Little Vietnam (Closed)

今天再次和妹妹來美孚，上星期吃過足料越南晚餐，真是食個番尋味，今天再來小越南。由於我比妹妹較早抵達小越南，當時未到六時，我還可以點下午茶餐，於是我選了三寶湯河加上湯時菜半份和熱檸蜜。三寶湯河並不細碗，質地軟滑，三寶是雞翼、豬扒和扎肉，質軟可口，很有香茅味！但可能是茶餐的關係，三寶很細碟呢！上湯時菜有多款選擇，我點了介蘭，份量不少也頗新鮮，但有點咸。:(看到餐牌上的小越南焦糖薑雞翼，實在太吸引，於是隨即點了。稍後妹妹來到，她點了炸蝦餅撈檬。蝦餅鮮味，沒有用炸粉炸，所以不熱氣，份量亦很多。經過20分鐘烹調後，小越南焦糖薑雞翼新鮮熱辣上枱，我們都目不轉睛眼金金地望著這碟雞翼，不約而同地發出嘩一聲！賣相非常漂亮，香噴噴的！我們急不及待品嚐，真是美味到不得了！雞翼熱辣香囗，甜蜜的焦糖味加少少黑醋味，再配合薑粒的辣味，有酸酸的醃蘿蔔作伴碟，真是天衣無逢，極具創意！我們是吃雞翼的發燒友，吃盡全港美味雞翼，我們都一致認為這款雞翼是排行榜中的首位呢！:):)經過一天辛勞的工作後，來到小越南吃飯，感覺很舒服輕鬆，不只在味覺上，在精神上也可得到滿足呢！:)…Read More

我們一家, 經常會在美孚出沒的, 因為要轉乘小巴嘛, 而且工人姐姐也久不久會到美孚跟鄉里聚頭~在這區也有數間比較好的餐廳, 例如這間 小越南 Little Vietnam 就是我的心頭好~門面是比較普通, 街坊小店嘛~來頭也不少!店舖的裝修簡約的白色為主調, 地方光猛四正企理, 地方不算大, 但座位也不算迫狹~我很喜歡這吊扇~自家製魚露~小越南焦糖薑粒雞翼濃稠又黑褐色焦糖汁, 人見人愛, 未吃已傳出淡淡的香氯氣, 雞翼上可以看見細小的薑粒, 雞翼的肉質嫩滑又入味, 獨有個性的焦糖汁因帶有薑粒, 既甜又帶點兒辣! 好有風味! 真的別具一格!越式蝦柚子沙律柚子沙律既清新又健康, 這沙律內有 木瓜絲、青瓜絲、柚子肉、鮮蝦肉, 味道微酸又爽口~炸軟殼蟹炸粉厚薄適中, 火喉掌握得好, 軟殼蟹炸得外鬆脆又肉嫩, 調味得宜, 亦沒有雪藏味, 有水準~越南滴漏咖啡味道濃郁芳香又帶微酸, 口味獨特 .... 其實看著咖啡滴漏的過程才是其樂趣之處~…Read More

寫食評純為興趣，好似有人喜歡寫日記，有人喜歡寫遊記，不知不覺間升咗為所謂「殿堂食家」，仲做埋咩「菜式達人」、「地區達人」，真喺有啲見笑。就因為依啲虛銜，成日被人問有咩好介紹，其實人人口味不同，我話好食，唔等於好啱你口味。小弟家住美孚，就更周不時被問及依區嘅心水推介餐廳，老實講，依區快餐店、茶記居多，有質素及特色嘅食店真喺一隻手掌數得晒，「小越南」就喺其中一家 ，今晚，與幾個朋友前來捧場。因為成個美孚區，得佢一間打正旗號賣越南菜，所以，變相獨市生意。加上夠特色、有質素、定價合理，平時經過都見唔少撻拖著便服嘅街坊幫襯，好似今晚閒日嘅星期一晚，坐吓坐吓都坐九乘滿，逢五六日就更少不免要排吓隊等位 。一室湖水綠襯白，配淺啡梳化椅，加上幅荷塘油畫，裝飾簡約骨子，不過由於小店經營，鋪位細細，全場爆滿時確實有點點逼，支持小店時就要有所體諒 。菜式方面，跟之前嚟變化不大，一啲主打嘅菜式，均以食物相片形式作為餐牌介紹，所以個菜式喺乜，份外清楚。