牛脷芯 $38再落嚟試下佢哋嘅串燒，最抵死喺每一串都插咗支旗仔，表明佢嘅「身份」，好搞嘢。羊肉切得比較細粒，但燒得保持嫩滑，入口軟腍，有陣陣羊羶香；我呢班老死真喺膽固醇敢死隊，所以，點都話要試一試豬大腸，燒得甘香充滿油脂，唔健康還唔健康，但真喺好食；牛脷食過唔少次，但牛脷芯就比較少，先喺一種爽彈感，再咬落去就有種煙韌咁，加上獨特嘅牛脷香味，呢個真喺無揀錯。懷舊雞蛋焗魚腸 $98呢道菜真喺好耐無見過，功夫多好多都有做，老死同我異口同聲都話一定要叫。一大砵淨喺賣相都已經好吸引啦，一面烘得金黃，入口表面喺脆脆哋嘅焗蛋皮，裡面喺好嫩滑嘅蛋漿同魚腸，魚腸食落無咩腥味，反而有啲甘腴嘅香味。秘製菠蘿黑醋骨 $108經典嘅小炒「生炒骨」相信大家都食唔少，呢個有啲相類似嘅黑醋骨，亦喺好想試試佢。比起生炒骨，黑醋骨同樣酸酸甜甜，但就多咗一份醋嘅醇厚感，更大減油膩度，加埋啲新鮮菠蘿，睇都知唔喺罐頭貨，食落令人好開胃。個人覺得送飯一流！ 潮式蠔仔餅 $98今日真喺麻甩佬作反嘅日子，再嚟一道好食但唔健康嘅煎蠔餅，蠔餅新鮮煎起，自然份外甘脆，唔使多講一眼就知脆到咔咔聲，食落亦唔算油膩，裡面混和唔少蠔仔肉，飽滿肥美，沾上少少魚露更具風味。今餐飯老友大讚好食又抵食，的確價錢唔算好貴，但份量好十足，有相你睇，比起去茶記食小炒還要大碟，加上招呼唔錯，地方夠大，涼住冷氣夠晒爽。…Read More

平時對於大排檔既感覺就係比較舊同黑，咁啱比小編搵到呢到就打破左呢個印象🤩 裝修主打八、九十年代「走鬼檔」風格之餘，一樣色彩繽紛，唔同顏色既霓虹燈💡交錯又有種摩登既感覺，仲有開放式小菜檔、滷水檔、燒烤檔同水吧tim~ 餐牌亦都玩味十足😜 會用啲特別字句表示唔同菜式，好似「拼個滷味」、「嗒翻兩杯🍻」、「串壹串佢」等等，面頭仲講左句「飲飽食醉先好諗出去」😂 令人覺得貼地又有啲新意，而且食物味道都有驚喜，值得再黎👍🏻(5 😍 係滿分，🤩係半分） 蒜香燒元貝 🧄🔥⚪️ - $38/隻 (好味指數：😍😍😍😍😍)元貝⚪️一啲都唔hea，大大隻夠晒飽滿，配埋超級足料、淋左熟油既蒜蓉🧄，惹味香口又帶有少少辣🌶️，更加突出到元貝⚪️既鮮味，味道鮮甜，爽口彈牙，連裙邊都唔會韌，忍唔住連殼上面既汁都飲埋😂蒜蓉燒茄子 🧄🔥🍆 - $48 (好味指數：😍😍😍😍😍)一上枱真係嘩一聲，茄子🍆超級大條又厚肉，配埋超級足料、淋左熟油既蒜蓉🧄，惹味香口又帶有少少辣🌶️，茄子🍆索晒啲精華，肉質細緻軟綿，用叉輕輕一刮已經可以將成條肉起晒出黎，感覺幾爽，令人忍唔住一啖接一啖咁食😋秘制沙律醬燒骨 🥗🔥🍖 - $108 (好味指數：😍😍😍😍🤩)應該用左腩排🍖，喺炸到金黃色之後加沙律醬🥗同煉奶再兜，所以味道酸酸甜甜咁，入口濃厚順滑，又會令到個汁可以杰啲，可以更加容易咁痴喺啲肉上面👍🏻 