Get set go!長沙灣一站式試勻多國菜
2016-08-24
一日三餐,即係每日都要諗至少三次食乜好。好彩香港係美食之都,唔同國家風味嘅菜式都搵得到。唔信?去長沙灣行個圈,你就會發現到港、日、法、泰甚至葡國菜都有!由呃Like小清新甜品到重口味濃厚沾麵,由新派Fusion菜到老香港小食,喺長沙灣呢個舊區都有齊哂。

葡國代表:平民優質傳統葡菜  BOM Cuisine


圖:大胃鵬

唔洗飛去葡萄牙,連大海都唔洗過就嘆到正宗葡菜?無錯,嚟長沙灣呢間多國菜館就有喇。辣肉腸配馬介休炒飯嘅辣肉腸惹味不在話下,馬介休亦鹹香誘人,濃而不膩。另外招牌葡萄牙烤乳豬配番紅花飯啱哂食肉獸,乳豬肥瘦適中皮脆肉嫩,連番紅花飯都係粒粒分明帶特別香味。

泰國代表:住家菜Feel泰滋味  


圖:iamissyee

食泰國菜唔一定要去九龍城嘅,呢間樓上小店水準亦唔錯。先嚟一碟生蝦刺身,生蝦新鮮肉厚,配上加咗辣椒蒜片等調配嘅魚露,酸辣冰凍夠開胃。人多嘅話就可以嗌有齊炸蝦餅、魚餅同春卷嘅小食拼盤,同色香味俱全嘅冬蔭公湯一齊開心Share。拖友們兩個人亦可以叫青木瓜沙律同泰式炒粉絲,一樣泰滋味。

日本代表:重口味隱世沾麵  海老名沾麵


圖:ki918

非常低調嘅門面,低調到隨時走咗寶都唔知。小店主要供應蝦汁醬油、蝦汁味噌,同蝦汁蕃茄呢三款口味嘅沾麵。沾湯用咗用上大量豬骨同櫻花蝦熬煮,見到上面果層紅油就知有幾真材實料,濃得嚟唔死鹹。唔鐘意咁重口味嘅可以試下加枱上面嘅櫻花蝦醋或者山葵檸檬汁,增加味道層次。

日本代表:小清新柚子主題小店  柚屋


圖:暴食小公主misskitb

香港人特別鐘意食日本菜,所以開飯仔亦特別介紹多一間,呢間柚屋名副其實專賣柚子主題甜品同輕食,例如柚子胡椒雞扒沙律,亦有懶人放假最啱食嘅All-day breakfast。不過最切合主題嘅就係佢地嘅柚子甜品,柚子雪芳蛋糕口感輕盈軟熟,加上柚子香零舍清新。柚柚拼盤嘅柚子雪糕仲帶少少柚子果肉,清爽冰涼。

法國代表:高CP值藍帶法國菜  Oui Oui Bistro


圖:相機食先eat_eat_everyday

要嘆優質法國菜一定要高消費?未必,呢間餐廳雖然唔算非常平民,但有法國藍帶大廚主理加上菜式用心,計返性價比值得一試。Truffled Carbonara看似簡單但細節見心思,黑松露嘅獨特香氣加上北海道溫泉蛋,醬汁黏而不膩,滿嘴濃香。Poire Au Vin Rouge紅酒燴梨即叫即做,酸甜多汁一清味蕾。

西餐代表:坐喺車卡嘆好西  CHOO CHOO


圖:肚餓上班族mohkc

特別裝修可以幫美味「好西」再加分,呢間西餐廳以火車做主題,坐低食嘢好似置身外國火車車卡當中咁。慢煮三文魚柳配法式芥末醬先慢煮至半熟,令三文魚柳肉質特別嫩滑,再煎香表皮,一脆一嫩層次分明。招牌甜品L.J.K.係芝士蛋糕球,切開仲有流心雜莓醬,配埋焦糖脆脆,酸甜有致又唔膩。

Fusion代表:用清酒杯嗒咖啡  瘋鳥


圖:mantung88

如果上面介紹嘅餐廳係西餐中見Fusion特色,呢間Cafe就更加將唔同國家菜式特色融為一體。泰式冬陰功變成意粉醬汁,香辣開胃。三重芝士炸蝦Pizza有少少拉芝效果,加上有香脆程度同日式天婦羅有得Fight嘅炸蝦。最特別嘅係佢地嘅手沖咖啡,特別用清酒壺同杯裝住,造型搶眼之餘仲可以畀你慢慢細味咖啡香。

香港代表:懷舊豆花+釀豆腐  順興隆桂記荳品廠


圖:portfoodioPPAndy

香港嘅老字號荳品廠已經唔多,其中一間就喺長沙灣。嚟到當然唔少得嚟碗豆腐花,雪白嘅豆花非常幼滑,一個唔小心就會瀡落喉嚨,可惜無薑汁而且豆香唔算非常濃郁。意猶未盡嘅再食多碟煎釀豆腐,煎香咗嘅豆腐滑溜結實,金黃色魚肉亦有鮮味。記得點少少豆瓣醬再食,即刻升一個level。

香港代表:新舊融合抵食糖水  松記糖水


圖:au9傻寶

照顧埋女孩子嘅甜品胃,介紹多間港式糖水舖。雖然係港式糖水舖,但從傳統嘅紅豆沙芝麻糊,創新嘅生果明珠(即係大西米)同水晶涼粉,日式Feel嘅刨冰,到西式嘅心太軟同窩夫都應有盡有,選擇恐懼症人士小心頭痛。鐘意大堆頭嘅可以試Summer,兩大球雪糕加上雜果同明珠,一次過滿足三個願望。

隨時接收最新資訊
讚好OpenRice專頁!
Keyword
長沙灣
沾麵
法國菜
葡菜
咖啡
糖水
開飯專題
開飯仔為你提供各類型最新飲食情報及優惠,全面照顧你的飲食喜好。
Related Articles
【新店直擊】氹仔舊城抵食Café:One More Café
2017-02-02
【新店直擊】青洲灶記咖啡氹仔新登場!
2016-08-09
【編輯推介】「越」食「越」好味:發達越南小食館
2016-03-25
【新店直擊】粉色系Café潮聖打卡必到
2017-03-03
【Pinkoi好設計好生活】咖啡迷必到:4 大來自不同地方的特色咖啡館
2017-02-24
【小不啦嘰1大口】火車來了!【CHOO CHOO】
2017-04-18