天氣凍，一心諗住嚟食火鍋，點知唔止火鍋好食，刺身更令我驚喜。餐廳裝修新淨，樓上有房，人數多少都cater到，樓下仲設有兒童區可以玩煮飯仔等，啱晒想二人世界嘅父母。 ✦ 卜卜蜆鍋卜卜蜆大大隻、份量多，完全冇沙，鮮甜肥美。湯底另有粉絲、蘿蔔、粟米等配料，好香甜。 ✦ 手打四寶丸有鮮蝦丸、鮮墨魚丸、牛丸同豬肉丸。每款兩粒，蝦丸、墨魚丸鮮嫩，牛丸、豬肉腸味道濃郁，粒粒爽滑彈牙。 ✦ 西班牙黑毛豬肉片紋理清晰、油花分佈均勻，肉味香濃，口感嫩滑。✦ 水餃王半個拳頭咁大隻，好足料，皮薄餡靚。真係有隻鮮蝦喺入面，加埋木耳、肉碎等，口感豐富，好飽滿。 ✦ 石蚌魚刺身第一次食，今晚VIP。石蚌魚新鮮起肉上，上枱時魚頭仲會郁。師傅刀工一流，刺身呈半透明色，味道鮮甜、齒頰留香，口感爽脆嫩滑。配搭柚子酸汁食，更加提昇鮮美。 ✦ 三文魚刺身紋理清晰，片片肥美肉厚，略帶油脂香。 另外仲嗌住大大杯洛神花，酸酸甜甜，可以食更多。好有心機嘅餐廳，值得再嚟。…Read More