個燒骨🔥🍖表皮酥脆，入面軟嫩juicy又多肉，有油香之餘亦唔會覺得漏～滷水鵝片 🦢 - $128 (好味指數：😍😍😍😍)重點係煲滷水，入面應該加左香氣濃郁既南姜、桂皮、甘草、陳皮等等，味道鹹中帶甜，鮮香味濃～ 鵝肉🦢索晒滷水既精華，惹味軟嫩又juicy，鵝味🦢濃郁，而且仲有啲醇厚既油香tim🤩 而且小編揀左鵝片🦢，無骨🦴啖啖肉咁幾正～懷舊雞蛋焗魚腸 🥚🐟 - $98 (好味指數：😍😍😍🤩)其實喺60年代既時候魚腸🐟係下欄野，因為覺得難洗得乾淨又腥～ 估唔到其實魚腸🐟都可以整得好食，通常會用草魚🐟既腸好似鯇魚腸，因為相對會乾淨啲，無咁難洗～ 去除左魚腸🐟入面多餘既脂肪之後，再用薑、葱汆水辟腥，另外要埋魚肝去加多一份甘香，用慢火煎出多餘油分～ 跟住加薑、胡椒粉同陳皮辟腥，加埋蛋🥚、蒜片🧄、芫荽🌿同葱絲落缽仔到蒸，之後再將個缽放喺火上面燒完🔥再焗～ 表面金黃香脆，入面細嫩，鮮味甘腴，香口唔會腥，感覺幾唔錯～好味指數：😍😍😍😍🤩推介指數：😍😍😍😍🤩…Read More

一間位於尖沙咀的新式大排檔，裝修極具玩味，採用香港最具代表性嘅「霓虹燈」作為元素，裝修融入香港舊式建築文化與時代感設計，打造一個新舊同步空間。餐廳菜式選擇多，更有「懷舊雞蛋焗魚腸」、惹味串燒、生啤等等，一於叫夠半打啤，坐低同朋友慢慢食、慢慢傾！1️⃣懷舊雞蛋焗魚腸 HKD98 呢個菜式係香港已經買少見少，因為工序煩多，已經唔多餐廳會做。蒸蛋焦脆外皮下包住香滑蒸蛋，滲出陣陣魚油香，內臟處理得宜，食落唔會好腥，一啖一口，欣賞！內裡仲有油炸鬼，的確係一種港式情懷！  2️⃣豉蒜蒸大鱔 HKD168 非常新鮮，魚肉彈牙，肉質鮮甜，油香十足，大推！而且份量一啲都唔少，4個人share絕對無問題！豉椒調味剛好，食得出豆豉咸香同時唔會過濃，同條鱔完美配合，推薦！ 3️⃣秘製韭菜豬紅 HKD68 呢個調味非常岩我心水，平時食開嘅豬紅韭菜少不免油淋淋。但睇圖就知佢油份唔算多，但味道一啲都唔差，調味剛好，唔會過咸同時夠味，食落少一份邪惡感同時滿足！推薦！  4️⃣鮮雞肝 HKD28 呢度串燒非常有驚喜！雞肝的確新鮮，甜甜帶泥沙質感，喜歡食內臟嘅朋友唔好錯過！推薦！  5️⃣羊肉串 HKD28 羊肉串食落微微羶香，肉質軟身帶甜，喜歡食羊嘅朋友同樣唔可以錯過！  6️⃣燒生蠔 HKD10/1隻 （每人限叫2隻） 而家做緊優惠，每人可叫兩隻燒蠔，燒蠔唔會好細隻，上面嘅辣蒜先係成隻蠔嘅精髓，夠曬惹味，的確不錯！  ❣️有生啤！仲有少爺生啤！正❣️ ——— 評價：  🍽️ 開飯眾腳飲酒好地方 🏙 港式情懷小菜 👍🏻 環境舒適服務良好 ❤️ 全日全單85折   推介指數：❤️❤️❤️❤️❤️ （五個心心為滿分） …Read More

