Salami Restaurant

今日(30-5-2015 Sat)等男友放工後一齊去食晏買o野,我o地o係千色店等,等到佢後諗食咩o野?Pokka已經冇乜位而且貴,於是我提議莎樂美,o黎到重有啲位,我o地問侍應可唔可以坐卡位?佢答留俾四人坐,要我o地坐走神o既二人枱.我o地唔鍾意,於是坐門口o既位.坐好後,我要$58.00o既A號鐵板午餐,係日本帶子伴美國雞扒配白菌蒜蓉汁,男友要$46.00o既 2號餐,巴西牛柳粒飯,我o地都要周打魚湯.好快,兩個湯都到o黎,味道唔鹹,清清淡淡咁,味道同以往一樣,餐包都係暖暖地.之後男友o既巴西牛柳粒飯到o黎,我試吓,牛柳粒得幾粒,而大部份都係大大件牛肉塊,而味道,我竟然食到羶味,一般喎.然後我o既日本帶子伴美國雞扒配白菌蒜蓉汁到o黎,呢次鐵板好似唔夠熱,熱力好快燒失,雞扒有兩件大大件o既,日本帶子唔大隻,食落, 雞扒煎到皮脆,帶子正常冇問題啦.薯條好熱,個汁都幾鹹吓.最後我o地都要可樂,而雲呢拿雪糕球同舊年一樣咁細個.服務:唔俾卡位我o地算數,但後來好多都係兩個人,o個啲佢又俾坐,我覺得係睇人囉.而我見到佢o地貼o左一張o野,話食客限食1.25小時.價錢:呢餐連加一耍$114.00.味道係2.875分, 抵食同服務係2.5分…Read More

今日(13-12-2014 Sat)等男友放工食晏,突然諗起呢間,於是提議o黎呢o度.我先o黎等位,等o左大約15分鐘有枱,男友都o黎到.我要$45.00o既西西里雞扒午餐,要周打魚湯,男友要$54.00o既黑椒牛柳粒鐵板餐,模模糊糊*咁要o左周打魚湯.好怏,兩個餐包同餐湯到o黎,餐包暖暖地又軟熟,周打魚湯質地好濃同滑,有一件梳打餅,一粒帶子仔重有其他o野,都幾豐富.然後我o既西西里雞扒意粉到o黎,雞扒大大件,意粉又超多,真係嚇親.食落,西西里雞扒面上o既汁係甜甜地,雞扒好厚肉又腍,但都有少少辣.意粉係番茄意粉,味道好夠.而男友o既黑椒牛柳粒鐵板呢,o黎到淋汁時都冇孜孜聲,但男友話都好熱.牛柳粒唔係牛柳粒,切到大大舊,我食吓,嘩!好辣,男友就鐘意佢juicy.薯條都被黑椒汁攪到好辣.而餐茶凍檸水呢,比其他茶餐廳細杯,雖然係咁,但冰粒唔多,咁樣就唔會覺得唔夠飲.不過一飲落就覺得好甜.最後,男友個餐有雪糕o既,係雲呢嗱雪糕,呢個正常冇問題.服務:我排隊等位時,一個男職員問我前面o個個男人幾多位?個男人答兩大一細,咁就入o左去.之後女職員出o黎嗌有冇人齊o既兩位?由於的男友未到,所以我唔可以入,俾o左後面o既人入.之後女職員又出o黎,問我係咪兩個?我答係,佢叫我入,但見我一個入,就問我未人齊?我答o黎o緊,就到.佢至俾我坐.唔使一分鐘,男友就o黎到.我覺得你要客人人齊至入唔緊要,但點解前面個客人未人齊,而且係三個佢都俾人入,到我時又要人齊至俾入咁雙重標準?而點解我話男友模模糊糊咁要o左周打魚湯?因為落單時,廣東話唔係好正o既女侍應,問男友要薯菜,飯定意粉?男友答要意粉,我就即話我要薯菜.女侍應就話我要意粉,男友要薯菜.我答唔係,調轉o左.佢話男友o既鐵板餐如果要意粉就要加$3.00.我o個個如果要意粉就唔使加錢.啊,原來佢咁樣係幫我o地慳$3.00.OK,唔該晒.但到叫湯時,佢就引導到男友要o左周打魚湯.之後食到咁上下,另一個女侍應問的o地要咩o野餐茶?我答凍檸水,男友一樣.冇耐,廣東話唔係好正o既o個個女侍應又走o黎問我o地要咩o野餐茶?男友答叫o左.點知佢可以話一杯可樂一杯凍檸茶一邊行o左去.我o地冇理佢.佢就拎住呢兩杯佢自己作o既餐茶俾我o地.我即刻話我o地冇叫呢啲喎,係兩杯凍檸茶.於是佢就再去拎過.味道係3.5分, 服務係2.5分…Read More

尋晚(30-10-2012 Tue)放工後會唔去睇大哥而合男友食晚飯,佢話呢間開o左咁耐都未試過,就o黎試.好彩我叫男友早啲o黎坐低等我,唔係就冇晒卡位,呢o度真係好早就full.男友要$68.00o既晚餐,有吞拿魚沙律,倫敦薄牛扒,佢揀周打魚湯,重有雪糕新地,餐飲要凍檸茶我要$59.00o既意式燴豬髀意粉,要周打魚湯同熱檸水,同樣都有雪糕新地.好快,兩個湯到o黎,同樣有一件梳打餅,湯o既濃度夠,有啲帶子肉,但味道鹹o左啲.餐包暖暖,OK.之後男友o既吞拿魚沙律到o黎, 吞拿魚份量唔多,底下o既雜果都係正常冇乜問題.然後我o既意式燴豬髀意粉到o黎,意粉用茄汁煮過,豬髀已切開一片片,質地夠腍,上面o既茄汁係非一般茄汁,唔止得酸甜味道,而係加o左啲o野,比較豐富,不過食到尾覺得酸o左啲.而男友o既倫敦薄牛扒飯呢?牛扒一啲都唔薄,而且有兩件.汁係蒜蓉汁,男友唔夠我o既意式茄汁好味,牛扒仍唔夠豬髀腍,不過仍食到牛肉o既味道.之後係雪糕新地,呢間除o左有七彩碎糖外,重加有棉花糖,雪糕唔會係貴價雪糕,味道係芒果味,好凍.而棉花糖口感比較實,麻麻.飲品方面就冇問題.環境:標題已經講明,雖然呢間係新舖,但燈光較到好暗.卡位枱同凳之間o既空間窄o左啲.開頭冷氣開得o岩o岩好,不過多客人要鐵板餐而攪到好大煙,所以都開大o左,呢樣可以理解.服務:兩位年紀比較大o既女侍應都好勤奮,雖然有時有啲位置做得唔係咁好,但都唔錯喇,努力.價錢:估唔到同舊舖一樣咁平,份量又多,唔怪得咁多人啦其他:開頭唔知佢同沙咀道o個間莎樂美有冇關係,直至我坐低後睇到張墊枱紙有印埋沙咀道至知.而款式亦都一樣,幾十年不變.埋單,連加一共$140.00…Read More