此外，仲有一個主餐牌，分別列出湯粉、撈濛、炒粉 / 飯、蔬菜、小食及飲品……等多個類別。如果想經濟啲，晚市套餐就應該最上算啦，一客粉麵飯，加個小食及餐飲，都喺$63-$78。亦有二人晚市套餐，優惠價$172，究竟包啲乜？睇相就知啦！可惜，只限星期一至五（公眾假除外）6:00pm後供應。因為想朋友試多啲特色嘢，所以，主攻小食類，一切粉麵飯嘅，暫且留番下次，其實，之前所試過嘅炸蝦餅撈檬、越式酸辣海鮮湯河均甚有水準。 小越南秘製牛油雞翼 $51 :) :) :) 一客有5隻，隻隻雞翼都喺大呎碼，唔會奀挑鬼命無肉食。雞翼炸得金黃，表面蒜粒十足，但牛油香依然突出，外層入口甘脆，內裡雞肉非常嫩滑，整體食到牛油及蒜香，叫人萬分滋味 :) ，同行友人原來喺雞翼迷，佢對此讚不絕口，所以，臨尾為佢再追加另一招牌雞翼。 越式蝦柚子沙律 $71 :) :) 個柚子沙律好豐富，有好多青木瓜絲同柚子肉，加埋少量甘筍絲、炸椰子碎，再自行淋上魚露，輕怡、酸香、醒胃 。尤其啲柚子肉，飽滿多汁，而熟蝦亦都頗鮮甜。 迷你越式拼盤 $54 :) :) 人少少點個迷你越式拼盤，就可以一次過試到3樣嘢：炸蝦餅、酸辣無骨鳳爪、越南扎肉。炸蝦餅水準依然，雖則蝦味未算超農，但彈牙唔油；鳳爪酸爽微辣，口感冰涼；扎肉雖貴為越南知名食物，但跟蝦餅、鳳爪相對就變得普通啲，其實扎肉質感柔軟而爽彈，味道都唔錯。 牛油蒜蓉焗帶子 $81 :) 繼秘製牛油雞翼，又一牛油、蒜蓉嘅組合，焗得帶點焦香嘅原隻連殼帶子，勁重牛油及蒜蓉香，仲稍嫌牛油有啲重手咗，所以食起嚟有啲啲油膩感，減番啲牛油就更好嘞。而帶子肉質細嫩，晌牛油及蒜蓉下，隱約嗒出佢嘅鮮味。 小越南香炸大頭蝦 $72 :) :) :) 因為其中一個朋友唔食得蝦，所以，香炸大頭蝦我哋只叫一客共享。餐牌註明喺3頭大，即喺一磅有3隻嘅大細，所以大頭蝦非常碩大，做法相對簡單，蘸滿蒜粒酥炸。雖然喺咁，蒜粒又無太冚過蝦鮮味，蝦肉入口好鮮爽，果真香脆彈牙，令人回味 。而裝滿蝦膏嘅蝦頭，膽固醇萬歲嘅人士就更不容錯過啦，值得推介。 馬拉盞炒菜心 $43 :) 太多肉，總要有點菜，簡簡單單一道馬拉盞炒菜心就足夠嘞，菜心嫩綠有菜味，馬拉盞夠風味，轉眼一碟炒菜心就被大家清晒。 小越南焦糖薑粒雞翼 $51 :) :) :) 上文講過其中一位朋友喺雞翼迷，而自己又試過依款黑糖薑粒雞翼，覺得甚有特色，當然要推介俾朋友啦。同樣一客有5隻，賣相焦焦黑黑，絕對喺唔好睇，但就喺好好食嘅雞翼。味道上甜甜哋，又辣辣哋，帶有濃香嘅薑味，外皮帶點脆，雞肉依樣做到嫩滑，好味有特色 ，不容錯過嘅小食之一。唔知有無發現，佢哋好多小食嘅伴碟都喺酸蘿蔔絲，原來自家醃製，酸得嚟開胃唔揦喉 。凡點粉麵飯或主菜，飲品都有優惠，加$9配熱飲、加$11配凍飲、加$15配特飲 ，差不多半價咁滯，當然要點番幾杯特飲嚟試試啦。 椰汁冰 $22（單價）/ $15（優惠價） :) 大大杯嘅椰汁冰，朋友話幾重椰汁味，清甜好飲。等我下次都試吓先！ 青檸梳打 $22（單價）/ $15（優惠價）入口清爽涼快，青檸嘅酸香，寧舍醒神。 越式滴漏咖啡 $28（單價）/ $15（優惠價） :) :) 我就始終喜歡佢嘅滴漏咖啡，睇住佢逐滴逐滴咁漏落去，好有一種精華感覺，以傳統做法配煉奶，故此味道有點甜，但咖啡香而帶點點苦，不過無澀無酸，入口有種醇厚感 。睇到餐牌右下角嘅一句：「~珍惜食水，本餐廳將不主動提供清水~」，個人幾支持依個舉動，因為有啲人真喺唔會掂杯水，只多用嚟洗吓餐具，試想吓，一日有幾多人嚟幫襯，可能就浪費咗十幾公升水喇。最後，我哋幾個人實在太長氣，由7:30pm坐到人哋閂鋪，溫馨提示，小越南收9:30pm架，認真唔好意思阻人收工添 ！…Read More

