Vivienne Westwood Café最近從尖沙咀搬到銅鑼灣，除咗大受歡迎嘅三層架下午茶之外，仲係全球首間供應鹹食主菜嘅西餐廳！加上打卡位超多，例如以攝影棚為主題嘅長枱、逆時針轉嘅大鐘、品牌格仔圖案嘅茶罐牆等等，視覺同味蕾多重滿足呀。
 

Vivienne Westwood銅鑼灣百德新街旗艦店樓高兩層，地下係精品店而一樓就係Cafe。除咗係品牌全球第三間Cafe，亦係第一間供應主菜，主菜由漢堡、意粉到素食都應有盡有。
 

打卡必試三層架

Premium Tea Set（兩位用）（$588）

而喺尖沙咀店就大受歡迎嘅英式下午茶當然繼續供應！以金色品牌Orb標誌三層架奉上各款鹹點、甜品杯同英式鬆餅，再加手工甜品、自選口味嘅雪糕同熱茶。
 

迷你和牛漢堡、黑松露醬炙燒帶子

煙三文魚，煎薯仔絲煎餅、青瓜麥包三文治

鹹點方面以迷你和牛漢堡同黑松露醬炙燒帶子最吸引，前者迷你和牛扒配車厘茄相當Juicy，後者有大粒帶子配香濃黑松露醬。
 

英式甜品杯、英式鬆餅配奶油忌廉及果醬

馬卡龍、精選朱古力蛋糕

自選雪糕

甜品亦相當精緻，特別係印上品牌Orb標誌嘅馬卡龍。雪糕可以選擇兩款唔同口味，現場製作兼加上Orb標誌白朱古力點綴，特別推介Earl Grey口味雪糕，茶香濃郁仲食到一粒粒茶葉！
 

 
全球首推主食

全日早餐（$168）

All Day Breakfast亦非常豐富，有豬肉腸、焗蛋、煙肉、扒蕃茄、火腿、炒蘑菇、沙律、茄汁豆同蒜蓉包。最誘人嘅中間用煙肉包住嘅焗蛋，切開半熟蛋黃流出嚟真係好有療癒感！
 

扒海鱸魚柳伴鮮菠菜及白酒汁泡泡（$208）

餐廳推介嘅主菜之一，海鱸魚柳煎至微脆而保留肉質嫩滑。上面係Chardonnay香檳泡泡，下面亦有薑味忌廉白汁，味道層次豐富。
 

松露油雜菌超扁意粉（$169）

餐廳亦貼心地供應三款素食之選，包括素菜漢堡、忌廉菠菜白菌焗酥批，同呢款松露油雜菌超扁意粉。唔好以為素菜就會好寡，菇菌香味十足，加上松露油係錦上添花。
 

英式紅茶（$88）

牛奶泡沫咖啡（$60）

Cafe亦有多款飲品供應，包括咖啡、花果茶、朱古力、牛奶抹茶等等。
 

蛋糕櫃亦有多款小蛋糕同切件蛋糕。
 

四大打卡位

品牌Tartan格仔圖案茶罐牆，同以時裝表演後臺「攝影棚」為主嘅裝修。
 

品牌首間時裝店Worlds End門外嘅13小時逆向大鐘。
 

攝於倫敦華勒斯典藏館嘅壁紙。
 

Vivienne Westwood Café
地址：銅鑼灣百德新街27-47號Fashion Walk 1樓F-8號舖

文、相、片：Cathy