Toyouke Izakaya

非常懶惰，都食咗一排，不過豐受值得寫返個食評。夜晚食，唔算話好多人，加上之前book咗，所以直入就OK lu .環境：4/5觀塘有好多嘢食，但大部份都係喺工廠大廈，地舖堂食嘅唔係話特別好多，豐受喺觀塘餐廳嚟講坐得幾舒服，唔會逼夾。食物：4/5佢主打烏冬，燒物。烏冬係真係幾好食嘅，你唔會覺得係嗰啲港式粗製濫造嘅感覺。燒物都唔錯，唔會燒到乾晒柴晒，配清酒，好味，原本淨係諗住試吓個牛舌，之後嗌咗個雞串盛，唔覺唔覺都叫多咗😂。其他嘢食 魷魚好味，厚身嘅炸物都ok,唔係嗰啲食到成口油嘅。玉子燒，厚身，靚蛋，好香蛋味。有少少不足嘅，反而係個生蠔，唔夠肥美，可以在新鮮少少服務：5/5服務真係要讚一讚，尤其是係經理，熱心推介，亦都會同人交流，對於日本清酒唔係太熟悉，但係佢都會好耐心咁樣了解你嘅口味，食到差唔多嘅時候都會問你啲嘢好唔好食，同埋都好細心，得閒幫你斟下酒。其他侍應嘅反應都好快，服務態度唔錯。…Read More

下午時間搵咗呢間坐得舒服又乾淨嘅餐廳傾偈食嘢點咗蕃茄牛肉烏冬、原隻魷魚筒、燒三文魚腩、串燒拼盆同埋野菜大蝦天婦羅拼盤蕃茄湯底好正牛肉食得出係優質肥牛烏冬口感Q彈一向好鍾意食魷魚筒，今次點嘅魷魚筒好啱我口味串燒拼盆同埋燒三文魚腩一齊上，串燒有雞皮、雞肉同雞翼，配埋啤酒食好夾。燒三文魚腩燒得恰到好處，魚皮香脆，魚肉美味多汁最驚喜係野菜大蝦天婦羅拼盤平時唔係點食天婦羅嘅我都覺得好好食。天婦羅係啱啱炸好即上檯，表面重有一層熱氣。其中大蝦天婦羅必食！！食物整體上都好高質，一定會再再再幫襯…Read More

復活節假期，同小朋友係觀塘海濱長廊野餐完，諗住喺觀塘工業區食晚餐，經過鴻圖道東瀛遊廣場地下，見到新開咗一間主打烏冬麵居酒屋，喺門口見到餐牌，都幾適合大人及小朋友食，所以就試咗依間餐廳。餐廳環境：採用日式風格，木器傢俬柔和舒服燈光照明光猛，洗手間乾淨清潔，冇積水，仲有兩至三枱，日式榻榻米座位。食物方面：主食蕃茄牛肉烏冬$66，烏冬彈牙有口感應該新鮮製造，蕃茄湯底應該用新鮮蕃茄烹調味道濃郁，牛肉用正常肥牛。炸雞他他醬拌烏冬$66，烏冬彈牙有口感，炸雞外面炸醬皮薄及脆，內裏雞肉冇炸到乾身，雞肉嫩滑有汁，他他醬正常。日式牛肉飯$66，用日本珍珠米，牛肉汁配肥牛味道唔太鹹。炸物炸雞軟骨$48，炸醬皮薄，雞軟骨比平常食大粒更有口感。燒物雞泡魚干$58，燒得乾爽有魚干味。鹽燒牛舌串$48，醃製味道適中，燒烤後保留到肉汁。原隻燒魷魚筒$88，醬汁調校得好味，燒烤後保留到彈牙及魷魚鮮味。燒多春魚$38，燒烤後保留魚身外脆內軟燒菠蘿$38，外面少少燒焦，菠蘿肉酸酸甜甜保留到菠蘿水份。飲品：食店提供日式熱茶或水Happy hour時段，Asahi啤酒買一送一，都有大約500毫升一杯，$ 58兩杯，啤酒夠冰凍。 …Read More