又到秋天呢個天高氣爽又舒服嘅季節，一於約埋朋友去嘆 Brunch 啦～以下呢五間睇吓邊間啱心水！
目錄
► 西班牙滋味秋季早午餐：MAJO Tapas Paella Bar |
西班牙滋味秋季早午餐 MAJO Tapas Paella Bar 
想感受喺外國 Chill 嘅感覺，呢間可以坐喺開揚舒逸嘅戶外露天座位，悠閒享用西班牙及地中海美食。包括多款可供分享前菜、每位自選一道主菜及一道甜品，前菜包括烤北海道帶子配大蒜及歐芹油、慢煮加利西亞八爪魚及自家製特色炸丸子等。主菜推介西班牙海鮮燴飯或燴麵條，鮮味濃郁；慢煮 16 小時乳豬腿配番薯及香梨醬都唔錯，乳豬軟腍入味，配上香梨醬更清新。甜品有香醇甜滑嘅特濃杏仁朱古力蛋糕及泰隆尼亞傳統甜品焦糖吉士奶凍，食完真係大滿足！
供應時間：即日起逢星期六及星期日，上午 11 時至下午 3 時
享悅早午餐狂想曲 The Enclave
假日去離島玩吓順便嘆個 Brunch 就最正啦！呢間酒店餐廳推出早午餐狂想曲，主菜選擇好多，包括鮮嫩多汁嘅美國燒肉眼扒、是日鮮魚精選如三文魚扒或比目魚、大蝦火山意粉，同最地道嘅大澳蝦醬炒飯，選用大澳優質嘅蝦醬製成，香氣濃郁又唔太鹹。另加 $288 可升級至海鮮拼盤，包括阿拉斯加鱈場蟹腳、大蝦、即開法國生蠔、蜆或青口。當然唔少得開胃菜、甜品同埋即煮即製嘅雞蛋仔及蛋料理，仲有由專業調酒師每周精心調製嘅花樣雞尾酒！
供應時間：即日起逢星期六及星期日，中午 12 時至下午 3 時
ADDA早午餐 Bengal Brothers
主打嚟自印度全國各地、價格實惠嘅街頭美食嘅呢間餐廳，最近推出全新早午餐～前菜有印度經典牛油餐包 Bun Maska 配馬薩拉熱奶茶及雜果果醬多士。而印度式早餐嚟講又點少得雞蛋菜式！經典傳統香辣炒蛋多士即係煎雙蛋辣椒芝士多士配炸香草薯仔，仲有以香鬆柔軟蒸米糕為主角嘅 Idli Plates 配自家製椰子酸辣醬或馬拉巴爾咖喱雞。想試吓印式 Brunch 嘅朋友絕對可以嚟嚐鮮～
供應時間：2023 年 10 月 8 日起逢星期日，上午 11 時至下午 3 時
Bocconi 周末早午餐 Pici
人氣意大利麵專門店，全新 Bocconi 周末早午餐以五道開胃菜開始，包括吞拿魚牛油果他他、經典吞拿魚醬小牛肉等。主菜方面當然係餐廳嘅招牌意粉，包括慢煮牛麵頰寬帶麵、巴馬臣芝士香草醬短捲麵、番红花忌廉青口扁麵、鮮刨黑松露細扁麵及慢煮小牛肉牛肝菌寬帶麵。最後可以選擇以提拉米蘇或意式奶凍作結～同埋正值大閘蟹當造，即日起到 11 月 19 號，餐廳再次推出秋季限定嘅大閘蟹粉手工圓麵，粗身手工圓麵配上香濃幼滑細膩嘅大閘蟹粉同蟹肉，蟹粉味香濃令人驚喜。
早午餐供應時間：即日起逢星期六、星期日及公眾假期，上午 11 時至下午 4 時
港式風味周日早午餐 HOLT'S CAFÉ
呢間酒店餐廳向地道茶餐廳文化致敬，推出港式風味周日早午餐。以六款小碟菜式打開味蕾，包括香芒木瓜大蝦沙律、XO 醬炒蘿蔔糕、豉油雞等。主菜選擇夠晒經典，但選材就好高質。如乾炒和牛河及鮮茄焗西班牙黑豚豬扒飯配太陽蛋，神級叉燒飯選用有機日本雞蛋同日本米，味道同口感更上一層樓。甜品選擇都好港式，如港式花生醬西多士、楊枝甘露、雲呢拿雞蛋仔及港式蛋撻，食完就為周末劃上完美句號！
供應時間：即日起逢星期日，中午 12 時至下午 3 時
文: Yanica