最近很有食神，得公關邀請能到處試盡美食！我和男友都是能夠大擦一餐的人，放題自助餐火鍋韓燒什麼的通通的都可以大吃特吃。這天放工後，就來到美孚新村的小越南吃晚飯。平常每當我提議去吃越南野的時候，男友總是寧願吃日本菜，這次他看過大家的食評後，難得地很感興趣，我呢，有得食就夠高興了！雖然距離地鐵站出口只是2,3分鐘路程，但村內小店林立，實在有點難找。首先來一客招牌的秘製牛油雞翼，說是招牌菜當然期望很高！而它亦沒有令我們失望，炸得香脆之餘亦不覺炸粉太厚，裡面的雞肉鮮嫩無比，油份不多不少，蒜香和牛油味比例得宜，一口吃下去沒有油膩感，短短幾分鐘被我倆掃個清光，實在想encore啊......再來的是男友大意點錯的雞絲撈檬，原來他一心想點湯檬的。不過，上桌時看到滿滿一大碗，雞絲也不是吝嗇幾條而且大堆頭送上，伴以醃製過的蘿蔔絲、青瓜、生菜等，口感十足。吃撈檬時混合大量Nuoc Mam是常識吧！以這道菜作頭盤清清味蕾，胃口大開。店內有不少創意crossover菜式，這道越式金不換炒蜆便是其中之一。一看便知是crossover了港式風味，追求正宗地道越式風味的人可能會不悅，但我反而覺得多選擇總比沒選擇好吧。大大碟炒蜆雖然有一半是配料，但也絕不是敷衍之作，醬汁濃郁，蜆肉多亦不細小，淡淡的香料味道帶來味覺和嗅覺新體驗。我點的香茅豬扒湯河味道一般，河粉偏淋身，豬扒稍嫌有點瘦，雖不致太硬但若多點肥肉會更好吃。值得一讚的是份量十足，豬扒足有6,7條，河粉亦像食極都有，想吃飽話咁易！來到每間餐廳我都喜歡點小食拼盤，因為一個價錢可以淺嚐不同小食，滿足我貪心的胃口。拼盤內有春卷、扎肉、粉包、香茅雞翼、蔗蝦。當中以蔗蝦最美味，大大件之餘感覺亦不太熱氣；另外亦推介春卷，餡料足也很惹味。香茅雞翼偏乾身，不夠juicy。牛油蒜蓉焗青口是我倆一向的心頭好！這道菜雖然偏咸但仍能吃到青口本身的鮮味，青口上的配料使口感和層次都變得很豐富，牛油味濃，蒜蓉則還可以，適合我這種不太想滿口蒜味的人。難以想像在越式小店吃到這種菜式，現在回看相片仍然讓我回味無窮。剛才的牛油雞翼不夠喉，便試試另一款招牌菜式。混合了碎薑粒及焦糖的雞翼吃起來就像是吃薑醋一樣，甜甜酸酸的很開胃，不過一向不好薑味食品的我吃了一隻便放下碗筷，覺得薑味太濃蓋過焦糖甜味，反而嗜吃薑醋的男友則覺得很醒胃特別，吃光雞翼後想連醬汁都舔乾淨。最後叫了一碟青菜作結。如果想清淡一點可選清湯浸，但我們都喜歡香口的所以選了蒜蓉炒，芥蘭炒得剛剛好，上碟時仍然鮮嫩無比，用來解膩一流。 小結：首次踏足美孚搵食，想不到屋村內居然有高水準餐廳，而且價位合理，實屬難得，是一家大小懶得煮飯下樓開餐的必然之選。事實上我們也點了2杯紅豆冰和珍多冰來喝，吃了那麼多才不過每位$200，即使我倆並非區內居民，也心甘情願再次光顧。…Read More