起初以超多款芭菲而廣為人知嘅呢間café，最近終於開到入港島，而且仲趁住士多啤梨當造嘅季節，乘勢出咗幾款新嘅士多啤梨甜品，樣樣都好靚仔咁款，相機有排食啊。

士多啤梨芭菲有分精選同特盛，即係XL版同XXL版。係呀，我冇打錯，精選嘅份量都已經好足料，睇住師傅一層一層咁疊上去，士多啤梨啫喱、忌廉、士多啤梨醬、脆米、嗶多三球雪糕、再喺頂度不停咁砌士多啤梨上去，撒埋糖粉，靚晒~ 成朵士多啤梨花咁，未睇都已經甜到入心。

唔好睇輕呢件細細件嘅日本士多啤梨蛋糕，一層mousse一層啫喱咁都幾有口感，同埋好香甜。

至於士多啤梨招牌班戟，相信亦會係一眾甜品控嘅飛佛。蛋香味足，質感軟綿，唔會太過空氣但又未至於實綁綁，但就只係得下午茶時段先至食得到……

 士多啤梨法式多士

除咗甜品，餐廳亦有幾款冬季限定menu，其中兩樣分別係西京焗龍蝦配鮭魚味噌意粉同海老濃湯海鮮烏冬。前者有半隻大大隻嘅龍蝦好鬼吸睛，用上蛋黃麵豉醬去調味，再灑上粒粒檸檬皮，意粉有嚼勁而龍蝦則爽口彈牙，濃濃嘅和風口味中帶住清新。

後者就啱晒海鮮控，一碗食齊虎蝦、青口、蜆肉同魷魚等多種海鮮，而個湯底仲有香濃嘅蝦味添。

L.D.K. by Ufufu Café
地址：銅鑼灣告士打道280號世貿中心3樓P303-303A號舖