根嫂小食 (Closed)

見到人地post哩度有雞湯碗仔翅,仲咁鬼足料,拿拿聲黎試下先,哩度食物選擇超多,好彩我冇選擇困難症,唔係就慘啦(其實之前睇post已經諗好食咩XD)今日既目標原本只係富貴碗仔翅,同埋生菜魚肉,點知之後見到章魚小丸子特價時段只係$20!立即要買多份返去同will's coffee開心share,章魚小丸子6粒,$20,超抵食,仲要係即場唧粉漿整,唔係來貨翻熱,雖之唔係最最最好食,但絕對對得住$20既價錢!魚湯生菜魚肉,滿滿一碗魚肉山,加埋菜脯,魚肉白雪雪,應該唔係鯪魚肉喎,叫Wills潷起d食,佢潷黎潷去都係魚肉,搵唔到生菜XDD結果係最底搵到啦XD富貴碗仔翅,唔知點解對唔到焦XDD就咁睇好足料,超正,哩個唔同Wills share 啦,要自私食~分好返屋企食野啦,果然好足料,又花膠又木耳又素翅咁,夠杰身啖啖料,好開心呀,冇豬肉既碗仔翅好耐冇食過啦,問返根嫂,原來白雪雪魚肉係海魚肉,魚肉結實冇粉,不過我自己就覺得哩隻魚肉唔適合落醋,會有少少好彩都係面果幾舊,下次記得唔落醋XDD

係太子等大人做瑜伽,遊遊蕩蕩,見到根嫂小食,有d口痕,但一陣要同大人返娘家食飯,門口站到密密麻麻既餐牌,又飯又漢堡又便當又吐司,仲有涼茶?阿根嫂都幾多才多藝.比店入面圖片吸引眼球,富貴碗仔翅,我既學生年代,仲係成街小販,有個師奶成日自己煮野落街賣,夏天賣糖水,冬天賣碗仔翅,十元八塊一碗,入面雜崩冷,火腿又有,蟹柳又有,乜鬼都有,冬天企係街邊,個人凍冰冰,碗翅熱辣辣,果種滋味依家真係好難搵到.行過隔離公園仔,即刻食,個翅夠杰身,唔會水注注,仲好足料,眼見有冬菇,花膠,素翅,雞肉,木耳,竹笙,好似仲有一絲絲瑤柱,落埋醋,麻油,胡椒粉同辣菜脯,口感十足,味道亦唔錯,$30黎講,好似貴過一般碗仔翅,但以哩個質素黎講,就係物有所值既,試下搵晚凍d試下係街食,可能搵得返那些年既風味.