星期六去朋友位於荔枝角工廈嘅Studio睇波，我哋諗緊夜晚食乜好，朋友提議幫襯有間唔錯嘅外賣店🔔「町町便丼」。佢買慣買熟，知道用QR Code落單可享最高折扣優惠: 6折🈹。即使係週末，但店舖仍然接外賣單接唔停手🥡，我哋等候期間見到有幾個車手拎住十幾盒飯走，好誇張呢。外賣全部都大大盒🍱，折實後價錢都算相宜。我哋兩個人嗌咗兩個主食同兩個小食，份量其實多到三至四個人都可能夠。日式咖喱吉列豬扒蛋蓋飯($52)，蓋飯好豐富，有齊咖喱、滑蛋同吉列豬扒。🍛咖喱係日式嗰種，近乎無辣味，不過加埋蛋蛋伴飯食夠晒多汁🥚。吉列層同豬扒緊貼，皮脆肉嫩，高質🐷。大盛雙層鰻魚丼($70)，鰻魚丼不得了，雙層果然有兩大塊鰻魚😍，夾埋應該足一整條，絕不欺場。超市單買分分鐘都要呢個價，所以個飯係抵食。同時，鰻魚汁配珍珠飯好食🍚。七味唐揚池魚($38)，🐟池魚份量勁多，成盒裝滿晒，我諗可能有超過50條，佐酒一流！池魚炸得酥脆，脆到可以連骨成條食晒。雖然魚仔落咗七味粉調味，但建議可提供醬汁食會更佳。磯燒魷魚天婦羅配黑椒蛋黄醬($38)，🦑魷魚自身味道OK，兼且夠彈牙，但可惜天婦羅炸衣有少少令人失望，因為粉層偏厚，配方有待改善。不過搭伴嘅蛋黃醬幾惹味，加返啲分。總括嚟講，町町丼丼大件夾抵食👍，味道雖然唔稱得上好驚艷，但如果返工時份嘅午餐有咁繽紛，已經足以讓人滿足。…Read More
