一年一度重要既人生日既大日子，一早book左港島香格里拉酒店灘萬日本料理食鐵板燒。午市餐牌有鐵板燒同非鐵板燒餐牌。鐵板燒餐牌有6款特選鐵板套餐，價錢由$420至$1000一位，另加一，視乎食材同包幾多野食。每個餐基本都包青菜沙律，雜錦野菜，炒飯或炒麵，味噌湯同泡菜。貴餐會包多樣前菜。散叫有肉類鐵板燒，海鮮鐵板燒，蔬菜鐵板燒，炒飯，壽司，壽司卷，手卷，刺身，前菜，湯類，沙律，燒物，飯麵同甜品。預先預留鐵板燒枱，食鐵板燒要坐bar枱係常識啦。今日每人叫一個餐。日本和牛套餐$1000另加一，包以下食物：前菜青菜沙律日本西冷和牛雜錦野菜炒飯或炒麵麵豉湯及泡菜鐵板特選套餐$580另加一，包以下食物：前菜三文魚刺身牛油煮帆立貝青菜沙律西冷牛扒或者牛肉薄燒雜錦野菜炒飯或炒麵麵豉湯及泡菜服務員先幫我地忙戴好圍裙，呢度係用藍色布質圍裙，唔係即棄。好快就上前菜沙律。青菜沙律係沙律雜菜加少見既白蘿蔔片，加上柚子醋做調味，味道清淡。普通料。前菜有三款。豆腐比平常厚實，居然有少少芝士感覺，好味道。面頭有少少以為係wasabi既物體，不過無wasabi味。銀鱈魚三舊加上洋蔥絲，青瓜，同紅蘿蔔絲，味道甜甜酸酸。銀鱈魚就好麻麻，淋身而味道又無特別，無乜魚味。最後高身兜就係裝住鮮嫩菠菜加菇仔，面頭加上木魚花。三文魚刺身有三片較瘦同兩片較肥，其實質素都幾好，仲有黃色花瓣裝飾。然後我地既鐵板廚師就攞住我地今餐既肉，海鮮同飯麵菜黎我地鐵板燒枱前面準備啟動。先煮海鮮，師傅將醬汁加係帆立貝殼上面，然後將帆立貝一切二直接係爐上面煎，最後加少少黑椒調味，帆立貝放返係殼上面上枱。帆立貝都好嫩，不過味道方面係正常貨色，牛油味都唔重。然後就食美國西冷，都好大塊，我地鍾意食生d。廚師切粒煎，然後就可以一口size入口。西冷食落都好嫩，而個皮係有少少脆，算唔錯。日本和牛西冷係A5，油花當然平均又靚，師傅都係切粒煎，呢塊牛就非常淋而脂肪重，入面啖啖油。塊皮都相對脆少少，少食多滋味。醬汁有蒜頭酸汁同胡麻醬，兩款醬汁都唔錯，當然其實食食物原味都好食。然後到主食。師傅先炒飯。師傅將一隻蛋，紅蘿蔔粒，綠色瓜粒，洋蔥粒，同頭先剩返既牛肉粒一起炒。分成兩碗上枱，每人有一中碗份量。飯炒得夠乾身，味道唔錯，仲有少少飯焦添，唔覺油膩。呢個時候服務員就上麵豉湯及泡菜。泡菜有三款，包括黃色蘿蔔片同牛蒡各兩件，爽脆少鹹。伴有紅色泡菜就幾鹹。麵豉湯味道鹹香，有好多料，包括昆布，蔥花同腐皮，真係滿滿既料。然後師傅就炒麵。麵條係粗身黃色麵，好滑下，加埋椰菜，菠菜，芽菜同紅蘿蔔絲一齊炒，口感豐富，當然仲有牛肉粒。個醬汁好正，係甜甜地，令個麵好好食。師傅都係一份分兩碟上比我地。最後就係雜錦野菜，包括芽菜，菠菜，生菜同紅蘿蔔絲。每人大概有半碗左右，蔬菜唔會太油，味道正常。個餐可惜唔包甜品。整體而言，食物質素係唔錯，不過又唔係好食到值呢個價。價錢主要係食地方同裝修。服務方面我覺得可以再好d，例如主動加密d茶水。兩個餐而言，鐵板特選套餐絕對係抵食d，因為美國牛都唔錯。間中黎一次慶祝都可以。…Read More
