要清假所以約左朋友搵個平日黎大館行下影下相，行完經過嘉咸街街市發現有間新開嘅泰菜店，天氣凍特別想食啲辣野，趁六點前仲有堂食狗衝入去食返個early dinner先。MeKong雖然主打食泰菜，不過聽個名就知佢其實連越南野都有，佢係一間走中低價位嘅食店，裝潢平實冇咩花巧，勝在乾淨企理。冬陰功海鮮湯($88) - 先黎一個冬陰功湯暖下胃先，熱辣辣酸辣度啱啱好，暖肚又惹味，一鍋份量唔算少，大約分倒四碗，裡面有蝦、青口、魷魚同草菇。泰式拼盤($88) - 拼盤包括左炸蝦餅、春卷、炸雞翼同沙嗲雞肉豬肉串燒，份量夠二至四人食。蝦餅好陣牙食得出鮮蝦味，炸雞翼同春卷幾香脆，沙嗲串燒沙爹味幾香，不過雞肉同豬肉就燒得有少少過左火，肉質硬左啲。越南生牛肉湯河($68) - 生牛肉湯河上枱時牛肉仲帶少少紅色，牛肉量對版。牛骨湯味道濃甜，食完都唔覺口渴。河粉當然冇得同越南當地比，但以香港質素黎講都算幾薄幾滑。除左牛肉，仲有白蘿蔔，清甜冇渣吸晒牛骨湯啲味都好正～！！熱龍眼水($28) - 唔會太甜，入面都有唔少龍眼肉。熱檸檬生薑蜜($28) - 薑味夠重又唔會太辣，好啱而家凍冰冰天氣飲，飲完成個人暖晒。總結，食物唔錯，份量都好足，仲要唔洗加一，估計lunch hour應該幾多人食。…Read More