「老港味 - 新排場」香港地道美食新店推介!🎉炎炎夏日6月正式開始! 同時間亦都係港久新街 Soul Guide 尖沙咀店開業新開始。由尖沙咀地鐵站B2出口行1分鐘即到，全層佔地5000呎空間感強烈，餐廳店鋪嘅裝修設計參考咗八、九十年代嘅港式大牌檔作為設計主題，天花以及牆身呈現綠色鐵皮、帆布帳篷等昔日“走鬼檔”地道裝潢。場內有霓虹燈燈飾卡位、開放式小菜檔熟食檔、滷水檔及車仔檔等，充滿懷舊氣氛的設計，滿有心思以舒適現代化嘅空間重現舊香港的情懷風格👍🏼食物款式由超過三十年經驗的👨‍🍳主廚主理的主題招牌地道小菜，值得留意有艇家避風塘炒蟹、潮州打冷鹵水拼盤、大廚脆皮鹹豬手、懷舊雞蛋焗魚腸及港式串燒等撚手小菜，即日至6月30日期間，外賣或堂食都有額外85折!言歸正傳~ 今晚小編同埋3條餓友一齊來探店，小食、打冷、串燒、川菜、啤酒樣樣齊哂都咪話唔興奮!🐟懷舊雞蛋焗魚腸 $98推介:⭐️⭐️⭐️⭐️⭐️必點!呢一款係小編最期待力作! 因為而家坊間賣少見少嘅菜款!除左工序繁複之外，還要視乎師傅手工同烹調火候。最面層有炸油炸鬼脆口，中間有焗蛋嘅軟綿，再加埋雞蛋焗魚腸內有多種魚內臟，口感過癮又無腥味，來到呢個氣氛環境食返呢個招牌菜，基本係必食~🍖香酥脆皮牛肋骨 $288推介:⭐️⭐️⭐️⭐️⭐️大件驚喜!招牌心機菜! 個人感覺CP值超級高，牛肋肉原骨呈上，份量特別驚喜，睇相打卡已經感覺到那份酥脆，再倒入茄醬汁，牛肋肉內紋理絲絲明顯，外脆內軟火喉到位!🦆滷水鵝件拼元蹄 $108+$88推介:⭐️⭐️⭐️⭐️⭐️潮式滷水雙拼，餐廳用秘制滷汁熬製鵝片、鵝肝、豬大腸、墨魚等食材，滷水鵝及元蹄兩款都無太大差異，因為全部吸收哂滷水味道，由滷水檔師博即叫即斬料，新鮮吸引。來到串燒一環，多款串燒由$28-$58不等，送酒抵食一流，除左肉串之外，亦有雞皮、菠蘿、韮菜等。🐚蒜香燒元貝 $38/each🐟生燒活白鱔 $48/each推介:⭐️⭐️⭐️⭐️以上兩款尤其推介! 係大排檔格局必食風味菜，元貝蒜香咸度剛剛好，上檯仍有不少元貝汁在殼中。活白鱔無得彈! 厚肉完全無骨，如果再燒耐D 連魚皮都收乾哂就更完美。🐟老壇酸菜魚 $288推介:⭐️⭐️⭐️⭐️⭐️不比專門店失色好難得嘅一款、亦都係好有份量的一款，完全唔會諗到大排檔或都可以品嚐到如此正宗嘅酸菜魚，就咁睇表面嘅湯汁同油香賣相已經口水流不斷，色香味齊全加埋特別有嘅飽肚感，整餐十分完滿。🍻少爺啤 $72 & 藍妹 $64推介:⭐️⭐️⭐️⭐️⭐️500ml 大大杯!餐廳開店到夜晚12點，岩哂宵夜食串燒飲返兩杯嘅朋友有多款啤酒比你gur一gur 佢。就算唔飲酒都仲有經典港式餐飲🥤、涼茶及懷舊枝裝汽水飲勝!午市碗仔餸套餐有多款如梅菜扣肉、魚香茄子和菠蘿咕嚕肉等港式小菜，附近打工仔可以留意下，約埋一班同事/朋友仔開餐。…Read More