今日想試食新嘢就諗起呢間（之前食另一間經過，以為佢係新開）原本冇打算寫食評，但食完覺得唔錯想推介俾朋友，諗唔返叫咩名所以先上OpenRice 睇。一睇先知原來都開咗一段時間，但竟然有幾個劣評。但其實今日食完真係覺得唔錯，以咁嘅價錢有咁嘅質素其實CP值都幾高，超抵食，所以先忍唔住寫呢篇食評，希望俾人知道啲嘢食絕對唔差，同時希望可以支持呢間小店，因為之後仲想食多幾次😆一來就有個送嘅南瓜湯，估唔到賣相靚之餘，仲好好味，仲要係送嘅！真係估唔到有咁嘅質素冬陰功蝦意粉同牛扒，份量都好足夠。冬陰功個汁幾有驚喜，唔會一下子好辣，感覺係有層次嘅辣味，蝦雖然得三隻，不過計返個價錢，而且口感彈牙，絕對抵食！牛扒雖然唔係好靚嘅牛，但絕對對得住個價錢，而且薯條都好新鮮好大份。最值得一讚係，雖然係熟食中心入邊，但呢間舖嘅環境真係好乾淨企理！（乾淨到我以為佢係新開咗一個月左右）而且所有嘢賣相都好靚，睇得出好有心機煮同擺盤。因為嘢食唔錯，所以後來試埋佢嘅飲品，估唔到飲品都係好靚足料，味道又好，加十幾廿蚊左右嘅價錢就有咁樣嘅飲品，真係超值！唯一改善嘅係杯嘢飲啲青檸，如果可以去埋核就更加完美（因為用飲管飲好易咬到啲核會好苦）…Read More
